الموضوع: اكبر تعديل لسكودا فيفوريت

السلام عليكوم ورحمه الله و بركاته

من حوالي سنه و انا كنت بفكر في تعديل سكودا فيفورت
و الفكره جالتلي ان العربيه ديه كنت بعشقها و فكره بيعها مرفوضه نهائي بالنسبه ليا
بدأت اخش على النت و ادور لان احسن تعديل اتعمل لسكودا فيفوريت هو بتسقيط مكنه 1.6 MPI
كامه واحده و دي اصلا بتنزل على الفيليشا و سيات ابيزا و البولو
عملت مناقشات كتييييييييييييير مع ناس كتير جدا مهندسين ميكانيكا و ميكانيكيين و تجار استيراد و اللي عندهم معرفه كبيره جدا عكس ما كنت متخيل
المهم الموضوع استقر على مكنتين يا اما 1.6 MPI و دي حتخليني امتلك اسرع سكودا فيفوريت لان ده اقصى تعديل حصلها على النت يعني ممكن حد يكون عمل حاجه اكتر و منتشرتش
او مكنه 1.8 BB بتاعه الجولف 2 و دي حتخليني امتلك سياره الاكسليراشن بتاعها لحد 100 اقل من 10 ثواني ممكن 8 ثواني مثلا
بحثت في الاتجاهين اكتشفت ان المكنه BB صعب تسقيطها و حتبقى محتاجه تعديلات كتير و متاعب و مصاريف كتير انا في غنى عنها
و استقؤيت نهائيا على المكنه MPI
بدأت ادور في السوق نزلت الحرفيين اكتر من مره اكتشفت ان معظم اللي فيها جاهلين شغالين بالفهلوه
منساش واحد بتاع جولف تقريبا اسمه سيد جولف حلف بان التجربه بتاعتي ستفشل المهم
قعدت ادور على المكنه للاسف مفيش مكان عنده المكنه كامله و اللي اكتشفته بعد كده ان المكنه لازم تتجاب في نص مش محطوطه على الرصيف لان المكنه مزوده بامبوليزر جوا التابلوه طبعا
و ده اللي محدش يعرفه خالص من تجار الاستيراد و لا الميكانيكيه بذات نفسيهم
ربنا وفقني و لقين نص فيليشيا امامي بالكامل مواصفات اوروبيه (مكنه 1.6-باور- تكييف-ABS-AIR BAG )
للاسف اتحرمت من نعمه ABS لان العفشه بتاعت النص كانت متباعه و ملقتس الحساسات
المهم
اشتريت الاتي من الراجل
الموتور كاملا بدوره التكييف بدوره التبريد كاملا بدوره الباور بالاسكترا الباور بالضفيره طبعا بتاعت العربيه بالكامل مش الموتور بس بتنك بطلمبه كهربا بتاعه المكنه بالتابلوه و الكنسوله و القضمه
و الشداد الاسفل للسياره تحت الموتور اللي بيتركب فيه المقصات و عفشه العربيه بالكامل
من الاخر اخدت كل اللي في النص ب 7.25 الف جنيه
فكره تركيبه في القاهره كانت صعبه لان انا اصلا من الزقازيق حودي النص للقاهره يفكوا فيه و بعد كده حجيبه غير ان انا مش حقدر اتابع عليهم
فقررت و كان الموضوع مجازفه ان اسقط المكنه في الزقازيق عندنا و اتابعهم خصوصا ان المكنه انجكشن مش كبراتير يعني اي غلطه في كهربه العربيه انسى انها تدور و حنلف حوالين نفسينا
الحمد لله المكنه اتسقطت في اسبوع بحرفيه شديده شغل الكهربا اخد اسبوع اخر و تفنيش العربيه حصل في حوالي شهر متابعه مستمره للعربيه و المكنه
الحمد لله ان اللي خلا الموضوع ينجح ان اشتريت نص كامل و حطيت جنب عربيتي المسمار اللي يتفك في النص يتركب في عربيتي
الحمد لله العربيه دلوقتي اتعدلت مواصفاتها تقريبا اعلى مواصفات على مستوى العالم الحمد لله
1.6 و تكييف و باور و زجاج كهربا و ايرباج لا يعمل
الكهربائي اخد 500 و الميكانيكي 500 و تسقيط المكنه كلفني 300
دا غير المتابعه و روحت بيها التوكيل و اشتريت ليها بوجيهات جديده و فلاتر و غسله نضيفه اوي
الموضوع قفل 10 الاف جنيه

انا متاكد ان فيه ناس كتير حتقول حرام المبلغ اللي دقعته في العربيه
انا اول حاجه العربيه بتعمل حوالي 25 الف جنيه و العربيه الحمد لله جامده و متابعها و زي الفل و حماله اسيه
لما حطيت 10 بقت مكلفاني 35 الف جنيه
فين العربيه في مصر المستعمله كويس و عارف انها مش متهانه و الماني و 1.6 بتكييف و باور
و تمنها 35 الف جنيه
دا طبعا غير قيمه العربيه بالنسبه ليا زكريات بقى و الحاجات ديه

بالنسبه للصور حرفعها بليل باذن الله
و نصيحتي لاي حد حيحاول يسقط المكنه انه يجبها في نص مش مرميه على الارض
غير ان لاصحاب الفيلشيا الموضوع بالنسبه ليهم حيبقى موفر اكتر مني بكتير

صور للتنك القديم و التنك الجديد علشان طلمبه الكهربا






و دي بعد تسقيط المكنه الحمد لله










و ده الشكل النهائي اللي حيبقى عليه العربيه طبعا بعد ما تخلص عند بتاع الدوكو حعمل موضوع بصور العربيه قبل و بعد التعديل