الموضوع: السعادة

كلنا بلا استثناء نبحث عن السعادة
وفي كل فترة او مرحلة من حياتنا اكيد فيها منغصات ما
ودايما نقول لنفسنا ان سعاتنا هتكون في المرحلة الجاية او عند تحقيق الهدف الفلاني
ايام الدراسة كنا بنقول اكيد هنكون اكثر سعادة بعد التخرج نلاقي نفسنا دخلنا في دوامة البحث عن عمل وبعدين دوامة العمل نفسه
نظن ان السعادة ستكون بالزواج وهو اسبوع عسل ان مكنش اقل كمان وتبدأ مشاغل الحياة ومشاكلها وبعدين يجي الاطفال ومشاكلهم معاهم
نقول لما الاولاد يكبروا شوية هنرتاح وهنكون اسعد .. نلاقيهم دخلوا في مرحلة المراهقة ومشاكلها
نقول لما تعدي المرحلة دي هنكون سعداء وهكذا
نقنع نفسنا ان سعاتنا في شراء سيارة جديدة او منزل جديد ونفضل عايشين في حلقة مفرغة ندور على السعادة

الحقيقة مفيش افضل من ((دلوقت )) للعيش بسعادة ولو مكنش دلوقت هيكون امته

حياتك مليانه بالتحديات ،،،

عشان كدة من الافضل ان نقرر ان نعيشها بسعادة من دلوقت

دائما نعتقد ان الحياة الحقيقية على وشك ان تبدأ
ولكن في كل مرة نلاقي محنة لازم نتجاوزها ،،، عقبة في الطريق لازم نعديها ، عمل لازم ننجزه ........كي تبدأ الحياة .

اخيرا بدأت افهم ان الامور دي هي الحياة ومش تحقيقها او انجازها هو اللي هايحقق السعادة

وبدأت افهم ان مفيش طريق معين او محدد يوصلنا للسعادة

انما السعادة نفسها هي الطريق اللي بنرسمه لنفسنا عشان نمشي فيه
وكل واحد مننا بايده انه يرسم طريقه يااما طريق سعادة يا اما طريق شقاء
مفيش شك ان الرضاء بقضاء الله وقدره هو في حد ذاته سعاده
والقرب من الله سعاده .. والشعور برضا الله سعاده

عشان كدة بقولك عيش اللحظة ... عيشها بسعادة ... استمتع بيها بما لا يغضب الله

متستناش انك تخلص مدرسة .. ولا تخس شوية .. ولا تشتري عربية جديدة .. ولا تتجوز البنت الفلانية .. ولا تشتغل في المكان الفلاني عشان تبقه سعيد

السعادة رحلة مش محطة هتوصلها
مفيش افضل من دلوقت عشان تعيش سعيد
بلاش تضيع عمرك في الجري وراء السعادة وهي بين ايديك
عيش اللحظة الحالية واستمتع بيها