....مرور المعادى...ورسوم تسجيل عقد نقل الملكيه.......إستفسار..
السلام عليكم ورحمه الله وبركاته.....
إخوانى وأحبائى النايل موتورزاويه.....
نويت والنيه لله أروح أنقل الملكيه لعربيتى وأخليها بإسمى بعد 3 سنين ماشى بيها بأسم واحد تانى....وبتوكيل.....
أولا....
عرفت من بعض أصدقائى إن لو جبت شهاده تصنيع محلى من المرور بتخفض فى رسوم تسجيل السياره فى الشهر العقارى....
طب جميل....يبقى أطلع على مرور المعادى وأعمل الشهاده دى وأعمل شهاده المخالفات بالمره وربنا يستر....
هنا بقى قابلتنى أول مشكله........فين مرور المعادى ده؟
وأروحله إزاى من شبرا ويا سلام كمان لو ينفع اروحه بالدائرى عشان ما اتوهش جوه البلد...!!
ده أول سؤال!!!!!!!!
مرور المعادى ونيابه المرور فى مكان واحد زى ما المنطق بيقول ولا كل واحد فى حته؟ معلش مهو مفيش حاجه مضمونه فى البلد دى اليومين دول........!!!!
ده تانى سؤال.......!!!!!!
أروح الساعه كام تقريبا عشان الحق أعمل الشهادتين قبل الخزنه ما تقفل.....؟؟
ده تالت سؤال.....!!!!!
خلاص ربنا كرمنا وخلصت وهلحق كمان الشهر العقارى...(بحلم ..مش كده!!!)
اروح أى شهر عقارى ولا لازم اروح الفرع اللى انا تبعه فى السكن؟...
الشهر العقارى بتاع سوق السيارات بتاع مدينه نصر....هل فيه اى ميزه عن اى شهر عقارى تانى؟ ومكانه فين؟
الشهر العقارى مواعيده إمتى؟
دول بقى نعتبرهم رابع سؤال...!!!
حد يقدر يقوللى رسوم التسجيل بتتحسب على اى أساس؟ يعنى لما بروح أقدر الرسوم بيحسبوها إزاى؟
يعنى انا عربيتى فيرنا مو 2007 هدفع عليها كام تقريبا بعد ما اجيب شهاده التجميع المحلى من المرور...؟؟
ده خامس سؤال...!!!!
نقول سجلت ومعايا شهاده المخالفات والعقد المسجل وطلعت على المرور......(مش هقول فى نفس اليوم عشان محدش يغلط..!!)
هدخل على الشباك واشترى الملف واعمل الطفايه ....
هوب نيجى بقى على التأمين......
أكمل تأمين إجبارى عادى ولا ممكن أأمن مع شركه تانيه تدينى ميزه تأمين حقيقيه لو حتى هدفع مبلغ أكبر....وهيعترفوا ببوليصه التأمين وليكن وثاق التكافلى مثلا ولا لازم شركات معينه؟
الفحص بقى......
فى فحص فى الفتره المسائيه؟
ولا الفحص بيكون فى الفتره الصباحيه بس؟
طب لو فحصت وخلصت وملحقتش أكمل ......
ممكن أكمل فى الفتره المسائيه؟ وهيصرفولى لوح جديده؟؟
كفايه كده أسئله ومنتظر أرائكم وخبراتكم....
تحياتى...
أشرف فتحى