الموضوع: تقييم مبدئى للتيجو-مميزات و عيوب

السلام عليكم اخوانى

فى الفترة الأخيرة حصل كلام كتير أوى عن الاسبرانزا تيجو بالذات مابين مؤيد و معارض بس غالبا اللى بيتكلم عنها بالسلب مش ببيكون عن تجربة أو ممكن برده يكون عن تجربة و حصلت معاه مشكلة ولو مشكلة بسيطة تبقى العربية كلها وحشة يعنى بمجرد انه لاحظ اى عيب و لو بسيط تبقى خلاص زى اى حاجة صينى قليلة الجودة مثلا زى ان الباب مش بيتقفل على طول من أول مرة تبقى العربية كلها وحشة, يقولك ياعم انت منتظر ايه من عربية صينى دى صييييييييييييييينى
العربية بتنتج فى الصين من سنة 2005 و تباع فى الصين و شرق اوربا و روسيا باسم شيرى تيجو و طرحت فى ايطاليا باسم dr5 و أبو الفتوح منزلها السوق المصرى سنة 2008 باسم اسبيرانزا تيجو

مع ان فيه عربيات تانية يابانى أو ألمانى وموجودة من زمان فى السوق و الناس بتجيبها رغم انهم ممكن يكون عارفين ان فيها عيوب و سعرها كتير عليها, زى التويوتا الياريس مثلا على حسب تجارب مستخدميها بيقولو ان ثباتها ضعيف و اكصدامتها عاملة زى الكرتون و من اقل خبطة ممكن تتقسم نصين او حتى التويوتا الكورولا بيقولك ان فيها عيب فى الفتيس والاتتين فيهم عيب فى الدهان بس يقولك ياعم دى مهما كان يابانى ياباااااااااااااااااااانى
الحمد لله العربية معايا من حوالى 4 شهور و طبعا قبل ماجيبها لفيت كتير و عملت مقارنات بين عربيات كتير سواء كان فى منتدى نايل موتورز أو فى منتديات أخرى خاصة مابين التويوتا ياريس أو البولو سيدان أو الجين 2 و أكيد استفدت كتير من خبرة أعضاء نايل موتورز ربنا يبارك فيهم و بصارحة مكنش من بينهم التيجو خالص عايز أقولوكم مكنتش أساسا متخيل ان أجيب عربية صينى نهائى يمكن لان معظم الناس هنا فى بورسعيد مش بيركبوا أى عربيات يعنى مثلا مش بيقتنعو الا باليابانى أو الالمانى(بالذات الهوندا أو الفولكس بجميع موديلاته بالذات الجولف) و بعدهم بمراحل كتييييييييير أوى ييجى الكورى و عامة مش بيقتنعوا باى عربية متقفلة فى مصر حتى ولو مرسيدس فمابالك بقى لو كمان عربية صينى تقفيل مصرى
المهم بعدت اما قريت كتيرعن العربيات اللى ذكرتها من شوية , نيجى بقى على أرض الواقع فروحت معارض كتير بما فيهم المنطقة الجمركية فى بورسعيد اللى بتتباع فيها عربيات المعوقين
ملقيتش خالص البولو سيدان الجديدة (مع انها فولكس )و لا الجين 2 بس اتلاقيت التويوتا الياريس علشان ليها موزع معتمد فى بورسعيد
فاستبعدت البولو من الاختيار لأن مكنتش عارف اشوفها فين على الطبيعة حتى ملاكها فى المنتدى قليلين جدا و طبعا لازم كنت انزل القاهرة علشان اتفرج عليها و استبعدت الجين 2 لنفس السبب وبرده قلة انتشارها فى بورسعيد مع ان ملاكها كتير فى المنتدى و معظمهم بيشكروا فيها, نيجى للياريس بصراحة مانبسطش منها اوى اما ركبتها حسيت ان تمنها كتير أوى عليها
المهم ان خلال رحلة البحث تقربيا شوفت و ركبت معظم العربيات اللى من رنج 80 الى 160 ألف منهم السيراتو , الكارينز , الشيفورليه كروز, المازدا 3 , الهوندا سيتى , الاوبل فكترا و318 bmw موديل 99
و شدنى اوى فى العربيات دى الكروز شكلها و خاماتها الداخلية ووسع الكارينز و فخامة و قوة الأوبل و بصراحة السيراتو معجبتنيش من جوة و المازدا3 و الهوندا سيتى حسيت انهم ضيقين من جوة و الbmw كانت حالتها مش اد كدة (مش معنى كدة برده انهم وحشين)
لحد مرة كنت راجع البيت اتلاقيت والدى بيقولى انا شوفت عربية عالية و ليها هيبة كدة بس مش عارف ايه دى بالظبط , المهم عرفت ان اصده على الاسبيرانزا تيجو فقولتلو ايه دة الصيييينى ؟؟؟؟!!!!! فقالى مهو الصين اللواقتى بيعملو كل حاجة سواء كانت رديئة أو ممتازة زى فوانيس رمضان و الموبيلات الصينى التعبانة لحد الصواريخ و الأقمار الصناعية و اكيد طبعا الحاجات دى مفهاش هزار يعنى مينفعش تكون تعبانة أو اى كلام قولتلو دة كمان تقفيل مصرى قاللى مهو أبو الفتوح طول عمره كان بيقفل ال bmw و الناس كانت بتجبها بمئات الألوف
