احذروا معامل المختبر ومعامل ميديكا لاب . نتائج المعامل غلط

كنت عملت تحليل ديباكين في الدم لبنتي من شهرين في معمل ميديكا لاب لكن النسبة طلعت غلط يعني التحليل بتاع المعمل طلع غلط لان المفروض تبقي النسبة ما بين 50-100 ملجم في الدم لكن التحليل العبقري طلع النسبة الادني 3 والاعلى 5
طبعا الدكتور المعالج وهو استشاري مخ واعصاب قال المعمل ده حمير شوف معمل تانى من المعامل الكبيرة
سمعت الاعلان بتاع معمل المختبر في الراديو وانا ماشي بالعربية قلت نجربه في التحليل المرة دي
رحت عملت التحليل عندهم
المفروض التحليل بيتعمل مرتين مرة بعد تناول جرعة العلاج بساعتين لمعرفة اعلى تركيز للدواء في الدم والتانى بعد 9 ساعات من تناول الجرعة لمعرفة اقل نسبة للدواء في الدم
العباقرة طلعوا اعلى نسبة تركيز للدواء في الدم هي 110
الظريف انهم طلعاو اقل نسبة تركيز للدواء في الدم هي 125
طبعا ثرت عليهم وقلت لهم الكلام ده غلط حاولوا يقنعوني انه صح بس طبعا مستحيل
المهم قالوا خلاص هنعمل شكوي ونسلمها للدكتور وليد المسئول عن المعامل وهو يكلم دكتور مؤمنة كامل صاحبة المعامل لاننا مش بنتكلم معاها مباشرة والدكتور وليد هيتصل بيك النهاردة يقولك ايه الحل
طبعا طناش من 3 ايام
دلوقت الخسائر تمن التحليل مرتين وهو 140 جنيه ودي اقل خسارة
الخسارة الاكبر طبعا هي حالة الرعب اللى بتبقي موجودة عند البنت وهما بياخدوا منها الدم علشان التحليل لدرجة انها بعد تانى مرة وكان بين التحليلين يومين اتنين البنت اغمي عليها وجالها هبوط بسبب سحب الدم منها
والاكتر من كدة كم الاستهتار بالمرضي ومعظم اللى شفتهم كانوا اطفال لان الاعلان بتاعهم ان اخذ العينات بدون الم
ايه رايكم في الاستهتار والتلاعب بارواح الناس ؟؟؟؟؟؟؟؟؟؟؟؟؟؟

ممكن تزود عليهم البرج (عن تجربه ل 3 زملاء فى العمل)
نتائج مغلوطه
احدهم كان عنده سرطان !!!

افضل النتائج تحصل عليها من معمل اي استاذ جامعه في التحاليل الطبيه يكرون بيشتغل بايده يعني عنده معمل واحد او 2 بالكتير

في معمل في الدقي اسمه معمل طيبه ده ممتاز وعن تجربه ويعتبر من ادق معامل تحليل الهرمونات في الدم

بصراحة المفروض المعامل دي يبقي لها وقفة وتتحاسب وكل واحد حصل معاه حاجة لازم يشتكيهم وميفرطش في حقه

المعامل حالها هيزداد سؤ في الايام اللي جاية لان اصبح بامكان الحاصلين علي علوم وبيطري يفتحو معامل تحاليل

حتى المعامل الكبيرة بتخرف !!

لا حول ولا قوة إلا بالله العلي العظيم
ربنا يرحمنا برحمته ويحفظنا ويحفظ ولادنا يا رب
وألف سلامة لبنتك
أسأل الله العظيم رب العرش العظيم أن يشفيها

الف سلامة علي بنوتك وربنا يشفيها يارب

جرب معمل الفا جميل ونتايجه كويسة جدا
انا كذا دكتور كبير ليا ولاناس اعرفهم يطلب التحاليل من معمل الفا
وبيقول ان المعامل التانية مش كويسة
وانا باباي عمل تحاليل في المختبر وطلعت كلها غلط والدكتور قاله ان ده لايمكن يكون تحليل ده ولا المياه

الف سلامه لبنتك يا باشا وربنا يطمنك عليها ان شاء الله , للاسف انا كنت بتعامل مع معمل البرج باستمرار , المهم من حوالى سنه لات نتائج التحاليل مستحيله و كلها بايظه المهم سالت ناس فى المجال ده و دخلت على مواقع جديده اكتشفت ان معمل البرج و معمل المختبر عملوا ابجريد للاجهزه و جابوها من الصين درجه عاشره و علشان كده النتايج بايظه , لو ممكن حد من الاخوه الكرام ياكدلنا المعلومه يبقى خير . اللهم اشفىينى و اشفى مرضى المسلمين .

