افتي !!

**Nader** · 13-11-2007 07:45 PM

شعب فتاى

احنا ليه شعب فتاى عامل نفسه عارف كل حاجة

اقروا معايا القصة:

1- الجار
لا لا لا ما دام الشكمان اتخرم يبقى لازم تروح عند فلان احسن واحد بتاع شكمانات !!! ده لحام يا حاج
لا لا لا بس هو مش اى واحد وثانيا ممكن تروح عند حد تانى يبوظهولك !!!

2- بتاع الشكمانات
بص يا بيه المصفى لازم تتشال ويتحط مكانها ماسورة لانها هتحك كتير وكل مرة هتتخرم ( الجار يؤيد وبشدة) والمناسبة المصفى لم تكن السبب من الاساس

3-العربية تعطل واحد من المارة لازم توديها عند أقرب ميكانيكى علشان الماتور جاب طحينة ( نعم يا روح طنط ) قصدى الزيت جه على الماية يعنى من الاخر وش سلندر

3- عند الميكانيكى العربية دى موتور كمبيوتر وحساسات اشتغلت فيها قبل كده ياسطى
الميكانيكى بثقة انا بعون الله ......................................الخ

4-ميكانيكى خلص والعربية سخنت تانى طب ايه السبب روح لبتاع الشكمانات (واحد تانى غير الاولانى ) ايه الموضوع يا عم الحاج لا بسيطة الشكمان اتسد وباظ خالص ولازم يتغير !!!!!!

5-ارجع للميكانيكى تانى لمبة الزيت بتنور ليه يا عم الحاج لا لا بسيطة مفيهاش حاجة دى ( الموتور كان هيقفش بس ربنا ستر ) .

6- روحت لميكانيكى تانى ( المفروض انه تخصص ) عمل العربية وظبطت شوية ونقطت زيت رجعتله تانى قال سورى عيب ميكانيكى

7- أخيرا روحت لكهربائى علشان اظبط العربية على الكمبيوتر بعد العك ده كله قاللى انا سف مشتغلتش فى العربية دى قبل كده ولانه ما فتاش زى بقيت اللى فتوا انا صممت ان هو اللى يعمل الكهرباء

الراسل:
مواطن مصرى مغلوب على امره حسبى الله ونعم الوكيل

ده مثال بسيط و اعتقد ان الكلام ده بيحصل عندنا فى مصر كتير ولا انا غلطان ؟

**CryptonX** · 13-11-2007 07:57 PM

باشا !
لآ ده مش الشكمان .. دي علبة التروس ! :D

**Casio2000** · 13-11-2007 10:43 PM

واحد صاحبي: العربية في مطلع عالي جابت ماتور
أنا : همممم ..... العربيات بتجيب ماتور ازاي ؟ يعني ايه اللي بيحصلها
صاحبي اللي في أول سطر دا: ..............................
.................. ( لسه ماشرحليش لحد دلوقتي) :-)

خدوا بالكوا دا المفروض بيحكيلي على حاجة حصلتلوا هوا - بس ماتوقعش اني اركز و اسأله :?:

**Mostafa** · 14-11-2007 01:52 AM

عادى يا رجاله انا مره دفعت 100 جنيه عشان اركب سير كاتينه فى العربيه السيينا و بعدين 100 جنيه تانى لواحد تانى عشان يصلح اللى بوظه الاولانى وبعدين 50 لواحد تالت عشان العربيه طلعت دخان لما ظبتها التانى وبعدين التوكيل اخد 200 جنيه عشان يصلح اللى هما التلاته خربوه . لعنه الله عليهم جميعا

**Hisham_ElFeky** · 14-11-2007 02:11 AM

انا كنت باللادا في الحرفيين وقطعت معايا وانا بصراحه معنديش فكره بصراحه في الميكانيكا ووقعت في ايد من لا يرحم من العينه دي برضو
غيرت طلمبة البنزين وبيك السالنسيه والدينامو والبوچيهات وفي الاخر ما داريتش في الاخر حجته الكاربتير عايز يتفور روحنا للكاربيتير ظبطة فل وبرضو مش بتدور من الساعة ١٠ الصبح لغاية ١ بالليل ...لغاية معرفت اوصل للمكانيكي بتاعها وجبته بتاكسي من شبرا طلع العيب في الاخر عمود تافه بين طلمبه البنزين والموتور نقص ٥مم بالظبط خلي الموتور ما بيسلمش للطلمبه ضخ البنزين فبيقطع بنزين زودته عند خراط بـ ٥ جنيه العربية بقت فل بعد العذاب والضنا والــ ٥٠٠ جنيه اللي طاروا في الفتي

