الموضوع: خبطتين في الرأس توجع؟ طيب ثلاثة بقى (فرامل+دبرياج+رادياتير)

صحيح أن العربية بقالها زمن ما عملتش حركات نقص، لكن الأسبوع اللي فات في نفس الوقت اللي محتاج فيه العربية بشدة، حصل لي كام موقف مش تمام لكن كله بيعدي

1- الفرامل قفشت
- مسافرين عادي و العربية كاملة الحمولة 5 ركاب بالغين و الشنطة متستفة عالآخر و فجأة كده ألاقي العربية ثقلت شوية، ضحكت على نفسي و قلت ممكن من الحمولة بس الوضع مش طبيعي. أشد بالعربية و حاسس أن في حد بيشدها من ورا. أمور العربية و أنا ماشي ألاقيها بتهدي أسرع من المعتاد، أبص على مؤشر الحرارة لقيته أعلى بدرجة عن المعتاد، أضحك على نفسي و أقول لما نوصل ربنا يحلها بقى. أشم ريحة تيل و أقول في نفسي أهلاً أهلاً ما هي يا فرامل يا دبرياج. أسمع زمارة سائق أجرة جنبي و بيقول لي "العجلة الورانية شمال بتدخن" شكراً يا حبيبي.
ركنت على جنب و ألاقي دخان أبيض برائحة التيل المعروفة خارج من الطنبورة (الفرامل الخلفية طنابير) و ألاقي هباب أسود خفيف على الجنط. لقيت والدي قلقان كده قمت قلت له و أنا باضحك "عادي يعني، الفرامل قفشت" مافيش حل إلا أننا نمشي بالعربية لحد ما نلاقي ميكانيكي (على طريق مصر-إسكندرية الزراعي + يوم جمعة) ميكانيكي ورا التاني كلهم قافلين يوم الجمعة لحد ما لقينا واحد و طبعاً قلقان منه لأنه على الطريق يعني سهل يعمل علينا شغل أو يعك أو ينصب.
في المرحلة دي الجنط كان اتملى هباب و لونه بقى ذهبي بدون مبالغة + دخان أبيض مستمر. الراجل فك الجنط و ساعة ما فك غطاء الطنبورة حصل صوت انفجار بووووووووووووووم و كمية دخان و هباب غريبة طلعت.
التلفيات بقى:
1- كل ما هو غير معدني زي جلد الماستر
2- السوست نشفت
3- التيل اتمسح طبعاً

الراجل الكفتجي كان عايز يحط مياه علشان تبرد بسرعة لكن رجع لما قلت له "هي مش هتقفع كده ولا إيه"
المهم كان قدامنا حلين:
1- يصلحها و ده كان رأي والدي
2- يقفلها على كده و يلغي فرامل العجلة دي على ما نبقى نروح و نعملها بمزاجنا و ده كان رأيي
المهم قلنا نصلحها راح الميكانيكي أخد عربيته الماروتي و غاب شوية كده و رجع جايب معاه جلد ماستر و سوست فرامل و ملأ التيل و خرط الطنبورة إلخ..
ركب كل حاجة و جربت الفرامل على الأسفلت و كله تمام.

2- الرادياتير اتخرم
في نفس اليوم و احنا راجعين بالليل ألاقي مؤشر الحرارة بيعلى و يعلى و يعلى، رحت أنا مطاطي مطاطي مطاطي
رحت راكن و مقرب من الرادياتير سمعت صوت (فسسسسسسسسسسس) جبت قماشة مبلولة و بحذر بدأت أفتح غطاء الرادياتير و بوووووووووووم فشششششششششششش كمية بخار مش بطالة تحت ضغط و طبعاً مافيش مياه في الرادياتير. رحت جايب جركن المياه و قعدت أملاه واحدة واحدة و الموتور داير طبعاً لحد ما اتملى و الحرارة نزلت على طول و رحت ماشي. الرادياتير كان مخروم طبعاً و تاني يوم الصبح رحت لبتاع الرادياتير و كان الخرم ناحية المروحة قعد يشتغلني و يقول لي ده المروحة هي اللي خرمته،
-لا يا راجل!!
- أيوة يا بيه البيجو كله كده ملاكي و أجرة كمان، مع الفرامل و المطبات الجامدة الموتور بيطلع قدام و لو المروحة قريبة من الرادياتير هتخبطه

قمت مهاوده و قلت له "تصدق امبارح كنت باجرب الفرامل"
قام ابتسم و فرح أن كلامي بيأكد نظريته الهلامية
يعني الموتور عندي بالطول، هيسيب الفتيس و الكردان و العجل و يطلع قدام لوحده يعمل إيه؟ زهق من قعدة الحوض مثلاً؟

3- الدبرياج
بعد ما خلصت الرادياتير و ظبطت الشكمان كمان و كام مشوار كده و جه في بالي أني عايز أعلي دواسة الدبرياج شوية. رحت للميكانيكي و راح مراجع على الدبرياج من أول الماستر لحد الدواسة. و غير جلد الماستر و الزيت و جاب "زغاد" جديد لأن القديم كان متآكل بصراحة.
جرب يا باشا، كله تمام. و رحت على بتاع الزيت و زودت زيت الفتيس كمان و طالع من عنده و الدبرياج في قمة علوه. ضغطة دبرياج ورا التانية أحس أنه بيوطى و بيوطى و أنا كنت في مشوار مع واحد و مش ناقصة قرف بقى. الدبرياج بيوطى و النقلات بتتقل أكتر و أكتر قلت أما أشوف فيه إيه تاني رحت واخد الوضعية (أني أوقف العربية على منزل) و بصيت على الدواسة ألاقيها غرقانة زيت :) و أدوس دبرياج ألاقي مافيش مقاومة و مافيش دبرياج :) يا حبيبي
مافيش حل إلا أني أرجع للميكانيكي. قام اللي راكب جنبي قال لي "هات الفتيس على الأولاني و دور العربية" قلت له "و أنا أحمل على المارش ليه؟ امال أنا موقف العربية على منزل عياقة يعني؟"
رحت مدور العربية و منزل فرامل اليد و لما العربية بدأت تتحرك قمت جايب أولاني (من غير دبرياج) و مشيت شوية رحت جايب التاني من غير مشاكل و بادعي أن الطريق ما يقفش لحد ما قربت من مزلقان و لقيته قافل و طابور عربيات واقف و أنا مش معايا دبرياج، تخيلوا الموقف. قعدت أقول "هو فين، هو فين؟" و رحت واخد الوضعية على أقرب منزل (500 متر من المزلقان) و بطلت العربية و انتظرت لما المزلقان فتح و انتظرت تاني لما الزحمة خفت من عليه. رحت مدور العربية و منزل فرامل و مديها أولاني و عديت المزلقان
شوفوا الموضوع ده قيادة السيارة المانيوال بدون دبرياج - في حالة انقطاع سلك الدبرياج
لحد ما وصلت للميكانيكي رميت له العربية و أنا شايط مافيش 5 دقائق و الواد بلية جه يقول لي" الفورك مكسور ههههههه" فرحان قوي ياخويا. ما هو الشوكة دي مش بتتغير إلا لو خلع الموتور.

المهم جاب شوكة جديدة و ركب كل حاجة و رجع الموتور و بس
كل ده في 24 ساعة بعدها رجعت المياه لمجاريها

ما تصدقش كل اللي تشوفه بعينك

يعني في يوم تعمل 3 مواقف زي اللي فاتوا، و يعدي عليها شهور من غير ما تنطق نص كلمة
مثلاً من يوم ما كتبت الموضوع ما عملتش فيها أي حاجة إلا أزود بنزين و مياه رادياتير
والله لو عملت إيه هي عشرة فعلاً تحس أني أنا و العربية مطبعين على بعض