بص يا اخ akeka0000 انا هقول لك وجهة نظرى واللي طبقتها على نفسي
انا جايب البيتلز بتعتي بعد ما عملت حسبة صغيرة
حسبت تكلفة المواصلات للمشاوير العادية اللى بقوم بيها بصفة دورية زى الزيارات الاسرية مثلا ومدارس الاولاد
وحسبتها فى الثلاث سنوات ممكن تتكلف كام
وحسبت برضه متوسط تكلفة العربية خلال الثلاث سنوات كام ودى جبتها من ناس عندها بيتلز من المنتدى هنا
بس بشرط ان الاساسيات تكون سليمة ويادوب الصيانة العادية بس والبنزين
وجمعت عليهم ثمن العربية وثمن تجديد الرخصة ثلاث سنوات
وقارنت مبلغ المواصلات العادية مع مبلغ العربية
لقيت ان تكلفة العربية ارخص
بس خللي بالك انا مشاويري فى منطقة فيصل مع الاولاد مستحيل تركب غير تاكسي
علشان كدة العربية اوفر كتير
بالنسبة لموضوع الاحلال والتجديد
حتى لو خدوا العربية ومدونيش فلوس
انا الكسبان رحت كل مشاويري لمدة ثلاث سنوات وانا مرتاح وبتكلفة اقل من المواصلات
بس متنساش تجدد ثلاث سنوات اول ما تاخدها حتى لو فيها سنة كمل الثلاثة
علشان هما لو نفزوا موضوع الاحلال مش ممكن يلغوا الترخيصات اللى طلعت
ولو ادوك 5000 جنيه وعربية بالقسط
يبقي انتا خسرت 5000 من ثمن العربية ودى متحسبهاش خسارة لان انتا هتتكلف مواصلات اكتر بكتير فى الثلاث سنوات
فى حاجة كمان انا فكرت فيها
لنفرض انك جبت عربية موديل حديث السنة دى وبعتها بعد ثلاث سنوات
هتخسر كام
اولا هتخسر من 5000 الى 7000 من ثمن العربية سنويا
ودى حصلت مع صاحبي عنده فيرنا موديل 2007 جايبها 64000 وعارضها على 49000 ومش راضية تتباع ومبيركبهاش من ساعة ما جبها
غير مشاوير بسيطة وحالتها كانها لسة مستلمها
يعنى خسر 15000 فى ثلاث سنوات غير ثمن التامين حوالى 5000
يعنى 20000 غير الصيانة العادية بتاعتها طبعا بتتكلف اكتر من البيتلز بكتير
بأختصار
البيتلز مش هتخسرك لو تكلفة مشاويرك اكبر من تكلفتها
احسبها كويس وتوكل على الله
واعمل اللى يناسب ظروفك
بس متتغرش بشكل العربية اهم حاجة الموتور والاساسيات علشان تريحك ومتكلفكش بعد كدة
معلش طولت عليك
لانى حبيت اكتب الموضوع مفصل علشان تستفيد اكتر
وربنا معاك
-------------
محمد سالم
المفضلات