الموضوع: التيربو والسوبرتشارجر

كثر الحديث في الفترة الأخيرة عن بعض السيارات اللي نزلت مصر مزوده بتيربو

سؤال يطرح نفسه:

ليه كل شركات التصنيع بدل ما تستخدم مواتير سعتها اللترية كبيرة كانت استخدمت تيربو أو سوبر تشارجر وبذلك تبقى وفرت في استهلاك البنزين وحلت المعادلة الصعبة اللي هي عربية قوية جدا واقتصادية جدا؟؟؟

الجواب بكل بساطة (في رأيي الشخصي)
ان استخدام أي وسيلة من forced induction بتزود الحمل بشكل ملحوظ على مكونات الموتور مما يؤدي الى قصر عمره يعني لو السيارة العادية عمر مكوناتها الافتراضي 200 الف كيلو (مثلا) النسخة منها المزودة بتيربو حيكون عمرها الافتراضي 100 ألف كيلو( الأرقام دي مجرد أمثله) حتى لو تم تزويد مكونات الموتور بخامات أقوى.

بالاضافة الى ان التيربو له بعض المشاكل في القيادة وهي Turbo lag بمعنى ان التيربو بيعتمد في تشغيله على ضغط الهواء من الشكمان اللي بيدور تربينة الهوا ، فبالتالي انت مبتحسش بقوة التيربو الا بعد فترة من الضغط على دواسة البنزين على ما التربينة تجمع بوست. التأخير ده بيكون مشكلة كبيرة جدا جدا في القيادة البطيئة في الأماكن المزدحمة لأنك بتلاقي العربية ميته وتقيله قوي ومرة واحده تلاقيها نطت وجاتلها قوة خارقة. وعشان كده اخترعوا التيربو المزدوج Twin Turbo اللي بيكون عبارة عن 2 توربينه لضغط الهواء تعملان عند لفات موتور مختلفة يعني مثلا واحدة بتدي أقصى انضغاط ليها عند 1500 لفة ، والتانية عند 3000 فما فوق فبالتالي يبقى غطى معظم ال RPM range

كما تم عمل أنظمة ضد التأخير anti Lag System

ولكن كل هذه التحسينات فقط حسنت من وقت التأخير ولم تلغيه.

على العكس من ذلك السوبر تشارجر اللي أثبت كفاءة كبيرة في موضوع عدم وجود تأخير لأنه عبارة عن كمبريسور هواء متوصل مباشرة على الموتور سواء بمجموعة تروس أو سير فاضغط الهواء بيتم بشكل لحظي وسريع. ولكن يعيب هذا النظام انك متقدرش ترفع البوست ( أو نسبة الضغط) الا لحد معين عشان كده هواة التعديلات القوية بيتجهوا للتيربو عشان بيقدروا يزودوا الضغط فيه لأرقام كبيرة.

الكلام ده تلاقيه واضح جدا في سياسة شركة زي مرسيدس، يعني متلاقيش سيارات مرسيدس تيربو الا السيارات السوبر رياضية، انما باقي السيارات لما حبو يحطوا فيها forced induction استخدموا سوبر تشارجر Kompressor

مشكلة أخرى في استخدام التيربو والسوبر تشارجر، هي ان نتيجة الضغط الزائد في السلندرات لا يمكن استخدام بنزين الا ذو اوكتان عالي يعني مثلا لو العربية العادية بتستخدم بنزين 90 أو 92 النسخة التيربو لازم تستخدم 95 ولو زودت الضغط بشكل كبير يبقى لازم تستخدم بنزين خاص بالسباقات

شكرا على المعلومات ممتازه