اتقلبت مرتين في خلال ساعتين
اولا الحمد لله على كل حال
من يومين سهران في الشغل كالعاده نزلت الساعه 11 بليل قلت اشم هوا واشرب حاجه ساقعه رحت ناحيه العربيه ببص عليها في اول الشارع كده لقيت علامة السوبارو اللي قدام واللي ورا اتسرقو اتخنقت اوي ومشربتش حاجه قمت واخد العربيه من على الناصيه وركنتها تحت الشركه
على الساعه 12,30 بليل نزلت عشان اروح (كفايه شغل بقى ) طلعت من نفس الشارع ورحت مترح ماكنت راكن في الاول عشان اطلع على السودان (اخر دمشق في صينيه كده صغيره اللي بتطلعك على السودان او سوريا او ميدان لبنان ) المهم لسه داخل شمال ناحيه السودان والدنيا ضلمه كحل لقيت امين طلعلي وقالي انت كده عكسي ورخصك
اديته الرخصتين وفي وسطهم المعلوم قالي مينفعش الموضوع متشاف من الباشا :( اخد الرخصتين ومشي
عدلت نفسي ونزلت لاقيتهم ماسكين سواق عربيه نقل والواد بيعيط متاخدنيش ياباشا حرام والصوت عالي والظابط مصمم يركب البوكس
وانا واقف بعيد مقلق لقيتهم خدو الواد ومشيو قلت يانهار ده سابني ومشي فكرت شويه قمت راكب وجريت وراه لحد قسم العجوزه ( اللي تحت كوبري بتاع 15 مايو تقريبا ) لقيت الواد برضه بيعيط هناك بره القسم المهم في الاخر الظابط خده جوه وظابط تاني مقدم قالي ايوه في ايه قولتلو انا كذا كذا (طبعا انا مقلق ) قالي في ثانيه بكره تيجي 10 الصبح تدفع الغرامه في نيابه مرور العجوزه تاخد الرخص وسابني ومشي طبعا الكلام ده الساعه بقت 1 بليل جريت وراه قولتلو طب اديني وصل بالرخص عشان انا ساكن في الهرم وبروح وباجي دائري قالي مفيش وصلات هو بكره تيجي 10 الصبح تدفع في النيابه تاخد الرخص
وفعلا روحت بالعربيه ومعيش ولا رخصه ورحت الصبح النيابه وفضلت مستني الباشا وكيل النيابه ( دخلتلو 4 مرات ) كل مره يقولي لسه هأشر على المحاضر
الباشا قشر الساعه 12.30 دفعت 1025 وهما خدو 5 جنيه كده ده بتاع الخزنه والصول خد خمسه عشان يدخل المحضر للباشا بسرعه
اللي انا مستغربله انا تبع مرور بين السرايات ليه ماخدش وصل وليه ادفع واخد رخصي من مرور العجوزة ؟؟؟؟؟؟
الحمد لله كده في ساعتين وقف عليا اليوم ب 1500 جنيه لان لاقيت العلامات اللي اتسرقو في التوكيل ب 450 جنيه طبعا لسه ماجبتهمش ومش ناوي اوي بعد الالف اللي جت في اخر الشهر دي :(((
الحمد لله انها جت على قد كده والموضوع مكبرش عن كده:ask: