بصوا يا إخواني مستحيل أن تحقق معادلة الثبات والارتفاع والنعومة في آن واحد ..
الفكرة في ضرورة تقبلك لعنصرين من الثلاثة فقط ..
ويتحكم فيها طول مشوار المساعد ودرجة ارتفاع السيارة عن الأرض ..
الطبيعي إن كل ما مشوار المساعد بيطول ده بيكون ليه تأثير كبير على نعومة السيارة وعدم إحساسك بالطريق ..
وبالتالي هتكون قدام أزمة الثبات ..
لأن لو المساعدين مشوارهم طويل والعربية عالية زي الكورولا الشكل اللي فات .. هتلاقي ثبات العربية زي الزفت .. وكمية الهوا التي تدخل تحت العربية على السرعات العالية بتخليها مراجيح ..
يبقى البديل التلقائي إنك توطي العربية علشان تحس بالنعومة والثبات في آن واحد زي الهوندا والميتسوبيشي .. وبالتالي لا تشتكي إن العربية بتحف في كل مطب بتاخده وإنها واطية لدرجة مرعبة .. وإنك بتكون قلقان جداً لما تركب معاك حد تاني أو في أي حمولة في العربية ..
يبقى البديل الثالث وهو العفشة الرياضية .. حيث العربية عالية تحميك من الاحتكاك في المطبات لكن المساعد مشواره قليل .. وطبعاً علشان المشوار قليل فالطبيعي إن مقاومة المساعد تكون مضاعفة يعني يكون ناشف للغاية علشان مهما كان المطب أو الحفرة اللي هاتخدها متخليش المساعد يخبط في الكارتيرة ويأثر على جسم العربية ..
وهذا هو سبب الإحساس الدائم والمستمر بنشوفية العفشة ..
يبقى طالما بنتكلم في عربيات في هذه الفئة عملية التوفيق الدقيقة جداً بين العناصر الثلاث السابقة متوسطة بخلاف الفئات الأعلى من السيارات التي تتحكم فيها عوامل أخرى لتحقيق الثبات من أنظمة أكثر تقدماً ووزن وتصميم يراعي البعد الإيروديناميكي بكفاءة ..
يبقى لازم تختار عنصرين فقط من العناصر الثلاث ولا تجعلها مصدر شكوى من العربية ..
أضف إلى ذلك في النهاية العامل النفسي .. فالكل اتعود إن نشوفية العفشة دليل على حدوث ضرر على جسم العربية وده يشعر به كل من ركب سيارة ناعمة ..
لكن لو اقتنعت إن هذه النشوفية لا تؤثر إطلاقاً على العربية وأزحت هذا التصور السلبي من دماغك ممكن تستريح وتتعود على كدة ..
وتقبلوا جميعاً خالص مودتي وتقديري
المفضلات