مناخ مصر بأه غريب ..
عرض للطباعة
مناخ مصر بأه غريب ..
للعلم فقط الابييض اللي بيينزل ده اسمو سقيع مش ثلج
مش عارف اقول ايه يا ايفو ...يا بختك ولا انت مابتحبش الجو ده؟
بقالنا كتير في مصر الشتاء مش شتاء تحس ان الشتاء كاشش اوي مابيطولش يعني
إحنا كنا امبارح في العين السخنة و خدناها امبارح صح و احنا راجعين ع الطريق. أخويا ماكانش شايف حاجة من غزارة المطرة و مشغل المساحات على آخر سرعة، طبعا المطرة مع السرعة ع الطريق ده كان حاجة مرعبة. بس الحمد لله ربنا ستر.
دخلنا بأه القاهرة لقينا السما صافية و الشوارع ناشفة و الدنيا بيييييييييييس :120105~352:
المفروض تفرحو لان دا اولا خير
ثانيه علشان الارض الشتا دا من جوه سخنه جدا جدا لان الصيف بتاع السنادى كان حار بشكل فظيع ودا كله بيعمل احتباس تحت سطح الارض وكان ممكن يؤدى لكوارث مناخيه وجغرافيه
ياه يا ايفو فكرتنى بأصعب ليلة تقريبا فى حياتى و انا مكنتش قادر و لا عايز اتكلم ، امبارح انا كنت حاسس انى بحلم بجد ، كنت رايح العياط على المغرب كده و الاسوأ انى كنت واخد طريق المريوطية مش مصر اسيوط كمان ، ابتدت ببرق قبل البدرشين و بعد البدرشين الطريق رايح جاى و ابتدى الغرق ،كنت ماشى حوالى 40 كم/س و قدامى عربية جامبو و قدامها مقطورتين و مرة واحدة الطريق وقف قدامى كله و مفيش حاجة جايه من المقابل رحت ماشى فى الشمال و سواقين النقل طابور اكتر من 8 مقطورات قاعدين يزعقولى و يشوحوا و بسأل فيه ايه قالولى مقطورة غرزت و مقطورة جايه فى وشها و الطريق مقفول ،الكلام ده عند دهشور كده ، ربنا كرم و السواقين نزلوا سلكوا السكة بعد حوالى ربع ساعة ، و كان باقى حوالى 12 كيلو على البلد و كانوا اسوأما فى الموضوع ، و الله العظيم كنت بطلع ميه من الكبوت قدام العربية ، طبعا النور كله قطع فى حوالى 3 مراكز بالقرى بتاعتهم و والدتى قاعدة بتعيط و لا عارف ارجع و لا عارف اوصل البلد ، الحمد لله ربنا كرمنى و طلعت على مصر اسيوط و نفس الحال اكتر من 6 عربيات كلها عطلانة على جنب الطريق و الطريق ماشى حارة واحدة بس عشان الحارة التانية واطية وغرقانة برك مياه طبعا احنا قافلين الازاز كله عشان الميه كانت بتوصل للسقف بدون مبالغة و الله ، الدنيا ضلمة كحل و الجدع يعرف يعنى ايه النور يقطع فى الارياف ، الحمد لله وصلت و محدش من قرايبى كان عارف انى جاى و محدش كان مصدق انى مشيت فى الجو ده قعدت لبعد الساعة 10 بالليل و النور كل ده قاطع و جينا ماشيين الناس عزموا علينا ووالدتى مش عايزه تمشى و اعتذرت للناس عشان شغلى الصبح ، توكلت على الله و مشيت بعد ما الجو هدى خالص و مفيش مطر و لا برق و لسه بقول يا هادى بعد حوالى 8 كيلو الاقى شبورة غريبة نزلت على الطريق و بتزيد بغباء و الطريق اغلبه ملاكى القاهرة و الصعيد و محدش عارف السكة و كله ماشى ورايا و مستنجدين بالله و بيا عشان حافظ المطبات بالواحد ، بلدنا بقه :) و مفيش بعدها ب 4 او 5 كيلو تقريبا الشبورة زالت تماما و الطريق نوعا ما ناشف و الناس على جنب الطريق بالهبل مفيش مواصلات طبعا و عينك ما تشوف الا النور 100-120كم/س مبقتش مصدق و شوية الاقى ناس على جنب الطريق الناحية التانية و عربية نوبيرا وان نازلة تحت مقطورة جرار زراعى شايل طوب و العربية متدمرة و المقطورة عجلها طاير من الخبطة ، الحمد لله كل ما اقرب من المنيب الجو تمام و البحر الاعظم و لا نقطة مياه و الجو حر و زى الفل ، طبعا مقلكوش على شكل العربية و الناس كلها بتبص باستغراب جاى من الصحرا ده و لآ ايه ، دخلت بنزينة شل فى الهرم الراجل جاى يمسح بصللى و ضحك مرضتش اكسفه و خليته يمسح بس للأسف الفوطة اتمرمطت ، الحمد لله روحت و ببص على شكل العربية مسخرة :) و بفتح الكابوت قلت اشوف التطورات اللى حصلت لقيت الطينة جنب غطاء الزيت على وش الموتور :) الحمد لله اننا وصلنا بالسلامة و بأمانة العربية دى (اكسنت 2005) مكنتش متصور انها ممكن تستحمل كده بعد كمية العربيات اللى عطلانة فى السكة ، انا اسف طولت عليكم بس بجد كانت مأساة :)
حمدا لله على السلامه
انا قبل المطره الجامده والثلج ده كنت جاى من العتبه اوتوستراد وقلت اكمل اوتوستراد 15 مايو وطريق الكريمات
لقيت الطريق التانى مقفول برضه وحاره واحده رايح جاى ومطره بس خفيفه شويه والارض غرقانه طينه ويادوب بعد كمين 15 مايو بدقيقتين مافيش مطره والجو شمس وزى الفل روحت وركنت العربيه طلعت غيرت واتغديت ولقيت السيول اشتغلت
عربيات كتير ازازها اتكسر وعربيات كتير غارزه واللى طلع على الرصيف واللى لبس فى شجره وازاى البيوت متكسر والشقق غرقت وورق الشجر وقع من الثلج ولسه لغايه دلوقتى الشوارع عايمه ميه
وشركه الحديده والصلب نصها واقف انهارده بس تأثير المطر على المكابس والمواتير والافران فى الشركه
طبعا خسرت كتير الشركه انهارده !!!!
شكل الشتا السنه دى هتبقى زى الفل ..
ده كان يوم
أنا كنت في المنصورة يوم الجمعة و على العصر كده لقيت هجوم من السماء بشظايا من التلج في حجم الزلط و العربية شبرت من جوه و المطر بيرزع من بره زي الرصاص و فضلت ماشي في المشاية قدام جزيرة الورد عمياني كده لفترة (الحمد لله عارف الحتة دي كويس ببلاعتها بحفرها بأخاديدها ) ..
لحد ما ربنا هداني أشغل التكييف ..
الواحد بيحس بضآلته أمام ثورة الطبيعة ..