الموضوع: النصابون في بيع المستعمل

يوجد بالمنتدى مواضيع مفيدة عن شراء المستعمل وطرق تفادي النصب والغش من خربي الذمم الذين يتزايد عددهم
ولذلك فقد رايت ان افتح موضوعا جديدا يتم فيه رصد هؤلاء من خلال تجارب شخصية او سمعية
بمعنى اخر وضع قائمة سوداء لهولاء سواء افراد او معارض
وسابدأ بالافراد الذين يتخذون من مسكنهم مكانا للاتجار في السيارات مستغلين رقي الحي ومدعين شغلهم لمناصب مرموقة لسبك الدور يعني بالبلدي كده بيبيع غناوة او عايز يغير للموديل الاحدث
وهذا الصنف من الناس يسكن في المهندسين او مصر الجديدة مثلا ولابد يكون عنده باكية في ا لجراج وبواب طبعا في الداخلة والخارجة يضرب له تعظيم ياباشا والكلام ده
وبيشتري عربيات مضروبة باسعار رخيصه لكن شرط الفابريكة ومش مهم الداخل فيه ايه وطبا اول حاجة بيعملها يلعب في العداد وينزل اد نصه وشويه شغل ميكي ماوس في الموتور على تدوير الكاوتش وتلميع الموتور وشوية سيليكون للتابلوه والفرش
وبعدين تتصل بيه يقول لك اعلان ايه انا مش عامل اعلان ويقفل وبعد شوية يقولك ايوة اصل صاحبي هوه اللي حط لاعلان وانا لسه بافكر عموما انا حاطط فيها سعر نهائي كذا ومش هانزل ولا تعريفة ولو عايز تشوفها اتصل بيا احدد لك ميعاد لاني مشغول جدا ونكمل بعدين لو الموضوع عجبكم

المهم صاحبنا يتاع المواعيد تتصل بيه وبعد مايحدد لك موعد تروح تشوف العربية ويقولك انا دماغي وجعتني من التليفونات وفيه واحد حيموت عليها بس عايز ينزل الف وانا مش راضي وشكله تاجر وانا مش عايز اتعامل مع تجار والدنيا بقت وحشة وعايزين يخسفوا بالعربية الارض وانا باعاملها زي بنتي ولو احتاجت حاجة بقرش باجيبلها بعشرة وانت اهوه جيت على غفلة انا لسه مغيرلها كاوتش وعفشة وفرامل في التوكيل والحاجات القديمة اهى قدامك والعربية دي غاليه عليا اوي ويقعد يوصيك عليها انك تخلي بالك منها وماتجرحش احساسها وكان يقعد يغني على الامانة والصدق وانه مرة باع عربية لواحد وبعدين حصل لها حاجة في الكاوتش فقاله عليها ونزله الفين جنية من تمنها
المفاجآت تبدا بعد الشراء: اول حاجة عليها فرق ضربية لان سيادته مرخص العربية 3 سنين قبل القانون الجديد مايتطبق
وبالتالي ماتقدرش تاخد اي بيانات للعربية الا بعد ماتسدد الفرق بالرغم من ان الترخيص محطوط في الاعتبار عند شراء العربية
العربية بدل ما تتسجل بالف جنيه اتسجلت بخمسة مثلا لان سيادته ماجابش شهادة منتج محلي ويجيبها ازاي وهيه عليها فرق ضريبة
التامين كان سنه واحدة مع ان الرخصة 3 سنين ودي ماتفهمش اتعملت ازاي
تشوف الملف بتاعها في المرور تلاقيه مطعلظ لان سيادته مش اول مالك زي ماقال
تروح التوكيل يقولك احنا ماشفناش العربية دي من ساعة اخر مالك وفيها حاجات كتير مش اصلية وشغل ميكي ماوس
الكاوتش يصوت بعد كام يوم وتكتشف ان سيادته قالب الكاوتش واول ما المهندس يركب جهاز كشف الاعطال يقولك العربية دي ماشية 220 الف مش 120 زي العداد ما بيقول