العربية اتدمرت ولله الحمد!

**r0xer** · 25-10-2009 10:53 PM

قدر الله وماشاء فعل قبل اي حاجة

إمبارح تعرضت لحادث فظيع على مصر اسكندرية الزراعي اثناء عودتي من شبين الكوم للقاهرة تحديدا عند نافورة قويسنا.

والسبب في ذلك سيارة فيات ليينا بنمر سودا الله يحرقه وكان ماشي فوق ال160 اكيد اكل غرزة متتاخدش قدامي و لبسني فيه من ورا عند الملف بتاع النافورة بالظبط وراحت العربية لفت مرتين و خابطة في خرسانة الطريق. وطبعا طار ولا كلف نفسه يشوف موت اللي كان راكب دا ولا ايه ! ان شاء الله لو عترت فيه في الجيزة لانه كان ملاكي جيزة بنمر سودا هعرفه يعني ايه اصول سواقة

طبعا محستش بنفسي إلا وناس بتخبط ع الازاز واللي بيستشهد واللي بيحاول يفتح الباب......والمفاجئة كان في ناس بتحاول تقلعني الساعة وانا تايه ومش دريان بحاجة!! وناس تانية بعد مانزلت من العربية بتحاول انها تقنعني اني اصلح عندهم العربية دلوقتي ومش هنختلف و ناس تالتة بتحاول تخليني اسيب العربية واروح اعمل محضر عشان يقلبوها هما!

حسبي الله ونعم الوكيل في البشر دول بجد البلد دي مبقاش فيها ناس محترمة إلا من رحم ربي.

وفعلا لاقيت واحد عرفني بنفسه و قالي اطمئن الاول على جسمك انه مفيهوش حاجة ووراني الكارنيه بتاعه وهو مفتش في مصر للطيران وخلاني استخدمت موبايله لان موبايلي كان فاصل شحن خالص. واتصلت بمعارفي و أقربائي و الحمد لله حركنا العربية بعيد عن الطريق و قفلتها كلها و حاولت اقفل الكبوت بأي طريقة

و تخليص الورق في القسم وعمل المحضر اخد 12 ساعة!!!!!!!

لانهم مش فاضيين يعملوا محضر ولاحاجة هما بس شاطرين يقولو الشاي والقهوة!! مصاريف في القسم حوالي 200 جنيه دا غير انهم اخدو رخصة العربية بحجة انها لازم تتحط مع المحضر ودا تعديل من وزير الداخلية نفسه! لان بعد التصليح لازم العربية يتكشف عليها في المرور من تاني!

المهم خلصت المحضر و الحمد لله وحاولت ادور على ونش يشيل العربية ملقتش وعترت في واحد معاه عربية نص نقل كبيرة شوية و والدي قالي متسوقش حاجة انت وروح وفعلا روحت مع واحد صاحبي في عربيته وبعدين رحت لتوكيل الهياكل عند غبور انتظر والدي ووصل الحمد لله لهناك وكانت الساعة حوالي 8 ولكن رفضوا استلام العربية! قال ايه الناس مشيت وقفلوا

طبعا مكنش ينفع اسيب العربية في الشارع ولاينفع اروحها البيت وتاني يوم ادفع 200 جنيه تاني لعربية تقطرها ولا لونش!

المهم بعد اجراء اتصاليين المشكلة انتهت و الواسطة تلعب دورها طبعا واللي ملوش واسطة ينام في الشارع

وباتت العربية في التوكيل الحمد لله

رحت بقا النهاردة الصبح اشوف هيلاقو فيها ايه وقد كان التالي :

الفوانيس تتغير

الرفرف اليمين

الريداتير و السربنتينة و الجزء اللي بالعرض ماسك الفوانيس دا معرفش أسمه و كذلك طبعا الاكصدام

المروحة مش هتتغير اعتقد لانها متكسرش مجرد بس انها اتريح عليها ترييحة بسيطة ومحصلهاش حاجة

الغريب بقا والمصيبة الكبرى ان راح رفع العربية وبعدين بص كدا وقالي احتمال يكون الشاسيه اتعوج!! ينهار ازرق شاسيه اتعوج ازاي و الخبطة موصلتش حتى للمروحة ياعم المهندس؟ قالي ممكن تحصل عادي ومتقلقش هترجع زي ماكانت

طبعا كان هيغمى عليا بعد ما سمعت الكلام دا وحسيت ان العربية انتهت رغم ان منظرها ميوحيش بكدا خصوصا ان الخبطة كلها جت في الريدايتر و حتى الفوانيس سليمة بدون ولاخدش ولكن البلاستيك اللي حولها اللي ماسكها هو اللي مكسور

العربية متأمن عليها والحمد لله ولكن خايف اوي يكون الشاسيه فعلا حصله حاجة والراجل مبيهجصش وساعتها اكيد مش هيعرفوا يرجعوه زي ماكان ولا ممكن يرجع !؟

وطبعا الحمد لله اني خرجت سليم بدون ولاخدش والشكر لله و اهم حاجة ياجماعة بجد حزام الامان اللي لولاه انا كنت خرجت من الازاز اللي قدام و طيرت لقدام لان الاصطدام حصل على سرعة لاتقل عن 80-90 بالخرسان دا بالإضافة للقوة الناتجة عن لف العربية كام مرة!

لو حد عنده نصيحة ياريت يفيدني لاني حاسس اني مش قادر افكر خالص ولا عارف اعمل اي حاجة

وياريت يكون الموضوع دا افاد حد والدروس المستفادة انك متعملش محاضر ولا اي وجع دماغ إلا لو هتحتاجه للتأمين و اياك ثم اياك تأمن لحد وانت عامل حادثة واهم حاجة ساعتها تركز لنفسك لان كل اللي حواليك غالبا حرامية او اكيد حرامية بلا إستثناء!

والحمد لله اولا واخيرا

**x_gomgom** · 25-10-2009 11:00 PM

الف سلامه و فداك مليون عربيه

**yoko** · 25-10-2009 11:01 PM

حمده على السلامه وإن شاء الله خير
بس أنا مبفهمش في الشاسيهات قوي
ومالهم الي معاهم فيات لينيا

**Samah AbdAllah** · 25-10-2009 11:16 PM

حمدالله على سلامتك
والحمدلله ان لسة فى ناس كويسة مش كلهم وحشيين يعنى
وان شاء الله العربية ترجع زى الاول

**Fadi Ezzat** · 25-10-2009 11:21 PM

حمد اللة على السلامة ياباشا الحمد للة انك خرجت سليم

**M.Osman** · 25-10-2009 11:31 PM

حمد لله على سلامتك يا باشا ... انشاء الله بسيطة و اهم حاجة ان حضرتك سليم الحمد لله

**محمد محمد** · 25-10-2009 11:31 PM

قدر الله وما شاء فعل وحمدا لله علي سلامتك.
انا برده حصلي حادثة في 2007 في مطروح قبل بوابة المدين ب90ك بس الحمد لله الناس في دقائق جابولنا عربية وصلتنا مطروح بس السواق خد 250ج وجابولنا عربية شالت عربيتنا ووالدى رجع بيها علي الحرفيين (كان هو اللى سايق)و جابولنا مية ولقينا عربية اسعاف جاية ماعرفش حد لحق يبلغ ولا جت بالصدفة.
و الحمد لله علي كل حال.