هو احنا ليه بنحب عربيتنا قوى كده ؟؟؟؟!!!!

سؤال احب اطرحه عليكم ....

هو احنا ليه بنحب عربيتنا قوى كده ؟؟؟؟!!!! وكل واحد بيستميت فى الدفاع عن عربيته

ويزعل قوى لو حد قال عليها حاجة وحشة (سواء صح اوغلط) وحتى الناس تدخل فى نقاشات

ممكن تؤدى لخناقات :khd: , شوف كمان توقيع البعض ... اوبتراوى على طول ,تيوتاوى الى الابد ...الخ

مع ان العربيات جماد... ليه ما بنتعاملش معاها زى الجمادات الاخرى ؟ يعنى ماشوفتش حد بيحب تلاجته

مثلا ولا التلفزيون بتاعه وبيدافع عنه... ولا واحد كاتب توشيباوى الى الابد , او شارب على طول !!!!!!! :Oc_sun1[1]:

انا عن نفسى ما عنديش اجابة - شركونا برأيكم:U_thin1[1]:

الشعب المصرى له بعض الخصائصمنها التدين . العاطفية فو يحب كل ما يملك حتى لو كانت مش عجبه الناس يعنى ابويا متمسك بالعربية125 لدرجة اننا بنحس انها اختنا التى لم تلدها امى

اقتباس:

---

المشاركة الأصلية كتبت بواسطة aymansaad

الشعب المصرى له بعض الخصائصمنها التدين . العاطفية فو يحب كل ما يملك حتى لو كانت مش عجبه الناس يعنى ابويا متمسك بالعربية125 لدرجة اننا بنحس انها اختنا التى لم تلدها امى

---

إحنا بقى بنحس إن ال 127 دي مرات أبونا !!!

لإرتباط الناس دايما بمبدأ ان لبسك وشكلك والاجهزه اللى بتستخدمها وكل الرفاهيه اللى حواليك بتعبر عن تميزك

فطبيعى لما يكون حد دافع فى عربيه مبلغ متين سواء طلعت كويسه او حتى مش عجباه ومطلعه عينه تلاقيه بيشكر فيها وبيدافع عنها بأستماته علشان هى احد اسباب وجاهته اللى مستحيل حد يقرب منها ويطعن فى تميزها

هنا هتلاقى مفيش شارب على طول علشان الاهتمام هنا سيارات لكن والله انا شوفت ياما مقارنات من نوعيه لا سيبك انت مفيش احسن من الموبايلات النوكيا السونى والحاجات دى اساسا فرز تانى وبرده اللاب توب والتلفزيونات وكل حاجه تقريبا

الخلاصه زى ما حضرتك قولت ياريت بجد نؤمن تماما ان العربيه سلعه زى اى سلعه اشتريتها وطلعت تمام يبقى خير لو مطلعتش حلوه يبقى ياريت احذر غيرى بعيوبها وبلاش الرغبه القاتله فى اثبات انى عمرى ما اضحك على فى حاجه ولا جبت حاجه معيوبه

دلوقتى للأسف من كتر ما كل الناس بتشكر فى عربياتها حتى الناس الثقه لما بتشكر فى عربيه بيبقى كلامهم مشكوك فيه

من كام شوفت اخ كريم بيحذر احد السائلين فى المنتدى من امتلاك نفس موديل عربيته وانها مليانه عيوب كنت والله عايز اشيله فوق دماغى واقوله انت راجل محترم

بسم الله الرحمن الرحيم

شوف انا هاقول لحضرتك حاجة
الناس بتحب العربيات لأنها جماد بس غالي وبعض العربيات بتمن شقة دلوقت وطبيعي برضه كل واحد بيعتز ببيته لأن كل واحد بيحب شقته اللي تعب في تمنها
فلا يمكن اننا نقارن العربيات بالتلاجة والتليفزيون
رغم اني هاقول لحضرتك حاجة وياريت تجربها
افتح موضوع كدا وسط اصحابك انك عاوز مثلا تجيب ثلاجة جديدة هاتلاقي الكل بيشكر في التلاجة اللي عندهم في البيت وياسلام لو كان هو اللي منقيها تبقى طبعا احسن حاجة
ونرجع تاني للعربيات
انا مش قادر انسى موضوع كان موجود زمان اول مادخلت المنتدى عن العربيات العالية في مصر اللي مابتكلش مطبات
وخد عندك بسم الله ماشاء الله طلعت كل العربيات اللي ماشية في مصر عالية جدا وناقص تعدي من فوق جبل المقطم من غير ماتلمسه
كل واحد كتب ان عربيته مابتاكلش مطبات خالص وبتبقى محملة والشنطة مليانة و ..و .....

غالبا نوع العربية بيكون جزء من شخصية الإنسان وطبعا جزء كبير من فلوسه
فلازم كل واحد يدافع عن شخصيته وقراراته الصائبة انه اشترى عربية معينة او انهم في البيت لسة محتفظين بعربية معينة
وبالنسبة للفلوس لازم طبعا كل واحد يثبت للناس او على الأقل بينه وبين نفسه ان تمن العربية اللي دفعه او القسط اللي قاطم وسطه اول كل شهر مش خسارة في العربية دي كنوع من ارضاء الذات

وشكرا

هى دى طبيعتنا مع أمتلاكنا لشىء
وبالذات لما يكون فيه نقاش وأختلاف حواليه

أمال ليه المصريين أساتذه فى أختراع الأمثال الشعبيه

فعندنا على سبيل المثال لا الحصر وفى نفس المضمار أمثله بتدلل على تمسك وأفتخار الأنسان بأملاكه

1- القرد فى عين أمه غزال
2- خنفسه شافت ولادها على الحيط .....قالت دا لولى مرصوص فى خيط

هههههههههه

اقتباس:

---

2- خنفسه شافت ولادها على الحيط .....قالت دا لولى مرصوص فى خيط

---

ههههههههههههههههههههههههه ههههههههههههههههه


العربيييييييييييه = لحظات حلوه .. لحظات حرجه .. عشره .. كتير مننا بيقضى وقت فى عربيتو اكتر من اللى بيقضيه فى بيتهم

خلاص بتبقى عربيتك جزء منك .. كفايه الذكريات جواها

اصل الواحد عشان يجيب تلاجه او موبايل او لاب توب او اواواو .....هيفكر فيها قد ايه عشان يجيبها؟
انما العربيه فهي تحويشة العمر فبتاخد وقت اطول وتسال كل واحد وكل واحد اشتري عربية قبلك فاهم انها الافضل والا كان جابها ليه ولو كان جابها وطلعت وحشة مش هيقول لانه هيبقي شايف ان العيب منه عشان جابها وحشة
وبكدة متلاقيش ناس كتير بتقول ان الحاجة اللي جايباها وحشة.
بس في حاجة لازم الناس تاخد بالها منها عند شراء اي حاجه وهي انك تعرف من اللي حولك ان كان الحاجة ده تناسبك ولا لأ مش تسأله وتقوله (هي الحاجة ده كويسة ولالأ؟(
كل واحد وفي حاجة تناسبه ممكن متناسبش غيره
يعني مثلا لو بتجيب موبايل وعايز تعرف ايه الانسب لك هتروح تسال البياع هيقولك الموبايل كذا هو الافضل وبعد ماتجيب هتلاقي انه فيه كاميرا انت مش محتاجها لان عنك كاميرا ديجيتال ممكن تغنيك عنها . وتلاقي فيها wireless lan وانت معاك لاب توب بتتحرك بيه يعني مالهاش فايدة يبقي انت دفعت تمن حاجات مش عايزها.
وبرده نفس الكلام في العربيات
انت عايز عربيه تكون ثابته وموتورها جيد وتسأل اي حد ويكون معاه عربية مش بالمواصفات اللي تناسبك وهيقولك انها افضل عربية في حين انه ممكن يكون بيستعملها داخل البلد ومش واخد باله من عيوب الثبات.
تعرف منين ان اللي قدامك بيفيدك؟
لما يقولك كل حاجة عن العربية عيوب ومميزات ومن خلالها تعرف ان كانت تناسبك او لا
والكلام ده في كل حاجة مش العربيات بس
بس في الاخر لازم تعرف هو ايه اللي يناسبك .
اسف علي الاطالة.

...لان العربية ببساطة هيا بيتك التانى لو حسبتها هتلاقيك عاينلها مصاريفها وبتقعد فيها فترة ممكن توازى قعدتك فى البت...
+ دة كلة وانتا متابع اخبارها واخبار العربيات هنا على المنتدى الى بقى ادمان لناس كتيررررر........

