قبل اى شئ انا عايز اقول ان البشمهندس طارق زويل راجل قمه فى الادب والاخلاق واللباقه و الاحترام
بعد ما وصلت التوكيل لتغيير الزيت الراجل تفضل مشكورا استقبلنى فى مكتبه وعطلته عن شغله فتره كبيره جدا واتكلمنا كتير وكنت مستمتع جدا بالقعده معاه وحاسس بالذنب جدا علشان معطله
كذلك البشمهندس محمد الراجل الخلوق رائع الذوق اللى نزل معاى وضيع كتير من وقته مع العربيه لحد ما خلصت
جزاك الله خيرا يا بشمهندس على خدمتك واستقبالك الجميل وشكرا جزيلا للبشمهندس محمد على تعبه معاى
نيجى بقا للعربيه
عربيتى عامله حاليا 49 ألف كيلو وبدايه من من بعد الاربعين وانا حاسس ان اداء الفتيس بيقل عن الاول وبيبقى خشن
اول الملاحظات كانت ان اول دقيقتين من الحركه الفتيس خشن فى التعامل ونقل الغيارات وبعدين يبقى كويس وبعد شويه تانى من الاستعمال وتحديدا لما الفتيس يسخن تبدأ الاعراض تظهر تانى
اول الاعراض صوت معدنى خفيف اسمعه وانا بحرك العصايه وانقل وكأنها بتتحرك من غير تزييت وبتخبط
ثانى الاعراض كان خشونه فى النقل تظهر بشكل واضح فى تسقيط الغيارات من الثالث للثانى او من الثانى للأول ( تسقيط عادى مش حرق يعنى ) وكان كتير العربيه بالذات فى النقل من الثانى للاول تاخد الغيار بصعوبه وساعات العصايه تقف قبل ما تاخد الغيار علطول وارفع انا رجلى تلقائى وتسمع اسوء صوت لتخبيط التروس
فقررت انى اغير الزيت علشان اتفادى اى مشاكل والحمد لله تم تغيير الزيت والفاتوره كامله 175 جنيه فقط
بعد الزيت كل حاجه رجعت زى الفل , الغيارات ناعمه جدا والتسقيط مفيهوش مشاكل سواء كان الفتيس سخن او بارد
حركه النقلات بقت صامته من غير صوت وفى تحسن فى التسارع ومش عارف ده تهيئات ولا بجد واصبح المشى فى الزحمه اكثر سلاسه بعد ما كان كثره تبديل الغيارات الاولى للعربيه عذاب
انصح اى حد عنده المشكلات دى بتغيير الزيت وهيلاحظ فرق كبير
المفضلات