الله يكرم حضرتك على الكلام الجميل ده
بس ان للضرورة احكام
انا اليومين دول او تحديدا فى شهر 11 اللى جاى هابدأ اتعلم عشان الرخصة ... وطبعا احد الاصدقاء نصحنى بأنى اتعلم القيادة قبل شراء اى سيارة .. على اساس لو موضوع القيادة ده حسيت انه بايخ وفشلت فيه او زهقت منه يبقى خلاص مافيش داعى اشترى واكلف نفسى
قلت لنفسى خلاص اتسلى اليومين دول وشوف الاسعار ماشية ازاى خصوصا فى العربيات الشعبية المطلوبة
بالنسبة للقديم مثل
الفيات 131
المازدا 323
البيجو 504
الفيات 131 هى والمازدا 323 ...ودول موديل 1982 او 1984 اعتقد بأى حالة من الاحوال صعب انى ادفع فيهم اكثر من 22000
لأن اكثر من كده يبقى ابحث على سيارة موديل اعلى من كده
احيانا يقابلك ناس تبالغ قوى وتشوف بصراحة حالات نادرة للفيات 131 او المازدا 323 ويطلب فيها 24000 او اكثر ... لكن اعتقد انه صعب ان الواحد يدفع اكثر من 23000 حتى ولو كانت زيرو والله اعلم
اما البيجو 504 الاسد الفرنساوى العجوز ... فده حكايته حكايه ... بعد موضوع الاحلال كثير من السيارات الستيشن 7 راكب اتحولت الى ملاكى وللاسف بتتباع باسعار فعلا مغرية جدا ويوجد منها حالات ممتازة كثير لان اصحابها كانوا بيصرفوا عليها عشان بياكلوا عليها عيش ... لحد ما اتفاجأوا بموضوع الاحلال ده ... يعنى ممكن تلاقى حالات جيدة جدا بحوالى 25000 ولا تزيد عن 30000
حتى البيجو 504 الصالون المفروض لا يزيد ثمنها للحالات الجيدة منها عن 32000
للاسف فى السوق الموجود فى العاشر المبالغة الكبيرة جدا فى الاسعار بيطلبوا فيها 36000 و 40000 الف طبعا صعب قوى
لكن الشهادة السيارة دى الوحيدة اللى يظهر عليها اى تضبيط بسرعة وطبعا ده الاسد الفرنساوى مهما كان
فيه بعض الاصدقاء بيقولوا انه ممكن تلاقى حالات واقفة على حيلها بسعر 25000 وبعض الاصدقاء بيقولوا صعب انك تلاقى سيارة بيجو 504 بسعر 25000 وتكون حالتها جيدة وموش محتاجة مصاريف
عشان كده اعتقد ان السيارة البيجو 504 المعقولة وحالتها جيدة المفروض تكون فى حدود 28000 جنيه والله اعلم ودى موديل 1978 او 1979
طبعا يوجد الكثير يفضل انه يبعد عن موديلات الثمانينات ويعلى شوية بالموديل وينصح بشراء سيارة لادا 2107 وبحالة جيدة جدا و موديل تسعينات كمان فى حدود 20000 الف جنيه ... والبعض الآخر ينصح بأنك تلعب تمارين رياضية قبل شراء اللادا عشان خشنة شوية
والآخر يفضل السباحة ضد التيار ويرشح لك سيارة بحالة ممتاز ماركة "بولونيز" ... وموديل حديث .. ولقته ... لان كثير من اصحابها يركنها ويركب حاجة غيرها ده طبعا بمجرد انه يصطدم فيها
حتى السيارة الشعبية فيات 128 ... وبرغم ان الكثير من الاصدقاء يوصفها بأنها صديقة الميكانيكى ... والبعض يوصفها بأنها صديقة كل الميكانيكية .. إلا ان الكثير يفضل شراءها لرخص قطع غيارها وموجودة عند البقال زى ما بيقولوا لكن الغريب هو سعرها يعنى معقولة سيارة 128 موديل 1997 تتباع بأكثر من 22000 الف جنيه صعب شوية والله اعلم
يتبقى عندنا السيارات الاكثر طلب مثل
السوزوكى سويفت
الكيا برايد
ديهاتسو شاريد
سكودا فلاشيا
ودول تقريبا المفروض لا يزيد ثمنهم عن 28000 الف جنيه ويمكن يقلوا كمان لو كان ما فيش كماليات ... لكن الغريب هو ان الكثير اول كلامه يطلب اكثر من 32000 الف جنيه برغم انهم موديل تقريبا 1997 اعتقد انه كثير قوى
اكثر من 30000 الف يبقى دخلنا فى شريحة ثانية مثل اللانوس وخلافه وده الشىء اللى لا احاول القراءة فيه عشان ما اتعبش قوى
اتمنى انى ما كونش قلت حاجة غلط "ما عدا السهو او الخطأ" ...
مع اطيب التمنيات
اخوكم حسين غزالة
المفضلات