الموضوع: الموبيلات الصينى ما لها وما عليها _ اراء وتجارب

المشاركة الأصلية كتبت بواسطة maka

انا عارف ان الموضوع مكرر

بس عاوزين نعرف من ملاك الموبيلات الصينى ليه اشتروه ولو رجع بيهم الزمن هيشتروا تانى ولا لا

و عاوزين نعرف من شنورى سر الانتشار للصينى خصوصا فئة k

يا باشا انا اسف اني اتاخرت علي حضرتك في الرد بس عندي شويه ظروف اليومين دول مخلييني مقدرش اتابع المنتدي زي الاول
بس عموما انا مش حقدر اكسفك وححاول اشرح علي قد تجربتي الشخصيه وفهمي الضعيف للموضوع علشان ملقيتش اصلا مراجع ادور فيها
بص يا باشا
حضرتك طبعا عارف ان الشعب عندنا بيقيس كفائه التليفون المحمول بصوت النغمه
و99% من الناس اول حاجه تعملها في التليفون انهم يسمعوا نغماته ومش مهم اي حاجه تانيه
ودا كان اول وتر لعب عليه المستوردين انهم جابوا تليفون صوته عالي وخلاص
ومش مهم اي حاجه تانيه
وبدات تنزل الاجهزه بمسميات غريبه زي الاني كول والنوكلا
واجهزه تانيه بتنزل كوبي من النوكيا الاصلي وياما ناس اتضربت علي قفاها واشترتها بتمن النوكيا الاصلي
يعنر مره واحد اشتري ان 96 صيني ايام ما كان لسه الان 95 النوكيا لسه طالع ودفع فيه 2800 جنيه لمجرد انه افتكره نوكيا وب4 سماعات
================================
نيجي بقي للجهاز نفسه وتكوينه الداخلي
طبعا اول جهاز فتحناه كنت انا واصحابي اللي بيشتغلوا هارد وير
فكيناه وبنبص علي البورده اكتشفنا ان كل حاجه في الجهاز معتمده علي اي سي او اتنين بالكتير
يعني في النوكيا بتلاقي مجموعه للشحن وباور الجهازومجموعه للشبكه ومجوعه للكاميرا وكل حاجه ليها اي سي ودواير مخصوصه لتشغيلها
الصيني بقي كله علي بعضه سلطه عباره عن اي سي مدمج بيقوم بكل العمليات
ودي في حد ذاتها تكنولوجيا متطوره خلتهم يعملوا تليفون في ساعه او في خاتم وبيكون فيه كاميرا وشاشه تاتش وبيقبل ميموري كارد واحيانا خطين
لما بصينا علي لحامات الجهاز حسينا انها ملحومه بمكواه رجل وفيه كتابات غريبه بالايد عليها
وكل ده كان في اول جيل نزل عندنا اللي هو كان بخط او خطين وكاميرا وبلوتوث
ودا كان بيعتمد علي نوعيه بروسيسور اسمها MTK6226
=============================
بعد كده نزلت الاجهزه اللي فيها تليفزيون (C1000-C2000)وارقام تانيه كتير بس اغلبها بيبدا بحرف C
وكانت ضخمه اوي في حجمها
ودي كانت بتعتمد علي بروسيسور متطور شويه اسمه SPD
ومكانش فيه اي اختلاف عن الاجهزه التانيه غير ان دي فيها تليفزيون
وفيه اجهزه تانيه منها مفيهاش تليفزيون ومن اكثرها انتشارا ال ان82 الكوري افشل جهاز صيني نزل مصر
==============================
بعد كده نزل جيل اللي بيبدا اغلبه بحرف (k)
300 و300+ و900
ودي البروسيسور بتاعها تكنولوجيته مختلفه شويه واسمه MTK 6225
وتقربا بتنزل من غير تليفزيون او تاتش
ودي عيوبها اقل من النوعيات التانيه
===============================
نيجي بقي لمشاكل الاجهزه الصيني
90% من المشاكل ان التليفون بيعمل ريستارت اول ما يجمع شبكه وشغل كويس من غير خط
تفسير العيب من الزبون :
كان واحد صاحبي بيبعتلي نغمه والجهاز عمل كده
السبب:
المساحه الداخليه للجهاز اقل من ربع ميجا
فبالتالي اي حاجه بيستقبلها بيتم استقبالها عن طريق الجهاز اولا والجهاز بيبعتها علي الميموري كارد
فلما الميموري الداخليه بتاعه الجهاز بتتملي الجهاز بيعمل ريستارت كمحاوله منه علشان يفضي راماته اللي اتملت بالداتا علشان يعرف يشتغل
فولا منه بيعرف يفضيها ولا منه بيشتغل وبيفضل يعمل ريستارت مدي الحياه لحد ما يتعملله فورمات عن طريق مختص بالسوفت وير
ودا العيب الشائع في اي جهاز من النوع الاول اللي انا قولت عليه (MTK6226)
==============================
الاجهزه اللي فيها تليفزيون
احيانا بيكون التليفزيون بيشتغل من الزرار بتاعه بس وملهوش اي قوايم جوه الجهاز
فلو ازرار باظ خليك عايش مع الراديو لانه مش حيتصلح
طبعا غير عيوب التهنيج انك لما تيجي تفتحه بيثبت علي شاشه الترحيب
وبالنسبه لل ان 82 الكوري فده 90% من محلات السوفت وير بترفضه لاي عيب فيه
لانه بعد ما بياخد السوفت وير بتاعه الجهاز بيقف علي شاشه التاتش ولازم تتغير
يعني حيدخلله في حوالي 120 جنيه تصليح ودا اكتر من تمنه مستعمل
================================
الاجهزه من جيل ال K
انا شايف انها احسن اجهزه صيني ممكن الناس تشتريها لان عيوبها قليله بالمقارنه بالانواع التانيه
ولحد النهارده لو كان جالي 500 جهاز صيني محتاجين سوفت فكان منهم 3 او 4 من النوعيه دي لان عيوبها قليله
================================
في الاول والاخر انا مبنصحش بيها لانها اجهزه غير اعتماديه بالمره
قوه اشعاعها واشارتها وذبذباتها اكبر من النسبه المصرح بيها ودي تحسها لما تلاقي حد بيجيله صداع من كتر الكلام في الاجهزه الصيني
بس برضه هي علي قد فلوسها وتمنها ميزعلش حتي لو الجهاز ضاع او باظ
================================

دول شويه الحاجات اللي جم في دماغي وانا قاعد واكيد اغفلت عن حاجات كتير او قصرت في شرحها لان عندي درجه التركيز =صفر
بس لو فيه اي استفسار عن مشكله معينه او حاجه مش واضحه قولولي وانا اكمل معاكم الموضوع