رحله للفيوم ؟؟؟؟

**HeMa_LanCeR** · 31-10-2009 01:02 AM

كنت عايز اسألك لو حد راح رحله الي الفيوم
علشان انا بفكر اطلع اقضي يوم مع اصحابي
لأننا كنا بنفكر في اليكس بس للأسف علشان التحوليات اللي حصلت دي خايفين نضيع وقت كبير في الطريق
فا فكرنا في الفيوم وانا للأسف معرفش ايه النظام هناك ولا حتي اليوم هقدر امشيه ازاي
فا ياريت لو حد من الاعضاء راح الفيوم قبل كده يقولي عمل ايه والدنيا فيها ايه بالظبط

وشكرا جزيلا ,,,

**hoda9999** · 31-10-2009 09:39 AM

ونا بردو عايز اطلع مع صحابى وعايز اعرف اية الحوار ونعمل اية علشان انا عايز اغير واروح حتة جديدة

**zakiali** · 31-10-2009 11:15 AM

الفيوم فيها مناطق جميله جدا .. اولا الأوبرج ـ البحيرة ، ثم البلد نفسها عمر الخيام ، مطعم الزاوي ,, ده عامل زي كنتاكي هناك ،وكمان عين السيلين حته عامله زي القناطر عندنا كده .. وفيها اثار كتير جدا ... هرم الاهون - هرم هواره ، قصر قارون وده تحفه فعلا . وقريبه من القاهره 85 كيلو بس يعني في اقل من ساعه تبقي هناك علي الصحراوي .
اتمني تتبسط هناك .

**HeMa_LanCeR** · 31-10-2009 06:46 PM

المشاركة الأصلية كتبت بواسطة zakiali

الفيوم فيها مناطق جميله جدا .. اولا الأوبرج ـ البحيرة ، ثم البلد نفسها عمر الخيام ، مطعم الزاوي ,, ده عامل زي كنتاكي هناك ،وكمان عين السيلين حته عامله زي القناطر عندنا كده .. وفيها اثار كتير جدا ... هرم الاهون - هرم هواره ، قصر قارون وده تحفه فعلا . وقريبه من القاهره 85 كيلو بس يعني في اقل من ساعه تبقي هناك علي الصحراوي .
اتمني تتبسط هناك .

شكرا جزيلا لحضرتك علي المشاركه
بس عايز أسال يعني انا سمعت عن وادي الريان ده عايز اعرف فيه ايه بالظبط
وباردو لو في حاجه زي قريه نقعد فيها ويكون سعرها معقول
علشان انا معايا عرض من قريه هناك اسمها اريبيان نايتس بس دي دخولها رخيص لكن الحاجاه جواها غاليه جدا

**hoda9999** · 31-10-2009 07:05 PM

نفس الكلام بس عايز اعرف حتة ناكل فيها سمك

**Ahmed Selim** · 31-10-2009 09:38 PM

أنا رحت الفيوم نفسها مرة واحدة زمااااااااااان و مش هقدر أفيدك فيها
بس رحت وادى الريان مرتين و رحت البحيرة مرة و وادى الحيتان مرة.

مبدأياً كده وادى الحيتان أنساه شوية عشان أخر 5 أو 10 كم فى الطريق عبارة عن مدق....مش طريق مرصوف.

وادى الريان مفيهوش غير 2 بحيرة واحدة منهم أعلى من التانية شوية و فى بينهم شلالات ( بتطلع كتير فى الأغانى العربى و الأفلام )

و ده طريقه نفس طريق البحيرة بس فى الأخر بتدخل شمال و تفضل ماشى تانى حوالى 20 أو 25 كيلو.......بس مفيهوش قرى سياحية......هو 2 كافيتريا على قد حالهم قوى.
و مفيهوش خدمات كويسة ( حمامات )

على البحيرة نفسها فى كذا كامب صغير كده......مستواهم معقول جداً و أكلهم كويس و مش غاليين.........فاكر أسم 2 منهم قمريات و زاد المسافر....قمريات على البحيرة على طول و زاد المسافر الناحية التانية من الطريق......بس لو فى ويك أند لازم تحجز عشان الأوض عندهم قليلة......أسعار الأوض حوالى 150 الى 200 جم فى الليلة.....فى أوض ممكن تشيل 2 و أوض تشيل تلاتة.

قصر قارون فى أخر طريق البحيرة.....بعد قمريات و زاد المسافر بحوالى 10 كم.

أنا رأيي لو تعرف تحجز فى واحد منهم أطلع الصبح بدرى و روح قصر قارون الأول....و أنت راجع أرجع على المكان اللى حجزت فيه قضوا اليوم هناك.
أعتقد لو عملت بحث على جوجل ممكن توصل لأرقام تليفوناتهم.
لو هتروح وادى الريان كمان يبقى تعمل حسابك على حوالى 4 ساعات....ساعتين للطريق من عند البحيرة رايح جاى و القعدة فى وادى الريان ساعتين.
بس أخر كيلو أو 2 كيلو فى دخلى وادى الريان عبارة عن مدق برضه.

**Ahmed Selim** · 31-10-2009 09:40 PM

نسيت أقول أن الأوبرج حلو برضه بس بكتيييير...........أفتكر الأوضة فى اليوم للفرد كانت بحوالى 500 جم.......مش عارف ليه مع أنه فى معظم الأوقات فاضى.

**ecybrarian** · 31-10-2009 10:54 PM

المشاركة الأصلية كتبت بواسطة ahmed a.maksoud

على البحيرة نفسها فى كذا كامب صغير كده......مستواهم معقول جداً و أكلهم كويس و مش غاليين.........فاكر أسم 2 منهم قمريات و زاد المسافر....

هل واحد من دول عبارة عن فندق بيئي؟!! يعني الغرف معمولة بالطوب اللبن (الطين) زي بيوت الفلاحين زمااان..في الفيوم فندق بيئي مش عارف اسمه ايه ياريت لو حد يعرف معلومات عنه يقول لنا