.....انا ن نفسى مسميها وبكلمها كمان احيانا لما تنقذنى من مواقف او حاجة ....والله واحيانا لما بكون مخنوق ومبقالى كتير منزلتش من البيت بنزل افتح الكسيت وبقعد فيها .........:):):)

و بعد الدفاع المستميت ده و الخناقات الطوووووويلة دى , اول لما واحد يغير عربيته بعربية احسن يقعد يشتم فى عربيته القديمة او يقلل منها ...

المصريين عربياتهم كانها شرفهم بالظبط , لما حد يقول العربية الفلانية مش عجبانى يبقي كده غلط غلطة عمره ..

بس انا ملاحظة ان الحب الكبييييييييير ده شوية مقصور عند الرجال نادر لما تلاقى واحدة ست تقول عربيتى حبيبتى كبيرها زقزوق او اى اسم دلع لكن هنا فى المنتدى انا قريت كل كلمات والقاب الحب من الاعضاء الرجالة لعربياتهم ههههههه

عشان تلاقى تفسير بص للنظريه الكوسه والمحسوبيه هيه ومشكله الى انت بتطرحها وجهين لعمله واحده
كل واحد بيدافع ع اى حاجه ليها علاقه بيه وحشه حلوه القرد فى عين امه غزال وعجبى عشان كده انا بقرا الى بيعجبنى واسيب كل الى الاراء ديما سلبيه لان غالبا الى بيقولها بيبقى مش فاهم حاجه

في عوامل كتير اوي بتخلي الشخص يحب عربيته بشكل خاص وأشياء اخرى بشكل عام
زي مثلا الراحه العربيه بتوفر راحه للشخص اللي راكبها
وبيقضي بيها احتياجاتو وبيطلع بيها وفيها طاقتو وبيشوف معاها ايام حلوه ومره
يبقى ازاي ميحبش عربيته
انا عن نفسي لسا مستلم وحابب عربيتي اوي

هو الموضوع ببساطة .. ان الواحد بيبقى دفع دم قلبه فى العربية و تعب عقبال مجبها ..

فلما واحد يجى يتكلم على عيب فيها .. بيبقى زعلان اوى و حاسس انه رمى فلوسه فى الارض

عشان كدة بيحاول يدافع عنها باستماتة عشان يقنع نفسه انه اختار الاختيار الافضل

انما هى مفيهاش شعب مصرى و مش شعب مصرى .. دى حاجة فى الدنيا كلها

طبعا لازم ادافع عن عربيتى......لكن مش هزودها......مش هقول حاجه مش فيها ...مش هضلل حد بيسأل على عيوبها....

العربيه ...حاجه...زى أى حاجه...بس بيبقى فى ارتباط عاطفى بينك وبينها....

مش ارتباط عاطفى يعنى حضرتك هتخطبها على العيد...لأ....
انا لما بسيب العربيه وبركب المواصلات واعرف النعمه اللى انا فيها...بحمد ربنا على نعمته ومقدرش انكر الامتنان للوسيله اللى ربنا يسرهالى ووفرت عليا التعب والمشاكل....

العربيه مش بس وسيله انتقال....ما التاكسى وسيله انتقال...

بس تعالى انزل الساعه واحده ولا اتنين صباحا وحاول توقف تاكسى...

انا جربتها ونزلت الساعه واحده صباحا بهدوم النوم وبوقف تاكسى عشان جالى تليفون فيه خراب بيوت لو موصلتش المطار قبل ميعاد الطياره...سواق التاكسى ولا همه انا مين ولا نازل باللبس ده دلوقتى ليه وفضل يفاصلنى على الاجره والكارته وانه هيرجع فاضى .....فى الوقت ده نعرف ان العربيه أه حاجه ...لكن حاجه مهمه...!!

انا بحب عربيتى عشان بقضى فيها فعلا وقت اكتر ما بقضى وقت فى البيت

بحب عربيتى عشان مريحانى من المواصلات ، وعشان بدل ما كنت زمان بشيل هم التاكسى و انى مش هلاقى تاكسى يودينى المشوار الفلانى دلوقتى عربيتى بروح بيها اى حتة انا عايزاها

بحب عربيتى عشان فيها ذكريات ايام و مواقف كتير حلوة

بحب عربيتى عشان بقت حاجة مهمة اوى فى حياتى و مقدرش استغنى عنها

بحب عربيتى عشان لما بتخنق بنزل الف بيها ، و بنسى اللى كان مضايقنى و افتح الكاسيت و اسمع حاجة هادية بتبسط اوى

