بعد انقطاع لفترة وجيزة اخيرا جه الوقت اللى هاعترف فيه بأجمل قصة حب،اللى بيقولوا عليه حب من اول نظرة
من اول يوم شفتها وانا قلبى حبها ومُت فى عشقها كنت فى طريق رجوعى من الجامعة كانت واقفة فى الطريق عند الروبيكى كدة-منطقة ما بين العاشر من رمضان ومدينة بدر عليها اللحمة-بس عليها حتة جسم انما ايه تحفة.جمالها فاجر وعيونها قاتلة وجاذبيتها جاحدة من ورا ومن قدام بس المظهر مش مهم المهم النسب
ماعلينا ؛من اول يوم شفتها حلفت لأعرف اسمها وبدأت اعرف عنها شوية حاجات كدة واول حاجة لاحظتها إن الكل بيشكر فيها يعنى زى ماتقولوا مافيهاش عيب وفجأة وأثناء بحثى لقيت فيها شوية عيوب بس عيوب قاتلة خلت دماغى تجيب وتودى وتروح وتيجى
ولأول مرة تضطرب مشاعرى من ناحيتها
للأسف شفت كام بيرسون - يعنى شخص ..اتعلموها بقى - شافوها قبل كدة لقيتهم بيقولوا إن قوايمها ضعيفة وفارغة من جوة وإن ماتورها متركب كدة اى كلام كأنهم ركبوه وهما مستعجلين وهو ده اللى هز مشاعرى وسحاسيحى وحسيت ان انا اتصدمت فيها
بقى كدة يابريليانسFRV
بعد ما وثقت فيكى وعرفت ان انتى من العيلة البافارية واللى سمعتها زى الفل تطلعى كدة
دلوقتى بس بدأت مشاعرى تتجه للحب القديم>>>>>>>>الفورد فييستا دى بقى قشطة جدا ومن يونايتد ستاتس اوف امريكا..كا..كا يعنى بنت ناس وتعتبر سيارة احلامى بعد المورانو و السيتروين سى5 واحسن حاجة فى المورانو والسى5 انهم رخاص اوى يعن ب800000 تمنميت الف بس
يابلاش وده اللى مخلينى مافكرش فيهم
ام هند؛ هاقولك حاجة ياFRV
الحق مش عليكى الحق عليا انا انى وثقت فى عربية صينى
ودى كانت نهاية قصة سعيدة بحالة مآساوية وبداية قصة جديدة ستكتمل جوانبها قريبا ان شاء الله لنعيش انا وهى حياة هادئة جميلة بدون مطبات او طرق مسدودة
ونصيحة من اخوكم ابقوا اطأسو كويس عن فتاة قصدى سيارة احلامكم بدل ماتعيشوا فى الوهم زيى وتنضافوا معايا فى ضحايا الحب:
روميو وجولييت
كلينتون ومونيكا
ساركوزى والبت الايطالية
واخيرا محمود وبريليانس
القصة دى لاقيتها فى مذكراتى القديمة ...من اكثر من سنة تقريبا وحبيت اكتبهلكم علشان تشوفوا الاسلوب اللى ضيع مفردات اللغة:ma: