الموضوع: اتوس الجديدة يا جماعة، ايه ظروفها ؟

لو عاجباك هاتها و بالتوفيق ان شاء الله
انا معايا i10 و الحمد لله زى الفل و انا عن نفسى بحب السبارك كمان
اعتقد ال i10 تتفوق على الاتوس بس اكيد مش بفارق كبيير و بالتالى و عجباك الاتوس هاتها

ال i10 معايا مستحمله و زى الفل استهلاكها فى الزحمة مع القرص الكتيير و التكييف بتعمل 260-280 كم فى الصفيحة
اما فى السفر توصل ل 380 كم فى الصفيحة بس على سرعة 80 او ازيد شويه
لكن سرعات فوق ال 100 مثلا 120 كأنك ماشى جوا البلد فى الزحمة و مفيش اى توفير يذكر

بالنسبة للاستحمال هتستحمل متقلقش انا هقولك كام حاجه حصلولى و انت احكم:
1- جريت فى طريق مدغدغ و عديت سرعة 60 فيه كله طوب و زلط و رمل و حفر و العربية طلعت زى الفل (كانت تصغير دماغ مع واحد)

2- اترزعت فى مطب فى العين السخنة لانى جريت مع واحد صاحبى ب جيتز اتوماتيك (و عديت منه على التانى ) و لما لقيت المطب ضربت فرامل و العربية اترزعت و طلعت سليمه و كنا 3 فى العربية

3- اترزعت منى على طريق الماظه و انا على 100 بسبب حته منخفضه على جانب الطريق زى دايره لتحت بسبب واحد بفيرنا كان جنبى معرفتش افاديها

4- اترزعت من اسبوعين كده فى بلاعه مربعه بارزه حوالى 20 سم و كنت على سرعة 60-70 و كان فى صوت خبطة فى الارض و الحمد لله طلعت سليمه

ده بخلاف البلاعات و التكسيرات و خلافه فى شوارعنا الجميلة

انت طبعا افتكرتنى مقضيها ترزيع بس العكس تماما انا بحاول اتعامل معاها برقة و عطف و مش بمشيها فى طرق مكسره قدر الاستطاعة

العربية عمرها ما عملت معايا حركة ندالة بس عومت منى من يومين فى غرزه غبيه على حوالى 70 علشان كسرت جامد يمين فى شمال بين عربيتين و الارض كانت كلها رمل و تراب ناعم على يمين الطريق بس العربية طلعت جدعه و التزمت بحارتها اللى فيها و مدخلتش فى حد كتر خيرها و يمكن ضغط الكاوتش مش مظبوط فيها ده غير انى مغير كاوتش معلى العربية 1.5 سم و ده كتيير عليها

الكلام اللى انا قلته ممكن يمشى على الاتوس لحد كبيير و اعتقد مفيش منها مشاكل و كمان استهلاك البنزين ليها قريب من ال i10 اوى لانهم نفس المكنة

هوريك الاستهلاك بالصور علشان اللى مبيصدقش نرتاح منه

فولت و عملت مشوار فى الزحام و بدأت السفر و العداد عند حوالى 50 كم

الظروف
متوسط سرعة 80 الى 85 كم/س
التكييف شغال
الساعة 12 ظهرا جو مشمس
عدد الركاب 2 + تحميل 3 شنط و حاجات على الكنبة

دى قرأة العداد فى وسط الطريق (للعلم هو بيكون فوق ال Full عند التفويل) و بالتالى هو كده ناقص متستغربش.. العداد على 100.6 (نجوم اف اكس)

بعد الوصول العداد على 190 كم

اثناء العودة ليلا بدون تكييف العداد 221 كم

وصلت الحمد لله على 305 كم

و بعد مشوار كمان على طريق السويس 340 كم

بعد مشوارين فى الزحمة عامله 378.4 كم و التفويلة قعدت لحد 522 كم


اما بقى مع الحرق الكتيير و الرجل التقيلة فى الزحام و بعد تركيب سماعتين ورا خلونى محسش بدواسة البنزين عامل 360 كم و البنزين هيخلص بس التفويلة قعدت لحد 457 كم متقلقش

ملحوظة: ممكن واحد تانى يسوق العربية و يعمل 200 كم فى الصفيحة على طريق سفر أنا مش مسئول و بخلى مسئوليتى

كمان العربية مش مترصصه بعد تغيير الكاوتش و على سرعة 140 كم/س فيها اهتزازات عاليه شويه دا لما بتجيبها بطلوع الروح اصلا

و للعلم العربية استهلاكها كان افضل من كده قبل ما اغير الكاوتش لواحد اعرض

و دى صورته علشان الناس اللى بتصدق
اظن واضح

كانت عندى واحدة موديل 2008 اكتر من رائعه. كل يوم بامشى اكتر من 120 كم نصهم زحمة والباقى طوالى وزى الفل.
عربيه ضامن ان كل يوم الصبح تنزل تدورها هاتدور على طول وبلا اى مشاكل--- اعمل صياناتك فى مواعيدها والعربيه هاتصونك هى كمان

بجد تحفه فعلا