الموضوع: لم اجد الايدل كونترولر فى سيارتى نوبيرا

بالمناسبة .. في مزيل صدأ أمريكي في زجاجة لونها أصفر وبـ10 جنيه .. هاتجيبه وتحطه في مية الرادياتير وتقفل الغطا وتشغل العربية على السلانسيه مدة من 10 دقائق إلى 20 على الأكثر .. وإياك وقيادة السيارة .. وبعدها تبطل العربية وتستنى فترة كده على مالعربية تبرد .. وبعدها تفك الخرطوم اللي رايح على القربة وتخليه طالع برة العربية وتجيب خرطوم مية موصل بالحنفية وتحطه في القربية وتفتحه وتدور العربية .. وثواني هاتلاقي الخرطوم بتاع الرادياتير بيطلع كل الصدأ والبلاوي والأملاح اللي كانت فيه ..
تفضل مستمر في العملية دي لحد ما المية يبقى لونها طبيعي .. بطل العربية .. فضي المية بتاعة الحنفية اللي في الرادياتير عن طريق فك الطبة بتاعته أو فك الخرطوم السفلي اللي داخل عليه .. ولما تفضى تماما .. حط المية الخضراء بتاعتك .. بس .. آدي كل الحكاية !