معلومه لسه عارفها من واحد صاحبى يعرف قرائب دكتورة مؤمنه كامل ان

== اذا اى حد من افراد عائلتها احتاج لتحليل يتم ارسال التحليل والعينات لخارج مصر ولا تجرى التحاليل فى مصر ابدا ==

السلام عليكم و رحمة الله

اضم صوتى لكم فيما يخص معمل المختبر
حصل معايا مرتين ان التحليل يطلبوا انه يتعاد و المرة التانية كانت لابنى 3 سنين و نص و انتوا عارفين اخذ العينة مش ساهل

و لما رفضت اعيد التحليل رفضوا رد القيمة

و للامانة بتعامل مع معمل مبرة العصافرة ده عندنا فى اسكندرية و ليه كذا فرع و ماشاء الله مواعيدهم و اسعارهم و مفيش اى دكتور علق على نتايجهم

و جزاكم الله خيرا

والله يا جماعة انا عملت الموضوع ده من شهور من حرقتي من اللى حصل لبنتي وامتنعت تماما من يومها عن المختبر وميديكا لاب وغيرهم من المعامل النصابين منظر على الفاضي
لكن الدكاترة واخطائهم الطبية كارثة ولما القلب والوقت يسمح هحكي لكم معاناتنا مع الاطباء والادوية الغلط والاثار الجانبية المميتة لها
ربنا يشفي الجميع يا رب

اقتباس:

---

المشاركة الأصلية كتبت بواسطة cairo2005

ربنا يشفي الجميع يا رب

---

آمين يارب

معمل الدكتور ظريف حمزة بجوار نادى هليوبليس ده من الاخر راجل عبقرى طب بشهادة جيش من الدكاترة الاستشاريين.

حد يعرف معمل تانى غير مبرة العصافرة انا مش بشكك فيه بس انا طول عمرى احلل فيه بس محتاج اغير عشان اطمن على النتيجة هل هى كدا صح زى المبرة ولا فيه معمل تانى يطابق معاه نفس النتيجة

اقتباس:

---

المشاركة الأصلية كتبت بواسطة w_abedelhakim

الف سلامة علي بنوتك وربنا يشفيها يارب

جرب معمل الفا جميل ونتايجه كويسة جدا
انا كذا دكتور كبير ليا ولاناس اعرفهم يطلب التحاليل من معمل الفا
وبيقول ان المعامل التانية مش كويسة
وانا باباي عمل تحاليل في المختبر وطلعت كلها غلط والدكتور قاله ان ده لايمكن يكون تحليل ده ولا المياه

---

ان شاء الله بنتك تكون خفت قبل ما اخلص كتابة تعليقى
ان متفق مع الرأى فى هذا الاقتباس وعن تجربة باستمرار مع الفا

أحب اضيف تجربتي مع معمل البرج :

روحت اعمل تحليل و كان عندي برد من يومين و واخد كونجستال و سالت دكتور المعمل هل البرد و الكونجستال هيأثروا علي نتيجة التحليل ؟؟ قالي بكل ثقة لأ مش هيأثر
عملت التحليل يوميها و طبعا النتائج طلعت غير مطمئنة!!! .. و روحت للدكتور بتاعي قالي طبعا البرد بيأثر روح بعد ما تخف اعمله في معمل تاني .. عملته في كايرو لاب طلعت النتائج احسن كتييييييير الحمد لله

الموضوع ده مكتوب أنت اتقفل من 11 يوم ولازم تعلم صح على اقرار
أعلم أن الموضوع قديم وأرغب بإضافة رد هام ومفيد .
عشان يضيفوا المشاركه
أنا شفت الموضوع ومعنديش رد مفيد بس لو ما ردتش هيحصلى حاجه من الغيظ عشان اى موقف زى ده بحسه على طول وعلى فكره مبقتش كده الا لمابقى عندى ولاد
الى حصل ده فى الاول قله ادب عشان الخطأ
بعد كده قله ادب وقله احترام وقله تربيه عشان بيحاولوا يقنعوك أن نتائج التحليل صح ومفيش مشكله وتظ فى صحه الناس مش مهم المهم يطلع المعمل مظبوط
الى حصل بعد كده من أن دكتور مش عارف مين هيكلم دكتورهه مش عارف مين صاحبه المعمل الخربان والتجاهل التام فده بقى مش هعرف اوصفه عشان ما اتوقفش
معلش يا جماعه أنا عارف انى اوفر فى الرد بس فعلا بحس أن ده اتعمل مع ولادى وباتنرفز جدا
يا باشا ما تسكتش وروح اقلب الدنيا على دماغ ابوهم واعمل شكوى فى نقابه الاطباء واهم حاجه يكون معاك نتيجه التحلليين

احب اضيف خطأ جديد لمعمل المختبر (مؤمنه)
تحليل rh لاحدى قريباتى طلعوه موجب فيما يعنى ان الامور تمام وزى الفل
و تم عمل التحليل مره اخرى فى اكتر من معمل وطلع سالب

طبعا المشكله دى بيتاثر بيها الطفل التانى على ما اعتقد بس على العموم حبيت ابلغ الموضوع علشان اللى مقبل على مثل هذا التحليل يعيده اكتر من مره فى كذا معمل
ومش موضع المختبر ولا غيره المهم انك ما تتطمنش لمعمل واحد

اما معمل (الفا) تم عمل فيه تحليل حمل : النتيجه سالبه اى لا يوجد حمل طبعا يعنى اجرى واتنطتتى قولت لهم يا جماعه مش ممكن يكون فيه خطأ ولا حاجه ولا الجهاز مش شايف كويس
قالو لى يا استاذ لو الحمل فى يوم الجهاز هايجيبه ده تحليل دم يا استاذ وتحليل هرمون مش فاكر

قلت هما ادرى
طبعا ما اتطمنتش برده
وتم عمل التحليل بعد حوالى اسبوعين فى نفس المعمل وتبين وجود حمل
شوف ازاى
طبعا دارو كسفتهم وقالو لى اصل ومش وبتاع

اقتباس:

---

المشاركة الأصلية كتبت بواسطة hema_hn

حد يعرف معمل تانى غير مبرة العصافرة انا مش بشكك فيه بس انا طول عمرى احلل فيه بس محتاج اغير عشان اطمن على النتيجة هل هى كدا صح زى المبرة ولا فيه معمل تانى يطابق معاه نفس النتيجة

---

معمل الدكتور مجدى عند مصطفى كامل الترام راجل شغله ممتاز

معمل البرج وعن تجربة

اقتباس:

---

المشاركة الأصلية كتبت بواسطة hany_mohamed

معمل الدكتور مجدى عند مصطفى كامل الترام راجل شغله ممتاز

---

شكرا لردك

اقتباس:

---

المشاركة الأصلية كتبت بواسطة ahmed76

اما معمل (الفا) تم عمل فيه تحليل حمل : النتيجه سالبه اى لا يوجد حمل طبعا يعنى اجرى واتنطتتى قولت لهم يا جماعه مش ممكن يكون فيه خطأ ولا حاجه ولا الجهاز مش شايف كويس
قالو لى يا استاذ لو الحمل فى يوم الجهاز هايجيبه ده تحليل دم يا استاذ وتحليل هرمون مش فاكر

قلت هما ادرى
طبعا ما اتطمنتش برده
وتم عمل التحليل بعد حوالى اسبوعين فى نفس المعمل وتبين وجود حمل
شوف ازاى
طبعا دارو كسفتهم وقالو لى اصل ومش وبتاع

---

في بداية الحمل بيبدأ هرمون الحمل HcG في التزايد بشكل مطرد

لو حللت في اول الحمل خالص ممكن يدي نتيجة سلبيه ...... و ممكن بعدها بيومين يدي ايجابية .....

لو انا مش غلط الديباكين ده لعلاج حالات الصرع وزياده الكهرباء فى المخ لو انا غلط حد يصححلى

هل تاثره فى الدم مضر لان فى واحد قريبى يباخد الديباكين ومش عمل تحليل نسبة الديباكين فى الدم

واخيرا ربنا يشفى جميع المرضى اللهم امين