الموضوع: تحذير: كان حيتنصب عليا عن طريق الموبايل

أنا حبيت أكتب الموضوع ده للأخوة الأفاضل في المنتدى .. علشان أنبهم على أخر طرق النصب .

أمبارح الموبايل رن .. نمرة معرفهاش أولها 019 يعني تبع شركة فودافون رديت على التليفون .. لاقيت واحد بيقولي .. أستاذ/ باسم .. قولت ليه أيوة .. قالي معاك مش عارف مين من شركة فودافون .. وألف مبروك لحضرتك .. حضرتك كسبت معانا عربية بي أم دبليو جايزة من شركة فودافون ..

أنا طبعاً الفار ابتدى يلعب في عبي .. ومصدقتش الكلام .. قلت ليه أنت بتهرج وفايق .. وانا بصراحة مش فايق للكلام ده .. قالي والله العظيم يا أفندم أحنا شركة فودافون .. ورقم حضرتك كسب في السحب عربية بي أم دبليو .. قلت يا راجل أنت مش الموضوع ده خلص وانتهى خلاص .. قالي لا حضرتك هو فعلاً كان خلص بس الشركة قررت تزويد الجوائز لحد أخر شهر أكتوبر .

أنا بصراحة ابتديت أصدق .. بس من جوايا مش مصدق .. وقالي تأكيداً لكلامي .. مش حضرتك مشتري خط الموبايل بتاعك من سنة 98 .. وكان مكتوب على الشريحة "كليك" .. مش فودافون !! قلت ليه مظبوط .. وقالي وعلشان تتأكد أكتر .. حضرتك تجيب العقد وتيجي لفرع الشركة الرئيسي في ميدان سفنكس في المهندسين .. وأحنا مستنيين حضرتك لغاية الساعة 10 بالليل .. وقالي كمان أنا ححول ليك رصيد بمبلغ 1000 جنية كمان بجانب الجائزة الرئيسية "العربية"

ملحوظه : أبتديت أصدق أكتر

وقالي حضرتك أخر مرة شحنت أمتى .. قلت ليه مش فاكر بس تقريباً من 10 أيام .. قالي وحضرتك شحنت بكام .. قلت ليه مش فاكر برضه .. بس أنا غالباً بشحن يا أما بخمسين أو بمية .. قالي مش مهم .. بس بمجرد ما توصلك الرسالة بتحويل المبلغ .. اتصل بيا على الرقم اللي بكلمك منه ده على طول .. قلت ليه ربنا يسهل .

المهم بعد ما قفل معايا .. قلت في نفسي أية اللي بسمعه ده .. الكلام ده مش منطقي خالص ..ده أنا حتى فقري عمري ما كسبت حاجة .. أقوم أكسب عربية "بي أم" مرة واحدة (ومن هنا اتنبهت لنفسي بعد ما عشت في الوهم معاه بأسلوبه الرشيق) .. وفي وسط ما انا بفكر لاقيت رسالة جيالي .. بتقول أنك اتحول ليك مبلغ 1000 جنية .. المرسل Vodafone .. بس في ال Sender في أخر الرسالة رقم التليفون .. والمفروض يكون فودافون .

انا مكدبتش خبر .. وقلت أكيد دي نصباية .. ولما أتصل بيه .. حيقولي حولي رصيد مش عارف كام .. علشان تكسب الجائزة .

أنا بصراحة الدم ضرب في نافوخي .. وحلفت جوايا أني مش حسيبه .. رحت متصل بخدمة العملاء في شركة فودافون .. وحكيت ليهم على الموضوع .. وقالي أكيد ده حد عاوز ينصب عليك علشان تحوله رصيد أو أي حاجة تانية .. لأن العرض كان موجود وانتهى .. وأخد مني رقم التليفون اللي اتصل بيا واللي بعتلي رسالة .. وقالي ثواني معايا .. انا حتكلم مع المسئول عن الحاجات دي ، وأرجع لحضرتك تاني .

بعد شوية رجع .. وقالي أنه عمل شكوى بالرقم اللي اتصل بيا .. وحيخدوا الإجراءات القانونية اللازمة ضده وشكرني أني أهتميت .. لأن الحاجات دي بتجيب ليهم مشاكل مع عملاء كتير
. ففكرت شوية .. وقلت ليه ما هو ممكن يكون واحد صاحبي وجاب خط جديد وبيهزر معايا .. قالي احنا عاملين حساب ده يا أفندم .. وحنتابع الرقم .. وإذا كلم كذا نمرة تانية ورا بعض في نفس اليوم وبعت رساليل (زي ما عمل معايا) حناخد ضده الإجراءات القانونية .. ولو ده محصلش .. يبقى أكيد واحد بيهزر معاك .. والموضوع حيتكنسل . قلت ليه شكراً .

التساؤل بقى .. الشخص اللي اتصل بيا (إن مكنش صاحبي وبيهزر معايا).. عرف أسمي مين .. وأني اشتريت الخط في سنة كذا .. وكان مكتوب على الخط كليك .. فأكيد اللي اتصل بيا ده من شركة فودافون وبيطلع على اسرار العملاء اللي عندهم (ودي قضية ممكن ارفعها عليهم وأكسبها كمان)

المهم انا في الأخر عاوز أقول أن ليس كل ما يلمع ذهباً .. وأن الفقري فقري طول عمرة .