النصابون في بيع المستعمل

**ushraf** · 22-10-2009 10:40 AM

نسيت اقول لكم فيه ناس بتبقى راشة اجزاء من العربية وعشان ماتبانش بيروح حاككها بليفه خشنة عشان يقنعك انها فابريكة

**amirhamed** · 22-10-2009 11:26 AM

متابع بإهتمام

**Mohamed.Fawzy** · 22-10-2009 12:16 PM

التجار كلهم بيبقوا مسيطرين على مواقع البيع ... ده غير انهم بيبقوا متفقبن مع بعض فى المنطقه الواحده ... و انا ليا حكياتين معاهم ؟

الأولى :

فى واحد تاجر عربيات معرفه و كنت بسأله على عربيه معينه المهم قاللى هدورلك و بعد فتره لقيته بيتصل بيا و قاللى فى عربيه لقطه و فيها كل اللى انت عايزه تعالى شوفها ... رحت لقيتها فعلا عربيه كويسه من الداخل و الخارج بس ملاكى اسوان و شفت صاحبها شاب كده شكله مريب و قاللى اصل انا بتاجر فى العربيات اللقطه و دى شاريها من واحده فى اسوان و قعد يقللى شعر فى العربيه و انه جاى بيها سايق من اسوان و قاللى ان موضوع نقل الملف ده انا مليش دعوه بيه و انه هيخلص كل حاجه

المهم اتفقنا على السعر و دفعت العربون و قلتلوا فاضل حاجه واحده بس وهيا انى اكشف عليها فقالى العربيه دى جوهره و براحتك ... و اصريت انى اكشف فى بنزينه كالتكس فة عباس العقاد رغم بعدها عن المكان وقالى ما فى بنزينات قريبه ولكنى اصريت فقالى خلاص انا مش فاض اروح معاك خد التاجر المعرفه بتاعى و روح معاه ... المهم رحت البنزينه و ربنا كرمنى بواحد شيخ كده بيكشف عليها و بعد الكشف الدقيق قاللى الصدمه (العربيه مغيره ربع امامى كامل) و متسواش حاجه

المهم الكلام كان التاجر المعرفه و قعد يحلف انه ميعرفش حاجه عنها و رجعنا للراجل النصاب فقعد يتوه فى الكلام و قالى العربون بتاعك اهو و سابنا و مشى

المهم انا فى تاجر عربيات تانى جارى و كنت موصيه برضه و انا واقف فى البلكونه مره عند والدى لقبت الراجل النصاب راكب العربيه المشبوهه دى و داخل عند التاجر جارى

و من يوميها و انا حلفت مشتريش عربيه من تاجر حتى لو اخويا ...

نسيت اقولكم انه كان حاطط الأعلان بتاعها على سايتات كتير على النت

الثانيه :

المره دى كنت ببيع و عملت اعلان على كونتكت كار فلقيت رساله جيالى على موبايلى من مكتب سيارات و انه فى زبون للعربيه ... المهم كلمته و قاللى انه فى زبون للعربيه و هيكون موجود الساعه كذا و الكلام هيبقى منى للزبون و هوا هياخد عموله فقط و اكد عليا الميعاد علشان يبلغه للزبون

المهم اخدت منه العنوان و رحت فى الميعاد لقيته مكتب معفن و عامل سايت على النت والله مش فاكر اسمه كنت فضحته و لقيت راجل شكله مريب كده تحس انه تاجر مخدرات قاعد بيشرب شيشه جوه المهم دخلت و سلمت و قلتله فين الزبون ... فقالى انه قالوا يشوف هوا العربيه الأول و بعدين يكلمه لو تستاهل فقلتله بس ده مكنش اتفاقنا !!!! فقال معلش تعالى نتفرج على العربيه

و قعد يلف حواليها زى الديب السحلاوى و بعدين قالى خلاص انا هكلمه و ارد عليك بس السعر اللى انتا حاطه ده غالى شويع عليه اصل ميزانيته اقل من كده .... بدأت اغضب و بدا وجهى يحمر فقلت له وانا مالى و مال ميزانيته دى ورحت واخد العربيه و مشيت من غير حتى سلاموا عليكوا

و انا ماشى قلت حسبى الله و نعم الوكيل فى الحراميه دول ...

