اريد شراء سياره وارجو المساعده

**barbie2** · 27-10-2009 01:31 PM

خاص بنايل موتورز فقط

المبلغ المتاح / حتي 90000
نوع العربية / يفضل زيرو او استعمال خفيف
شكل العربية / يفضل هاتش باك
الموديل / لا يقل عن2008
إستخدام السيارة فى الاغلب / داخل المدينة -
انتقالاتك بالعربية / فى الاغلب لوحدك - -
الكماليات المرجوة / جميع الكماليات -اتوماتيك
إستهلاك البنزين / مش فارقة
قطع الغيار / - فى المعقول -
اماكن الصيانة / يفضل توكيل -
التفرغ لأعمال الصيانة / - ماعندكش وقت خالص
الاستمرار بالعربية لفترة / هاتستمر بيها فترة طويلة -
سعر إعادة البيع / مش عايز تخسر كتير -

ارجو الاهتمام وسرعه الرد علشان انا بجد محتاره وتعبت من التفكير

**slimbig** · 27-10-2009 04:30 PM

بصي يا ستي انتي عندك شوية إختيارات زيرو فرينج المبلغ الي معاكي أو ممكن اكتر أو أقل كام ألف بس انا مش عارف ميولك رايح لأنهو نوع او كده

نيسان صني 1600 اوتوماتيك سيدان ياباني 93000

تويوتا يارس 1300 اوتوماتيك سيدان ياباني 95900

هيونداي نيو أكسنت 1600 اوتوماتيك سيدان كوري 83900

بروتون جين 2 1600 اوتوماتيك هاتش باك ماليزي 89900

شيفروليه اوبترا 1600 اوتوماتيك سيدان كوري 94500

دايهاتسو سيريون 1500 اوتوماتيك هاتش باك ياباني 93500

رينو لوجان 1600 اوتوماتيك سيدان فرنساوي مش عارف تمنها بس فوق ال 70000

في انواع كمان بس مستقبلها و إعادة بيعها مجهولين, أسعار قطع الغيار في صالح الكوري و عمرها في صالح الياباني (طبعا في عربيات أوروبي معمره اكتر بس فرينج تاني) اوبشنز العربيات المذكوره تختلف بس مقدرتش اكتبها, عيوبها و مميزاتها تقدري تشوفيهم في المنتديات الخاصه بكل نوع, قبل متشتري تروحي المعارض و تتفرجي عليها و تركبيها و تشوفي عجباكي ولا لأ و فكري على مهلك و إسألي عنها كويس جدا (متسأليش أي حد لازم ناس فاهمه و مش منحازه لنوع لمجرد امتلاكه)

نصيحه مهمه جدا لو حتشتري مستعمل اكشفي عليها فالتوكيل

نصيحه أخرى
لو حتشتري مستعمل اكشفي عليها فالتوكيل

حطي إيدك على قلبك و قولي حكشف عليها فالتوكيل

و متخليش المعرض يرخصلك العربيه ابدا العيال الي بتوديها تترخص بتفتري عليها حرق و جري و بهدله كإنها مال يهود

اللهم بلغت اللهم فشهد

و ربنا يوفقك للإختيار الأصح

**slimbig** · 27-10-2009 05:15 PM

إضافه

رينو سيمبول 1.4 اوتوماتيك سيدان 90000

**barbie2** · 28-10-2009 09:40 AM

اولا شكرا علي الرد بس انا كنت بفكر في البريليانسfrv بس ناس كتير بتقولي بلاش الصيني هيه عجباني جدا ومش عارفه اعمل ايه كمان كنت شوفت عربيه اوبترا هاتش باك بس شفتها مره واحده بس ومش لاقيه حاجه عنها علي النت مش عارفه اذا كانت موجوده ولا لا وممكن الاقيها فين ياريت لو حد عنده اي معلومات عنها يقولي

**slimbig** · 28-10-2009 10:40 AM

المشاركة الأصلية كتبت بواسطة barbie2

اولا شكرا علي الرد بس انا كنت بفكر في البريليانسfrv بس ناس كتير بتقولي بلاش الصيني هيه عجباني جدا ومش عارفه اعمل ايه كمان كنت شوفت عربيه اوبترا هاتش باك بس شفتها مره واحده بس ومش لاقيه حاجه عنها علي النت مش عارفه اذا كانت موجوده ولا لا وممكن الاقيها فين ياريت لو حد عنده اي معلومات عنها يقولي

