تغيير مقاس االكاوتش لهوندا سيتى 2007

**Yanouk** · 24-10-2009 05:27 PM

السادة الأعضاء الأجلاء أهل الخبرة،
عربيتى هوندا سيتى موديل 2007 أوتوماتيك بمحرك 1500 سى سى. حضراتكوا عارفين إن العربية بتنزل بجنوط سبور مقاس 6 بوصة على ما أتذكر وكاوتش 185/55. مشكلتى هى فى مقاس الكاوتش إللى للأسف مش مناسب لطرقنا الأكتر من رائعة فى مصر واللى مليانة حفر وبالوعات مفتوحة فى شوارع ضلمة، أنا آسف إنى بالمس وتر حساس يعنى.

المهم بسبب تغيير الكاوتش أكتر من مرة نتيجة إنه بيجيب سلك بعد كل بالوعة أو حفرة يدوس فيها فكرت أغير بكاوتش مقاس أكبر، أكبر فى الإرتفاع وكمان أكبر فى العرض علشان يعوض الثبات شوية نتيجة رفع مركز ثقل العربية عن الأرض إللى هيؤدى لتقليل الثبات على الأرض.

لما سألت تاجر كاوتش قال لى إن المقاس المناسب هو 195/55 وكانت وجهة نظره إن لو عرضت أكتر من 195 ده هيدى إحساس إن العربية أنشف فى المطبات وأثناء المشى وكمان ممكن يؤثر على العفشة، وإنى لو زودت عن ال 55 إرتفاع بتاعة ال 195 العربية هتعوم منى. صحيح ال 55 فى ال 195 أعلى سنة من ال 55 فى ال 185 بس أنا بيتهيألى إن ده إرتفاع مش كافى علشان يعالج مشكلتى.

سؤالى لأهل الخبرة والمعرفة من الإخوان الأعزاء هو هل فعلاً أنا ما أقدرش أزود عن 195 فى
عرض الكاوتش و عن 55 فى الإرتفاع؟ ويا ترى ما هو المقاس المناسب لو عايز أزود عرض x إرتفاع؟

راجياً سرعة الرد وللجميع منى جزيل الشكر مقدماً وخالص التحية؛

سامى

**Ahmed Hassan** · 24-10-2009 05:35 PM

الهوندا السيتي ال ١٥٠٠ الجنط بتاعها ١٥ بوصه

انا مش عارف مقاس الكاوتش الاصلي بتاعك كام... بس فعلا الكاوتش لو ١٩٥/٥٥ اعلى من ١٨٥/٥٥ بس المهم العربيه تستحمل عرض قد ايه من غير ما تخبط في العفشه او جسم العربيه نفسه. هوه المقاس اللي عندك ده الاصلي بتاع العربيه؟

**Hosam_Optrawy** · 24-10-2009 05:36 PM

مقاس ( قطر ) الجنط كام بوصه ؟

14 , 15 ؟

**Ahmed Hassan** · 24-10-2009 06:33 PM

المشاركة الأصلية كتبت بواسطة Yanouk

الأستاذ "Ahmed Hasan" والأستاذ "Hosam Optrawy" أشكركم على سرعة الرد. مقاس الجنط الأصلى 15 بوصة قطر x 6 بوصة عرضة جنوط سبور، ومقاس الكاوتش الأصلى 185 عرض x 55 إرتفاع من سطح الأرض وحتى حافة الجنط.

خلينا نفرض إن تجويف العجل يسمح بأى حاجة، أقصى عرض كاوتش ما يأثرش على العفشة ونعومة العربية ممكن يكون إيه؟ وأقصى إرتفع للكاوتش من سطح الأرض وحتى حافة الجنط من غير ما يأثر على ثبات العربية (ماتعومش يعنى) ممكن يكون إيه؟

وأشكركم من جديد على مساعدتكم ومعلوماتكم القيمة.

لو افترضنا ان التجويف يسمح.. يبقى هات ١٩٥/٥٥/١٥

المقاس ده هيزودلك حوالي ٥ ملم في ال side wall بتاع الكاوتش (ارتفاع العربيه هيزيد كمان) و العداد قرايته هتقل عن الواقع... يعني لو العداد قاري ١٠٠ كم/س يبقى انت ماشي ١٠٢ كم/س

بس قبل كل ده.. انت متأكد ان العيب مش من نوع الكاوتش او سواقتك؟

**Yanouk** · 24-10-2009 06:46 PM

أشكرك أستاذ أحمد،
أنا دايماً باستعمل كاوتش Bridgestone يعنى زى إللى جاى مع العربية من مصنعها. أما عن سواقتى فأنا عاقل فى سواقتى والحمدلله، المشكلة فى الطرق إللى بامشى فيها (مدينة نصر والقطامية والدائرى وهكذا) إنت حضرتك عارف حالة الطرق وعارف القلة الصيانة والإهمال إللى بتعانى منه الطرق فى مصر ودى حاجة أكيد إنت نفسك بتعانى منها. طرقنا هى إللى أثبتت فشلها مع الكاوتش الواطى إللى هو فى الحقيقة إتجاه ومطلب فى دول الخارج لأنه بيوفر ثبات أكتر وأمان أكتر لأكتر من سبب.