فخدت بعضى و رحت شفتها عند الموزع بتاعها فى بورسعيد
عايز اقولكو ان لو ماكانش معروف للناس انها انتجت فى الصين مستحيل تباع بالسعر دة على الاقل حتتباع ازيد من ثمنها اللى بتباع عليه اللواقتى ب50 أو 60 ألف جنيه و يمكن اكتر كمان المشكلة ان الناس( منهم أنا ) اما بتسمع كلمة صينى تقولك على طول فيه حد يجيب حاجة صينى
المهم العربية زيها زى اى عربية تانية فيها مميزات و عيوب ممكن نلخصها فى الأتى
المميزات اللى شفتها الى حد الأن :
1- ارتفاعها عن الارض ممتاز و دة اكتر ماميميز العربية و مناسبة جدا لشوارعنا
2- السحب برده كويس جدا جدا بالرغم انها 1600 سي سي(ملاحظة ان التيريوس مثلا 1500 سي سي)
3-صاجها قوى يعنى امتن مثلا من التيريوس و من عربيات يابانى و كورى كتير
4-كماليات ممتازة
5- بالنسبة للتكييف هو كويس جدا جدا بالذات باليل , الصبح لو العربية واقفة فى الشمس مدة طويلة بياخد وقت شوية عقبال اما يسقع بس كل اللى فى العربية حيحسو بيه و بيقى زى الفل
6- من أكتر مايميز العربية الثبات بتاعها مع انها عالية بس يمكن اللى بيديها الثبات دة انها عريضة لان فيه مثلا عربيات عالية زى التيريوس أو الشيروكى الليبرتى الثبات بتاعها ضايع( ودة من كلام ملاكها يعنى مش بقول اى كلام من دماغى)
7- الموتور صوتوه هادى جدا يكاد ممكن متسمعوش لو انت واقف و العربية دايره
8-العفشة ممتازة ولاهى ناشفة ولا هى ناعمة, بالنسبا لى برده ماقدرش احكم على قوة تحملها فى الوقت الحالى بس شفت الفيديو دة و كنت حطيته قبل كدة على للتيجو 4x4
حاجة زى الفل
وكمان التيجو 4x4 دخلت رالى كاس مصر و دة كان تقريبا فى مارس 2009 وكمان رالى الفراعنة اللى اتعمل الشهر دة و كمان اخدت المركز الخامس فى رالى كاس مصر و المركز السادس على مستوى الفرق المصرية و 13 فى الترتيب العام فى رالى الفراعنة مع العلم ان فى عربيات تانية 4X4 مبتكملش حتى السباقات دى للأخر
اكيد لو عربية مبتسحملش أو عربية مش قوية مكنش ينفع حتى مجرد التفكير انها ممكن تخش سباقات زى دى و تمشى فى الصحراء مدة طويلة و على فكرة التيجو 4x4 نفس عفشة التيجو 1600 سي سي بس طبعا الموتور و نظام الجر مختلفين
9- ممكن تتحكم فى وسع الصالون أو الشنطة لان الكراسي اللى ورا بتطلع لقدام و ترجع لورة وحتى اما بترجع الكراسي لورة خالص بتقى مساحة الشنطة واسعة برده
10-فيها أماكن تخزين كتير داخلية و برده فيها قضبان فوق السقف لوضع شنط أو اى احتياجات أخرى
العيوب اللى شفتها اللى حد الان :
1- الابواب مش بتتأفل على طول يعنى لازم ترزعها بس اما روحت التوكيل ظبتتولى 3 أبواب و فيه باب واحد متظبطش كويس (بس اعتقد ان دة مش عيب قوى يعنى لان زى اى عربية فيه لمبة التابلوه بتقولك ان فيه باب مفتوح)
2- خامات التابلوه و الابواب داخلية متوسطة الجودة يعنى تقريبا زى العربيات الكورى شوية يعنى احسن من السيراتو مثلا بس مش أحسن من الكروز
3- مركز الصيانة اللى روحته فى الاسماعلية فى صيانة الالف مش اد كدة اوى يعنى تحس ان الصنايعية اللى هناك معندهمش خبرة و تحس كدة ان مفيش اهتمام اوى بالعميل بس أعتقد ان اللى فى القاهرة حيكون أفضل يعنى مثلا كان فيه لمبة الدينامو بترعش قالولى ان الكهربائي مش موجود علشان يبص عليها فعملتهاش لحد اللواقتى مستنى اما اروح اى مركز صيانة تانى
4- التقفيل متوسط الجودة (يعنى مثلا اللى بتنزل فى ايطاليا باسم dr5 تقفيلها شكلو ممتاز جدا أكيد مش تقفيل زى أبو الفتوح, أول ماجبتها اتلاقيت الجلدة اللى تحت المساحات مفكوكة و لزقتها بأمير)
5- استهلاك البنزين عالى شوية اما تمشي بيها جوة البلد يعنى 20 لتر ممكن يعملو حوالى 150/160 كيلو تقريبا و ساعات كمان 140 كيلو بس على السفر استهلاكها كويس 20 لتر بيعملو حوالى 250 أو 260 كيلو بس زى ما سمعت من أحد الاخوة الأعضاء ان استهلاكها بيتحسن بعد 5000 كيلو
6- غطاء الاستبن اول حاجة بتتخبط من ورة مش الاكصدام لانه بارز عنه علشان كدة لازم تخلى بالك و وانت بتركن علشان ميتجرحش

العربية بدأت تعمل شغل جامد أوى فى بورسعيد و ناس كتير جابتها
فيه ناس شافوها اول مجبتها ميعرفوش اوى فى ماركات العربيات افتكروها ب 250 ألف جنيه


وبرده علشان الكلام يكون مظبوط انا بتكلم على الفترة اللى جربت فيها العربية من يوم ماستلمتها يعنى مش حنقدر نقول التقييم الفعلى 100% الا بعد تجربة العربية لاكتر من 3 سنين على اللأقل ,,,
و أخيرا من خلال تجربتى للعربية من اول ماجبتها لحد اللواقتى فانها تعتبر صفقة ممتازة بالنسبة لسعرها و ممكن برده اكون نسيت حاجة , فيارريت يا اخوانى اللى عنده اضافة يحب يقولها سواء ميزة أو عيب يفيدنا بيها

ألف مبروك وربنا يديك خيرها ويكفيك شرها يارب ...
سؤالي لحضرتك بخصوص التيجو 2000 سي سي الأوتوماتيك هل فعلا إستخدامها للبنزين عالي ولو في أي معلومات أخرى حضرتك تقدر تفدنا بيها من خلال إطلاع حضرتك على آراء الأعضاء ...
أصل بصراحه مش ناوي أركب أي سيارات مانيوال بعد كده وطبعا السبب زحمة مصرنا الحبيبة .
وشكرآ جزيلا