بس مع كل ده اللى بيسأل عنها بقول مميزاتها و عيوبها ، مش متعصبة لعربيتى اوى يعنى و لا بقول عنها انها طيارة ولا انها تحفة و وهمية و احلى عربية فى الدنيا

أنا بحب عربيتي جداً ... لكن عمري ما أتحمق عشانها ولا أقعد أتخانق عشان واحد بيقول عليها ثباتها وحش

أكيد طبعاً مفيش عربية كاملة ، والكمال لله وحده

بس أنا لو لقيت عيب في عربيتي أحاول أتغلب عليه ، ولو منفعش أتعايش معاه ، ومحطش عربيتي في اختبار هيا مش قده

يعني لو العربية ثباتها وحش ممشيش بيها على 140

انا اكتر حاجة اكرهها هو موضوع الدفاع عن العربية وعلشان كده برده ما بحبش اخش قسم المقارنات بالمنتدي .
لكن برد في حالة واحدة لما حد يكتب معلومة مغلوطة والناس تصدقها وسواء اللى انا رديت عليه اقتنع او ما اقتنعش ما بطولش معاه في الموضوع والرد لأن انا مش هاستفيد حاجة من اننا نقضي الوضوع ردود ودفاع عن العربية (ما هوصانع العربية لا هو ابويا او امي علشان ادافع عنه) وممكن يوصل الموضوع لأهانات وشخصنة ويتقفل الموضوع في الأخر.
وقيل لأحد الأئمة(اظنه الأمام احمد)تسعة اعشار الراحة في التغافل
فقال:كلها في التغافل.
كان في برده بحث كان منشور في احدي الصحف علي موضوعنا ده وكان خلاصته ان العربية تعبر عن الرجل بينما المطبخ يعبر عن المرأة.

اقتباس:

---

المشاركة الأصلية كتبت بواسطة ahmed_su

سؤال احب اطرحه عليكم ....

هو احنا ليه بنحب عربيتنا قوى كده ؟؟؟؟!!!! وكل واحد بيستميت فى الدفاع عن عربيته

ويزعل قوى لو حد قال عليها حاجة وحشة (سواء صح اوغلط) وحتى الناس تدخل فى نقاشات

ممكن تؤدى لخناقات :khd: , شوف كمان توقيع البعض ... اوبتراوى على طول ,تيوتاوى الى الابد ...الخ

مع ان العربيات جماد... ليه ما بنتعاملش معاها زى الجمادات الاخرى ؟ يعنى ماشوفتش حد بيحب تلاجته

مثلا ولا التلفزيون بتاعه وبيدافع عنه... ولا واحد كاتب توشيباوى الى الابد , او شارب على طول !!!!!!! :oc_sun1[1]:

انا عن نفسى ما عنديش اجابة - شركونا برأيكم:u_thin1[1]:

---

1- ليه كل واحد بيحب عربيته؟ امال هو جابها ليه لأنها عجبته وابهرته وبعد ماجبها لقاها كويسة وابتدت يبقى ليها ذكريات و مواقف حلوة وصعبة فلازم يرتبط بيها او يحبها وممكن لما ييجى يبيعها تبقى صعبة اوى على نفسه.

2- ليه بيدافع عنها؟ دى لأسباب كتيرة منها ان عربيتك هى فكرتك واختيارك وبالتالى انت بتدافع عن نفسك مش عن عربيتك. ومنها انك بتحبها واى حد بيحب حاجة ولو جماد لازم يدافع عنها .

3- ليه بيزعل اوى لما حد بيقول عليها حاجة وحشة وممكن تبقى خناقة؟ لأن مشكلتنا هى الفتى والاشاعات واى حد وممكن تلاقيه اخره ميكروباص وعمره مبيركب حتى تاكسى داخل يشتم فى عربيتك ويقول عليها اى كلام!! ولأن فيه مننا ناس معندهاش ضمير وممكن حد تلاقيه بيذم فى عربية او ماركة معينة وعمال على بطال لمصلحة ماركة تانية هوا بيقبض من توكيلها! ولأن بعض الناس وهيا بتدافع عن اختياراتها وعربياتها بيحطوا عربيتك فى مقارناتهم وممكن يقولوا كام حاجة مش صح على عربيتك بس بدون نية سيئة ولكن ده رأيهم وعلشان كده دايما انا افضل اقول "رأيى الشخصى" او "بناءا على تجربتى الشخصية" ا لأن الاراء الشخصية بتختلف من شخص لاخر ولكن لا اعمم زى "الكل بيقول العربية دى وحشة" او "العربية دى معروف عنها..." . ولا هوا جربها ولا حد من قرايبه او اصحابه اشتراها ولكن هوا سمع كده فقال كده.