**Heshaam** · 14-11-2007 03:18 AM

المشكلة إن اللي مبيعرفش حاجة مبيقولش معرفش - بيحس إنها مسألة كرامة مش عارف ليه

**د.محمود صلاح** · 14-11-2007 04:32 AM

المشاركة الأصلية كتبت بواسطة Mostafa

عادى يا رجاله انا مره دفعت 100 جنيه عشان اركب سير كاتينه فى العربيه السيينا و بعدين 100 جنيه تانى لواحد تانى عشان يصلح اللى بوظه الاولانى وبعدين 50 لواحد تالت عشان العربيه طلعت دخان لما ظبتها التانى وبعدين التوكيل اخد 200 جنيه عشان يصلح اللى هما التلاته خربوه . لعنه الله عليهم جميعا

:-)

**MMamdouh** · 14-11-2007 12:18 PM

ازاى يقمل معرفش؟؟ دى تبقى عيبة و مصيبة و جرسة ما بعدها جرسة

تخيلوا شعب مبقولش معرفش و فهلوى... يبقى اكيد الناتج كارثة

عشان كدة انا بحب افهم كل حاجة بنفسى و اسال ناس اثق فيها الاول قبل ما اروح لواحد صنايعى يعمل عليا افلام و لو اضطرتنى الظروف و اروح لحد بسالة الاول عن المشكلة و اعمل انى عبيط مفهمش وش السلندر من كوز الدرة و اشوفة حيرد يقول ايه... لو افلم عليا و حب يعمل صايع اعرف انه نصاب و اسيبة و امشى اما لو كلامة منطقى و عقلانى و دخل فيه "حنشوف المشكلة فين لانها متبنش على الواقف" اعرف انه بيفهم و حيدور على المشكلة قبل ما يقول المشكلة ايه

قصة حصلت مع منصور بتاع الBMW

واحد صاحبى معاه E36 كان عندة تنتيشة لما تكبس للعربية فا سال مين احسن واحد بتاع BMW قالولة منصور... الراجل مكدبش خبر و راحلة و شرحلة القصة قالة دى سلوك بوجيهات (منصور مقمش من على الكرسى اصلا يكشف على العربية) و لان صاحبى راجل محترم صدق الكلام و جاب طقم سلوك بوجيهات ب 460 جنية من غرارة و بعد التركيب لقى العيب هو هو

طبعا الراجل رجع لغرارة و الحمد لله عرف يرجع السلوك و بعدين رجع لمنصور و حكاله القصة قالة كدة تبقى رشاشات (برضة ما قمش يكشف على العربية) و لما صاحبى سال على الرشاشات قالولة ب 1800 جنية الطقم :|

صاحبى خاف يخاطر ب 1800 جنية خصوصا ان الرشاشات مش حترجع للبياع زى السلوك فا كلمنى فى التليفون و شرحلى القصة... المهم اخدتة لواحد معرفة فى الحرفيين بيبيع قطع غيار BMW استيراد على اساس نجرب من عنده القطع اللى شاكين فيها قبل ما نشترى 100 قطعة غيار على الفاضى... المهم غيرنا اير ماس و بوبينة و مفيش فايدة فا صاحبى دة وصفلنا ميكانيكى فى الكيلو 4.5 و رحنالة

الراجل فى مكان اى كلام و رشة صغيرة كدة متقولش انه بيعرف اى حاجة بس الصراحة الراجل شغلة زى الفل... الاول سالنا ايه المشكلة و بعدين شافها بنفسة و قعد يدور على تسريب فى المنافول و اى مشكلة فى الضفيرة بتاع ساعة ملقاش حاجة... فى الاخر قال دى اما تاكيهات او رشاشات فا اتفقنا اننا نجيب طقم رشاشات استيراد من صاحبنا نجرب بيهم تانى يوم الصبح و نشوف (الميكانيكى مكنش عايز ياخد اى فلوس منا قبل ما نمشى لانة شايف انة معملش حاجة)

المهم رحنالة تانى يوم الصبح و معانا طقم رشاشات و اول ما غيرناه العربية فاقت و اتظبطت و اخد الراجل 30 جنية تغيير... يعنى الراجل اللى مشهور بالاسم و معرف مكلفش خاطرة يبص على العربية و التانى اللى مرمى فى خرم ابرة قعد ساعة يدور عشان ميفتيش... لنا الله

MMamdouh