**Ahmed Hassan** · 24-10-2009 07:18 PM

المشاركة الأصلية كتبت بواسطة yanouk

أشكرك أستاذ أحمد،
أنا دايماً باستعمل كاوتش bridgestone يعنى زى إللى جاى مع العربية من مصنعها. أما عن سواقتى فأنا عاقل فى سواقتى والحمدلله، المشكلة فى الطرق إللى بامشى فيها (مدينة نصر والقطامية والدائرى وهكذا) إنت حضرتك عارف حالة الطرق وعارف القلة الصيانة والإهمال إللى بتعانى منه الطرق فى مصر ودى حاجة أكيد إنت نفسك بتعانى منها. طرقنا هى إللى أثبتت فشلها مع الكاوتش الواطى إللى هو فى الحقيقة إتجاه ومطلب فى دول الخارج لأنه بيوفر ثبات أكتر وأمان أكتر لأكتر من سبب.

انا معاك ١٠٠٪ و انا شخصيا مبوظ كاوتش قبل كده بس انا المقاس عندي ٢١٥/٤٥/١٧

يعني ارتفاع الكاوتش اوطى من المقاس اللي عندك و فعلا لاحظت ان فيه انواع كاوتش بتستحمل الطرق السيئه اكتر من غيرها و حتى من نفس الماركه فيه موديلات بتستحمل اكتر من غيرها

**Yanouk** · 24-10-2009 08:53 PM

الحقيقة دى معلومة ما كنتش واخد بالى منها. هل فيه إمكانية ترشحلى ماركة وموديل يستحمل سوء الطرق عندنا؟ أنا خلاص هاجيب 195/55/15 v علشان السرعات العالية جداً - برضه طمعاً فى ثبات أكتر على الطريق - ومش هازود عن كده علشان ما يسببش نتايج سلبية على العربية. لو أمكن تنصحنى بماركة وموديل كاوتش أكون ليك شاكر وممنون وجزاك الله كل خير.

سامى

**Ahmed Hassan** · 24-10-2009 09:06 PM

الكاوتش اللي انا مجربه و استحمل المطبات هوه kumho ecsta ku15

عرض الجنط عندك ٦ بوصه يعني عادي انه يشيل كاوتش عرضه ١٩٥
بالمقاس الجديد مساحة سطح التلامس بين الكاوتش و الارض هيزيد و ده معناه تماسك اكبر. من ناحيه تانيه العربيه هتعلى و ده معناه زياده في ارتفاع مركز ثقل العربيه و ده معناه استجابه اقل للتوجيه على السرعات العاليه. مجموع العاملين دول على بعض معرفش نتيجتهم الكليه ايه على الثبات الكلي للعربيه بس في اسوأ الاحوال لو كان سلبي فهيكون بدرجه بسيطه.

يا ريت تطمنا عملت ايه و النتايج ايه

**Yanouk** · 24-10-2009 09:31 PM

أنا أحب أحييك أولاً على كلامك العلمى وأحب أشكرك على إستجابتك ونصيحتك ومعلوماتك القيمة. أنا يمكن أغير فى خلال الأسبوع ده هاتابعك بالمستجدات والنتيجة. أشكرك بكل صدق وأتقدم لك بخالص إحترامى وتقديرى.

سامى فرحات

الموضوع: تغيير مقاس االكاوتش لهوندا سيتى 2007

LinkBack

أدوات الموضوع

عرض

-

-

-

-

-

المواضيع المتشابهه

عايز اركب انذار لهوندا سيتى 2010

طمبورة كرنك خفيفة لهوندا سيتى

للبيع شدادت وطمبورة كرنك خفيفة لهوندا سيتى

سوست أسبور MaxSpeed لهوندا سيتى للبيع

سوست أسبور MaxSpeed لهوندا سيتى للبيع

الكلمات الدلالية لهذا الموضوع

المفضلات

المفضلات

ضوابط المشاركة