شوف حضرتك ثمن العربيات كام وثمن التلاجات او الموبايلات كام وانت حتعرف ليه بنحب عربياتنا اوي .. ده انا لو لقيت حد مجرد بس ساند عليها ممكن اعمل خناقة معاه للصبح

The things you own end up owning you !!!!!!

مش قصة حب لأن الحب دة حاجة مفروغ منها ، لكن الدفاع المستميت دة علشان مفيش موضوعية

يعني الواحد بيصعب علية يفكر انة العربية اللي اشتراها بمبلغ وقدرة فيها عيب ومش بيكون عايز يقتنع بكدة أصلا وبيفضل يقنع نفسة انها زي الفل علشان ميكرهش نفسة

اكبر دليل علي الكلام دة افتكرتة حالا هو واحد قريبي كان بيعمل بنفس المنطق دة في الموبايل في حين انة معملوش في العربية .. يعني كان شاري htc ب6500 جنية أول ما نزل ويقعد يعدلي في مميزاتة وفية وفية ومش عايز يقتنع ابدا انة مش عملي معاة كتليفون وهو سايق .. لحد ما ركنة وجاب تليفون عادي فا سألتة لية كدة قالي بيخنقني وانا سايق (علشان تمسكة بإيد وتشتغل بالأيد التانية مش سهل) ، طبعا انا معلقتش خالص

نفس الشخص كان معاة لانوس وكان معترف بمشاكلها في الثبات عادي جدا وبيتكلم عليها بموضوعية (طبعا مع شوية مبالغة برضو) ، وبعد ما غيرها وركب فيكترا قالي انا اكتشفت اني كنت راكب صندل هههههههه

يعني اتكلم بموضوعية عن العربية أكتر من الموبايل لأن رقم 6500 ج في الموبايل كان واجعة أكتر

انتا فكرتنى بحاجة كان كتبها انيس منصور فى الاهرام من الحاجات الى بيكتبها يوم الجمعة اهم حاجة عند الرجل المصرى العربية والكلب بتاعة (لو بيحب تربية الكلاب) وبعدين مراتة

لأن العربيه اللي بيشتريها بتبقي عشره عمر

هوا انا مجربتش موضوع العربيات دى لكن مثلا محبش حد يقول على شركة موبينيل كلمة وحشة مثلا أو موبايلى كلمة وحشة و محبش حد يقول على أسكندرية كلمة وحشة وهكذا
أحنا شعب عمتا ممكن يكون مش حاسس أوى بالحاجة الى فى أيدة لكن فى لحظة من اللحظات لما بتبوظ منه أو حتى بتتعطل منه بيحس بقيمتها جدا و بيزعل عليها جدا و حتى لو كلمة وحشة عليها ممكن تضايقة جدا
لأن أحنا شعب أصيـــــــــــــــــل لكن الأصالة عليها طبقة من الغبار

اقتباس:

---

المشاركة الأصلية كتبت بواسطة kareemhisham

هو الموضوع ببساطة .. ان الواحد بيبقى دفع دم قلبه فى العربية و تعب عقبال مجبها ..

فلما واحد يجى يتكلم على عيب فيها .. بيبقى زعلان اوى و حاسس انه رمى فلوسه فى الارض

عشان كدة بيحاول يدافع عنها باستماتة عشان يقنع نفسه انه اختار الاختيار الافضل

انما هى مفيهاش شعب مصرى و مش شعب مصرى .. دى حاجة فى الدنيا كلها

---

10000000+

بس انا بحب عربيتى عزيزة فيات 128 لعدة اسباب
هى اخت لينا من سنة 1981
شفنا أيام جميلة معاها
لها ذكريات لا حصر لها مع العيلة
بحس ان لما اخويا عمل بيها حادثة خذت كل الخبطة فيها نفسها و حمته هو باذن المولى عز وجل
و كمان فى الحادثة اللى حصلت لوالدى تحولت باذن الله تعالى الى كائن حى كل هدفه انه يحمى صاحبه لدرجة ان كل اللى شاف الحادثة مصدقش ان والدى طالع سليم من العربية و لم يصبه اى شئ رغم ان العربية اتقلبت 3 مرات و اطبقت و كان شكلها لا يوصف سبحان الله و ده اللى خلى والدى يقف معاها لغاية ما اتصلحت كاملة و لا كأن حصل فيها حاجة للوفاء الشديد اللى بينهم و اللى اتربى جواى انا كمان بحبها جدااااااااااااااااا علشان كده اقنعت والدى انى اشتريها منه و هى الحمد لله معملتش معايا غير موقف نذالة واحد بس معايا بس بصراحة هو بسبب الافترا بتاعى اول ما اتعلمت سواقة بس بعد كده الحمد لله هى كويسة معايا جدااااااااااااااا
و كتير اوى احس انها بتحن لوالدى علشان كده اتلكك ليه انى سامعة حاجة فى الموتور او الفرامل علشان اخليه يسوقها و يطمن عليها
هى ده اسباب ان بحب عربيتى

