بقولك يا أخى هوا انت دفعت فلوس للناس الموظفين بتوع المرور و لا إيه النظام؟
أصل أنا بصراحة لما عملت رخصة السواقة جبت واحد واسطة و خلص هو القصة كلها لأن بتوع المرور "بدون ذكر اسم الإدارة منعا للإحراج" معقدين نفسيا و قالولى لازم تجيب عربية و صاحب العربية و صك ملكية العربية عشان تختبر
عشان كده جبت واحد واسطة و زهقونى برضوا حتى شهادة التخرج خلونى أمضى إقرار إن أنا حاصل على شهادة التخرج و طلبو منى إن مهندس الفحص يمضى على ورق الرخصة بتاعة السواقة قام المهندس باصصلى و قال لى "هات عربية واقعد جواها و أنا أمضى"
و الراجل دخل لرئيس المرور بس الحمد لله ربنا عداها , دانا حتى رحت أصلى الظهر على ما الرخصة تطلع يعنى عشر دقائق كده فلما رجعت الراجل نده على اسمى فا و أنا بستلمها لقيت الراجل الموظف بيزعقلى بجد و لا لما يكون مأمور القسم و مسك حرامى و بيقولى "هوا إنت كنت فين لما ندهت عليك أول مرة" قلت له "أصلى كنت بصلى فراح مدينى الرخصة من كسوفه!!!"
بس على فكرة انا والله رحت مدرسة سواقة و سقت فيها و مشيت على الدائرى و ركنت و جبت أخويا و اختبرنى و كان كله تمام الحمد لله.
بس بأمانة مشوار المرور ده عامل زى ما يكون واحد واقف فوق موتور أتوبيس العتبة و هو فى نص الطريق عطلان فوق كبرى 6 أكتوبر و هو زحمة الساعة واحدة الظهر و مفيش منزل قبل 2 كيلو.
الغريبة إن و أنا واقف فى كل الموضوع ده ما لقيتش واحد من الناس اللى استلمت رخص معايا اختبر بعربية أو أى حاجة من الحاجات اللى الواحد بيسمع عنها فى الافلام!!! طيب اشمعنى أنا بهدلونى انا و الراجل الواسطة اللى كان معايا مع العلم إنه كان من طرف واحد ""مرعب""
بس مش عارف لما أشترى عربية إنشاء الله , أروح اجيب الراجل الواسطة ده تانى و اللا ترخيص العربية أسهل من رخصة السواقة بصراحة أنا أبيض يا ورد؟!
الحقيقة إن استخراج الباسبورت و البطاقة و شهادة الميلاد يعتبر نزهة فى جزيرة هونولولو بالنسبة لاستخراج رخص القيادة و السيارات من إدارة مرور "تل أبيب"
المفضلات