الموضوع: أخدت مخالفة على الصبح .. وعاوز استشارتكم

المشاركة الأصلية كتبت بواسطة ahmediz2000

وانا جاى الشغل النهاردة الصبح ماشى من شارع المطرية رايح على ميدان السواح ( للى عارف المنطقة دى ) فيه بنزينة على اول الشارع وادامها يوتيرن فأنا دخلت على البنزينة علشان اطلع منها ادخل على اليوتيرن بدل ..باختصر يعنى بدل ما امشى لقدام واخد اليوتيرن البعيد .. المهم طلعت من البنزينة وقطعت الطريق ودخلت على اليوتيرن ..واذا بالقدر يستوقفنى رخصك لو سمحت ... واقف على جنب

المشاركة الأصلية كتبت بواسطة ahmediz2000

علبال ما ركنت ورحتله كان كتب نص المخالفة ..مخالفة سير عكس الطريق .. انا عارف انى غلطان على فكرة وخلاص اللى حصل حصل ..مع انى انا ما مشيتش عكس الاتجاه كل اللى عملته انى خطفت حتة صغيرة علشان اخد اليوتيرن بعد ما تأكدت ان مفيش عربيات جاية ..

المهم الراجل بيقولى المخالفة 1200 واحدة عليك وواحدة على العربية .. ومش عارف ايه كده 4 شهور ... الكلام ده مظبوط .. هدفع 1200 علشان عديت يوتيرن .. يا نهار .. دلونى يا جماعة بالله عليكم الكلام ده مضبوط ولا كان بيقولى كده علشان اطلعله اديله حاجة ... ومحدش يقولى كنت اغمزه بقرشين .. انا ما بحبش كده ولا اعرف اعمل كده

بس ياشا انا لسه حاصل معايا نفس اللي حصل معاك والرخصه بتاعتي لسه في القسم والمفروض اني حتعرض علي النيابه بكره وقالولي ان الغرامه دي ممكن حد يتوسطلك وتبقي 100 جنيه بدل الالف ودعواتك معايا وربنا معاك
بس كل حاجه بالكوسه بتمشي علي راي اللي قال لو النيل بقي صلصه مش هيكفي الكوسه اللي في مصر
اللون الاحمر مخصص للمداخلات الاشرافيه فقط
مشرف عام 3

بجد دة استعباط يعني سايبين الطرق السريعة اللي النقل فيها بيمشي معاكس و جيين يتشطروا على الغلابة اللي في الشوارع الصغيرة

من 8 او 9 شهور كان معيا موتسيكل صينى
وكنت عايز الف يوترن قبل ما ادخل على الجراج الى فى جسر السويس طبعا مشهورة الحتة دى
وطبعا عشان اليوترن بعيد جدا والدنيا زحمة كعادة فى الحتة دى اختصرت
واخدت يوترن عكس وفجاة القى فى وشى ظابط وكان معيا يجى 3 او 4 عربيات ماشين بنفس السستيم
وهات يا سيدى الرخصتين وطبعا مقدرش اتكلم ولا كلمة لانى متلبس
واخدت مخلفتين واحدة 1100 على رخصتى وواحدة 1600 على الموتسيكل
والله العظيم باعت الموتسيكل وحطيت 200 جنية من معيا عشان ادفع المخالفات
لان يا الدفع يا الحبس واعتبرت ان الموتسيكل اتسرق او حاجة وقولت الحمدلله
بس من يومها عمرى ما افكر اخد اى يو ترن عكس

يا جماعة، هو مفيش حد عارف القانون خالص ولا ايه ؟؟؟ محدش فيكم يعرف ان مش من حق اي حد غير الظابط يطلب رخصك ؟؟ حتي امين الشرطة ما يقدرش يطلب الرخص الا اذا كان برفقة ظابط، هما للاسف بيستغلوا جهل الناس بالقانون علشان يقلبوا عيشهم، بس كذا مرة كان يوقفني امين شرطة و يقولي رخصك، اقوله معاك ظابط، يتلجلج و يفهم انا قصدي ايه، و يقولي ما الظابط جاي في الطريق، اقوله لما يبقي ييجي يا حبيبي، انت كبيرك تاخد النمرة، و دايما بمشي بعدها، مفيش غير مرة واحدة امين الشرطة اتصل بالظابط علي اللاسلكي و جابه (الظاهر كان قريب من المكان) بس الحمدلله كنت محضرله عميد شرطة علي الموبيل و مشيت برضه