ماتش مصر و الجزاير و افتكاسات

**OlaOsman** · 29-10-2009 07:42 PM

ماتش مصر و الجزاير المرتقب عامل حالة من الاستنفار على جميع الأصعدة.. طيب ما تيجوا نخرج من جو التوتر و الشدة ده شوية بإننا نفتكس شوية سيناريوهات لما قبل و أثناء و بعد الماتش

يعني مثلا أنا باتوقع إن الاستنفار الأمني هايكون على أشده لدرجة انك مش هتلاقي و لا عسكري مرور في الشارع.. الداخلية كلها هاتبقى في الاستاد

بالنسبة للإذاعة و التليفزيون فهايبقوا شغالين أغاني وطنية 24 ساعة و مش بعيد نلاقيهم بيذيعوا أغنية يا أهلا بالمعارك

طبعا مفروغ منه إن يوم الجمعة اللي قبل السبت 14 نوفمبر هتلاقي كل الخطباء على المنابر في خطبة الجمعة بيدعوا لنصرة الجيش.. قصدي المنتخب المصري في معركته مع المنتخب الجزائري و بيدعوا لهم بإحد الحسنيين، إما الفوز بفرق هدفين أو الفوز بفرق 3 أهداف عشان هو أصلا الفريق المصري ما ينفعش معاه غير كده عشان يتأهل

حد عنده سيناريوهات مطرقعة تانية نخرج بيها من جو الشحن الغير طبيعي ده؟

**aif** · 29-10-2009 07:51 PM

واثناء المباراة تلاحظي حاجات غريبة من المتفرجين .... اقصد في البيوت والقهاوي
يعني مثلا لو ابو تريكة ضيع جول سهل .... تلاقي الزملكاوية بيقولو .... امال بس عامل سبع ف الاهلي .... والله مابيعرف يلعب ده بس محظوظ
لما هاني سعيد يقلش ويتسبب ف هجمة خطيرة ...تلاقي الاهلاوية يقولو .... الجدع ده ايه اللي خلاهم يلاعبوه هنا اساسا .... ده احمد السيد برقبة اللي خلفوه
...
للأسف ماحدش بيقدر ينسى التعصب للنادي بتاعه حتى في اصعب المواقف ..... كله بيتفرج على الماتش حسب لون اللاعب اللي بيلعب
انا عموما ح اسمع الماتش في الراديو .... وغالبا راديو العربية كمان

**aif** · 29-10-2009 07:56 PM

المشاركة الأصلية كتبت بواسطة olaosman

م
طبعا مفروغ منه إن يوم الجمعة اللي قبل السبت 14 نوفمبر هتلاقي كل الخطباء على المنابر في خطبة الجمعة بيدعوا لنصرة الجيش.. قصدي المنتخب المصري في معركته مع المنتخب الجزائري و بيدعوا لهم بإحد الحسنيين، إما الفوز بفرق هدفين أو الفوز بفرق 3 أهداف عشان هو أصلا الفريق المصري ما ينفعش معاه غير كده عشان يتأهل

انا اتوقع عكس كدة
ح تلاقي كل الخطباء بينتقدو اهتمام الناس بالكورة وابتعادهم عن الامور الاهم
...
ح يقولو ... يعني الشعب المصري والشعب الجزائري يكادو يتقاتلو علشان الكورة ...... امال ساعة لما بنقول المسجد الاقصي بينتهك وبيعبث به .... تلاقي الكل مطنش وماعندوش وقت ومشغول
....
انما يدعو للفريق المصري .... ممكن الجامع اللي جنب بيت حسن شحاتة بس

**د.محمود صلاح** · 29-10-2009 08:06 PM

الجو مكهرب جامد وربنا يلطف بنا فى اليوم ده

**Islam_galal** · 29-10-2009 08:36 PM

أنا بدور علي كام مشوار أعملهم ، دي فرصة مش حتتعوض
أو أخرج مع الأسرة و نقعد علي البحر شوية

**Islam_galal** · 29-10-2009 08:44 PM

زيارة للوالد و الوالدة
التسوق من فتح الله و كارفور و أي هيبر
التمشية علي البحر
الجلوس في مطعم
الجلوس في كافيتريا
الذهاب إلي النادي
كل دي أفكار و في غيرها كتير
و أهم حاجة ذكر الله و الناس عن ذكر الله غافلين

**M.Osman** · 29-10-2009 08:47 PM

المشاركة الأصلية كتبت بواسطة aif

واثناء المباراة تلاحظي حاجات غريبة من المتفرجين .... اقصد في البيوت والقهاوي
يعني مثلا لو ابو تريكة ضيع جول سهل .... تلاقي الزملكاوية بيقولو .... امال بس عامل سبع ف الاهلي .... والله مابيعرف يلعب ده بس محظوظ
لما هاني سعيد يقلش ويتسبب ف هجمة خطيرة ...تلاقي الاهلاوية يقولو .... الجدع ده ايه اللي خلاهم يلاعبوه هنا اساسا .... ده احمد السيد برقبة اللي خلفوه
...
للأسف ماحدش بيقدر ينسى التعصب للنادي بتاعه حتى في اصعب المواقف ..... كله بيتفرج على الماتش حسب لون اللاعب اللي بيلعب
انا عموما ح اسمع الماتش في الراديو .... وغالبا راديو العربية كمان

مش كل الناس و الله يا استاذ..
انا مثلاً بتابع الماتشات الدولية بس لمصر و معرفش حاجة عن الدوري و لا اللاعبين !!

اتمنى الفوز لمصر... بس المهم لو صعدنا هنعمل اية في كأس العالم؟؟!!؟