انا كان نفسي بردو اتكلم عن حاجة زي كدة هوة اه طبيعي الواحد اللي ارتبط بحاجة كتير وبيقضي فيها وقت كتير وبيحس انها نقزاه من مشاكل ومتاعب زي المواصلات وارفها اكيد هيحبها بس المشكلة بقي ان الموضوع بيتطور لحب زائد او حب اعمي يعني فعلا القرد في عين امه غزال والمثال التاني بتاع الخنفسة اللي قال الباشمهندس سمير اه بحب عربيتي بس عارف ان في عربيات تانية ومش بالضروري عربيتي تبقي الافضل في كل النواحي

ديه عاطفة عند العرب وقليل من الاجانب
اساسها الحب لكن الشي لما بيزيد عن الحد بيبقي مضر والحب لما بيزيد بيبقى عشق وولع وجنون
عشق السيارات
مش كدا وبس
فيه ناس بتعشق الموبيلات
زى اللى بيعشق يقتنى تحف
اللى يعشق يجمع عملات
ناس بتعشق الأدوات
البنات بتعشق المكياجات واللبس
ناس بتعشق حاجات كتير
انا بعشق الألكترونيات بشكل جنونى لدرجة انى ممكن امتلكها وأحافظ عليها ومشغلهاش
ويبقي يهون عليه اى شئ بس ميضيعهاش من ايده حتى لوخسر اللى حوليه
لكن اللى بيعمل كدا بجد بيبقي عنده انانية وضعف ايمان
وصباح قالت
بحب عمرى وبعشق الحاجات
وكل ديه حاجات
لازم نسيطر على مشاعرنا
وانا كنت كدا بس ربنا هدانى قولت لنفسي بعشق عربيتى مثلا
طب هيجرى ايه لو بيعتها
أكيد عادى وهتمر الأيام وأعشق اللى احسن واحدث وأجمل

قال رسول الله صلى الله عليه وسلم
لأ يأمن أحدكم حتى يحب لأخيه مايحب لنفسه
صدق رسول الله صلى الله عليه وسلم
عرفتم قولت لكم ليه ضعف ايمان

انا مع كل الاجابات والاراء الى اتكتبت فعلا هو ده الى بيحصل

يا راجل الاجابه بسيطه جدا انا عن نفسى متعصب لعربيتى جدا جدا لان اى فلوس معايا رايحه عليها فطبيعى حاجه واخده اغلب فلوسك مش حتستميت عليها

انا عـــــــندى مشكــــلة الارتبـــــاط
مبقدرش انام لو باظ فيها حاجــــــة
بحب اقضى وقتى معاها على طول

انت زى بالظبطت مرة البطارية نامت واتضطريت اركنها ف مكان مش بعديد عنى يعنى 10 دقايق مشى اكون هناك وكانت الساعة 2 بليل وطبعا مافيش حد فاتح ماستنيتش لحد النهار مايطلع روحت جايب واحد صاحبى بعربيتة وشيلت بطاريتة ودورت ومشيت وطبعا عشان المسافة قليلة فالحمد لله مأثرتش على الدينامو وكنت طبعا ماشى من غير انوار خالص او كاسيت حتى الكلاكس ماكونتش بضربة
مايجيليش نوم وهية مش فى الجراج احس ان فية حاجة نقصانى انا لو بنى ادم مش هاعمل معاة كدة

وبعدين فى مشكلة انك حتى لو معاك العربية وبتقول عيوبها تلاقى واحد طلعلك ويقولك ماتحولش تكرة الناس فيها وانا مش شايف المشاكل دية ابدا وبيعها طالما مش مريحاك بس ماتقولش كدة
ويقلب بردة اللى معركة ,يعنى ولا عايز يقول ولا عايز حتى غيرة يقول