سؤال عن امكانية تركيب حساسات ركن خلفية

**fady_anis** · 26-10-2009 12:28 AM

مساء الخير يا جماعه عايز اعرف امكانية تركيب حساسات ركن خلفيه فى صنى سوبر صالون

2008

وهل من الافضل تتركب فى التوكيل ولا بره ؟

وتكلفتها كام فى التوكيل وكام فى بره؟

وشكراً

**roffa1** · 26-10-2009 01:22 AM

أنا سألت فى التوكيل علشان اركبهم - ولما المهندس عرف ان عربيتى 2010 قاللى ان الفتحات الموجوده فى الاكصدام بتاعى أكبر من من الحساسات الموجوده حاليا فى السوق - وعرض علي انه ممكن يخرم الطبه اللى ساده فتحة الحساس اللى جايه الاكصدام بس انا مرضيتش و قلت انتظر شويه لما تنزل حساسات على أد فتحات أكصدام 2010
أما عن السعر :450 +150 مصنعيه
مع العلم بانه صينى و مفيش منه أصلى -- ولو ركبته بره تخرج العربيه من الضمان لأنك هتلعب فى كهربة العربيه

**fady_anis** · 26-10-2009 10:18 AM

يااااه 600 جنيه يا اما تخرج العربية من الضمان !!!!

**Samir Elshahawy** · 26-10-2009 09:25 PM

انا كنت مركبهم بره الضمان في اللانوس و احسن من اللي بينزلوا في التوكيلات و ب 400 جنيه :
- 4 حساسات خلفية
- شاشة بتعرض المسافة الخلفية بالمتر
- أمكانية بيان الجزء الخلفي الجانبي
- أنذار صوتي و ضوئي

**fady_anis** · 26-10-2009 10:37 PM

كويس جداً يا SE_coralsea بس انا عندى سؤال هل كل حساس ب 100 جنيه ؟؟؟
والسؤال التانى هل 4 حساسات احسن من اتنين ؟

**AHMADKAMAL1** · 27-10-2009 12:22 AM

على فكرة انا لسة مركب حساسات فى التوكيل مودرن موتورز الهايكستب 390 جنية شامل كل شئ وعربيتى سوبر صالون 2009 الشكل الجديد وبتركب فى حلال ساعة

**fady_anis** · 27-10-2009 12:20 PM

طيب كويس جداً يا استاذ احمد كمال مبروك عليك الحساسات
بس انا عندى سؤال انتا ركبت اتنين حساس ولا اربعه؟
وشكراً لمشاركتك

**Samir Elshahawy** · 27-10-2009 01:17 PM

المشاركة الأصلية كتبت بواسطة fady_anis

كويس جداً يا se_coralsea بس انا عندى سؤال هل كل حساس ب 100 جنيه ؟؟؟
والسؤال التانى هل 4 حساسات احسن من اتنين ؟

هو الجهاز كله كان ب 400 جنيه و بيكون عبارة عن 4 حساسات دلوقتي علي ما أعتقد سعره أقل
طبعا الاربعة أفضل لأنه كمان بيعطي أحساس بالزوايا الجانبية للأكصطدام الخلفي يعني مش الخلف و بس

عموما الجهاز ده كنت ركبته من عند توكيل كلاريون اللي في مصر الجديدة

**fady_anis** · 27-10-2009 02:07 PM

انا متشكر جداً يا SE_coralsea على مشاركتك بجد انا استفدت
بس انا من المنصورة

**Samir Elshahawy** · 27-10-2009 02:44 PM

المشاركة الأصلية كتبت بواسطة fady_anis

انا متشكر جداً يا se_coralsea على مشاركتك بجد انا استفدت
بس انا من المنصورة

ممكن تسأل عليه في المنصورة هو ماركة "سيمفوني" و الحساسات منها ألوان علشان تناسب لون عربيتك و كمان ممكن ترشها مع الاكصطدام مافيش مشكلة

و لو مش لاقي الجهاز عندك ممكن اجيبه و أبعته لك و حد يركبه لك هناك لأن تركيبه سهل, بس الافضل أنك تركبه هنا عند "كلاريون" علشان هما نضاف أوي في شغلهم