و اخدت القرار بعدم البيع لتاجر ابداااااااا حتى لو هيدفع ضعف اللى انا طالبه

**esam_comm** · 22-10-2009 05:30 PM

السلام عليكم
انا بقي حكايتي مع التجار حكايه
مره اشتريت عربيه لوالدي مرسيدس 230eمن

**slimbig** · 23-10-2009 03:00 PM

والله يا جماعه انا رأيي بلاش تعامل مع تجار خالص و ابعد عن الشر و غنيلوه, لقيت عربيه شكلها كويس خدها التوكيل أو مكان الناس تكون فيه فاهمه و ثقه و ربنا يوفقنا

**ushraf** · 23-10-2009 10:13 PM

خللوا بالكم منطقة احمد عرابي بالمهندسين من عند الشبراوي كدة وطالع ملغمة معارض من النوع دة وكذلك تجار فرداني وكذلك عند المريلاند بمصر الجديدة وجراجات كتيرة برضة في مصر الجديدة

**samehafez** · 23-10-2009 11:37 PM

انا مشكلتي اني ساكن بجوار سوق السيارات و ايام السوق لو رايح مشوار و كملت في الميثاق ... بلاقي الطريق واقف باركن ( مبحبش المشي في الزحمة ) و انزل اتفرج .... ناس كتيرة بقيت عارفها و انا كمان ناس كتيرة بقت عارفاني بس عشان انا غامض و مبكلمش حد بقلقوا مني .....لو شفت حوار بيع و شرا بقف بس ارمي ودن

اللي بيحصل هناك بجد فيه نصب كتير و النصب انواع
عندك مثلا العربيات العتيقة
رينو 5 كورولا موديل سبعينات تقريبا
الحاجات اسعارها تعبانه فالزبون مش هيدفع في الكشف عليها كتير
انا شفت واحده ارضية العربية مخرومه و بيلحموا فيها حتت حديد و بيدهنوها بلاك تقريبا و بعد كده بيغطوها بالفرش

عاوز تعرف التاجر هيعمل ايه في عربيتك او ما يشتريها منك و قبل ما يبعها للزبون القادم
لو الكاسيت بتاعك كويس هيفكه و يركب كاسيت تعبان كان فكه برضه من عربية تانيه
هيشيل الكوريك و عدة العربية من الاخر هيسيب فيها اللي ممكن يعها بيه

فيه نقط مهمة
اتاكد منها
- رقم الشاسية و الموتور اللي في العربية هم اللي علي الرخصة
اخر مرة رحت لقيت فيه واحد بيتفرج علي عربية و بيفاصل رميت ودن
لقيته طلب يشوف الرخصة و قارن رقم الموتور باللي علي الرخصة لقاه مش مطابق .... طلب ورق الموتور الجديد البائع وشه جاب الوان ملهاش ورق .... المشتري عمله فضيحه

**elshorbagy** · 23-10-2009 11:54 PM

المشاركة الأصلية كتبت بواسطة samehafez

فيه نقط مهمة
اتاكد منها
- رقم الشاسية و الموتور اللي في العربية هم اللي علي الرخصة
اخر مرة رحت لقيت فيه واحد بيتفرج علي عربية و بيفاصل رميت ودن
لقيته طلب يشوف الرخصة و قارن رقم الموتور باللي علي الرخصة لقاه مش مطابق .... طلب ورق الموتور الجديد البائع وشه جاب الوان ملهاش ورق .... المشتري عمله فضيحه

دي نقطة مهمة أوي الف شكر