السلام عليكم
أزيكم يا أعضاء المنتدى الأعزاء
أنا محتاج مساعدتكم لأنى بفكر فى شراء سيارة فى خلال ال6 شهور الجايين
و قعدت أدخل كل الأقسام هنا بقالى فترة و أقرا عيوب العربيات و مشاكلها و ده خلانى محتار أكتر
فأنا هقولكم العيوب اللى شوفتها و أنتم حاولوا تساعدونى فى أختيار عربية كويس
المواصفات المطلوبة
الوسع (أنا طويل و محتاج عربية تكون واسعة و تنفع عائلية و شبابية)
الأعتمادية (أنا بحب أدور العربية و أمشى و بس و مش عاوز حاجة بتعطل كتير أو بتحتاج عناية خاصة)
أسعار قطع الغيار و الصيانة(أنا هصلح فى التوكيل بس عاوز حاجة تكون معقولة مش أروح أدفع فى الصيانة الدورية بال 4 ألاف مثلا)
سعر أعادة البيع (مش مهم قوى لأنى مش ناوى أغير قبل 10 سنين و يمكن أكتر)
العربيات و عيوبها اللى محيرانى
سكودا فانتازيا (صيانة و قطع غيار غالية جدا واحد بيقول دفع فوق ال 4000 فى الصيانة !!! و كمان بتمشى ببنزين 95)
فورد فوكس (الكلام عنها كويس بس فيها عيب قاتل تنك البنزين ملوش غطا و بيفتح بأى مسورة أو قمع يعنى ممكن عيل يرمى فيه صاروخ و لا حاجة تبقى العربية بالسلامة و لا واحد محتاج بنزين ياخدله شوية)
الهوندا سيفيك (بغض النظر عن أن قطع غيارها غالية شوية بس مشكلتها الكبرى أنها واطية جدا و بتحك فى كل المطبات و بصراحة الواحد قلبه هيتقطع عليها)
الفولكس جيتا (قطع غيار غالية+توكيل سئ+ بتحك فى المطبات؟؟)
النيسان تيدا (عربية واسعة و زى الفل بس فى ناس ظهرت معاهم مشاكل فى جزء أسمه القطمة بتاعت الدركسيون و بيقولوا التابلوة مكون من 6 قطع فالعربية بتفضل تشخلل فى الحتت المكسرة..يعنى هتشخلل معايا علطول)
هيونداى سوناتا (العربية دى كنت هموت عليها بس سألت الناس قالولى تيل فرامل أمامى ب 1000 جنية و عليها ضريبة سنوية فوق ال 2000 جنية..يا بلاش)
المازدا 3 (عربية زى الفل بس فيها عك فى التوكيلات و قطع الغيار و أنا عاوز حاجة أعرف فيها راسى من رجليا)
الدايهاتسو تيريوس (عربية كويسة بس ناس كتير بتقول ثباتها وحش لأنها عالية)
الدايهاتسو ماتيريا (عربية حلوة جدا وصحابها بيشكروا فيها بس بصراحة لو قارناها بالسيفيك و الكورولا مش هتكسب)
الكيا سيراتو (زى الماتيريا تمام عربية كويسة و فيها أوبشن كتير بس أنا مش حاسس أن تقفيلها حلو زى السيفيك و الكورولا)
الشيفرولية كروز (الناس بتقول محطوطلها ماتور الأوبترا و العربية تقيلة على الموتور)
الأوبل فيكترا (قطع غيار غالية+ العربية وزنها تقيل على الموتور)
اللانسر الشارك (ضيقة)
التويوتا كورولا (و دى الوحيدة اللى مشفتش حد أشتكى منها غير عن الفتيس ال mmt بس 2010 نازلة أتوماتيك عادى و انا ركبت منها الخليجى كانت تمام بس عيبها أنها ضيقة)
يا ريت كل واحد يقولى رأيه من خلال أستخدامه للعربيات دى لأنى محتار جدا
بجد موضوع العربيات ده متاهة
و شكرا مقدما
المفضلات