البريليانس أول مظهرت عملت ضجه جامده و انا واحد من الناس كنت عايز اقسطها ولكن .....
سعر العربيه اتحول بقدرة قادر من 67 الف ل 75 الف ل 83 الف و دي المانيوال الكامله ال1600 و سبحان المالك الأوتوماتيك نزلت ب 90 ألف !!!!!!! و ده مش سعرها خالص ده عرض و طلب السوق العربيه معقوله على كلام الناس الي جابوها بظهور بعض العيور الثانويه فيها, ال 1300 دلوقتي تمنها 75 الف وفالنهايه العربيه بقت غاليه جدا على فئتها و دخلت في شريحة عربيات تانيه أحسن بدون كلام يعني مثلا gen2 تاكلها (اوعي تجيبي gen2 مستعمل) هاتي موديل 2010 عشان كان فيها عيوب اتظبطت, ده غير ان ناس معرفه فالتوكيل قالولي بلاش دي و مرضوش يقولو ليه بظبط ففهمت ان فيها حاجه كمان

لو قصدك الأفيو الهاتش باك فبلاش بردو الأفيو فشلت بمراحل بظهور عيوب متتاليه فالزيرو !!!!!! و انعدام الإتزان على سرعات فوق ال100 و طبعا أي عربيه مبيتشوفيهاش كتير معنى كده ان قطع غيارها حتبقى صعبه (خارج التوكيل على الأقل) فخلي بالك و حاولي تفكري فعربيه منتشره عشان تبقى إعادة البيع سهله لو حبيتي تبيعي و قطع غيارها فكل حته و ربنا يوفقك للإختيار الأصح

**barbie2** · 28-10-2009 12:33 PM

لا مش افيو اللي شوفتها اوبترا هاتش باك وشكلها جامد جدا بس مش عارفه ليه مش منتشره

**slimbig** · 28-10-2009 12:54 PM

انا سمعت عنها أخويا شافها و قالي شكلها حلو بس للأسف معرفش عنها أي حاجه ممكن تكلمي التوكيل تسألي و شوفي قسم الشيفروليه انشاء الله الأعضاء يفيدوكي و يقولولك مش منتشره ليه و خير بإذن الله

**محمد أنور** · 02-11-2009 02:19 PM

الاوبترا الهاتش باك موجودة كتير بس على هيئة تاكسي العاصمة .. قليلة جدا ملاكي عشان الشعب المصري يحب السيدان عن الهاتش باك .. الا اذا كان حد غاويها و اكثرهم بيكونوا شباب ..
لو عاوزة عربية هاتش باك حلوة عندك الهيونداي جيتس الاوتوماتيك بفتحة سقف تقريبا ب78 الف ومن غير فتحة سقف ب75 .. وعالاقل مش صيني و الناس اللي معاهم بيشكروا فيها جدا
و انا بصراحة كانت عجباني الميتسوبيشي كولت ال2007 و كان كفاية انها نازلة بموتور مايفك زي اللي بينزل في اللانسر شارك .. بس للأسف محصلش عليها اقبال و متباعتش لقلة قطع غيارها في السوق و تقفيلها الهولندي (مش ياباني) و اول ما نزلت في سنة 2007 كانت ب 129 الف و بعدين نزلت ل 90 باين و في الاخر كانت بتتباع زيرو من التوكيل ب 82.5 ..
لو ليكي في اليوسد ممكن تدوري على ميجان هاتش باك .. تحفة بجد !! و هتعمل في الرينج ده موديل 2006 او 2007 بس طبعا لازم يتكشف عليها في التوكيل و لازم تعملي في الحسبان قطع غيار الميجان مش رخيصة ..
عندك كمان البيجو 307 .. ممكن تلاقي حاجة يوسد في الرينج ده موديل 2007 بس من غير فتحة سقف بتعمل تقريبا من 80-85 و قطع غيارها مش رخيصة برضو
ربنا يوفقك و انا لو مكانك و عاوز هاتش باك هشوف الجيتس زيرو او الميجان هاتش باك