إية نظام الفورد فيستا ؟

**mynameh** · 01-11-2009 09:59 AM

بعد حكاية الإحلال و التجديد للملاكي و نصيحة الناس بالبعد عن موديلات الثمانينات
قررت أحاول اجيب عربية تسعينات بس الفكرة في السعر فمن ضمن الحاجات اللي بدور عليها
الفورد فيستا فأولا :
سعرها مابين كام و كام ؟
أسعار قطع غيارها ؟
لو هشتري إية أول حاجة أبص عليها ؟
و هي كسيارة حلوة ولا بصفة عامة ؟
أهم عيوبها ؟

هي دي اهم الأسئلة اللي عندي و ياريت الاقي ليها اجوبة
والف شكر

**mynameh** · 01-11-2009 12:30 PM

علي فكرة انا دورت في منتدي الفورد كلوا

لكن ملقتش اجابات شافية لأسئلتي

**reamoz** · 01-11-2009 12:38 PM

والله ياباشا انا معايا الفيستا ال 1100 موديل 97 بقالها حوالي 3 سنين ونص
بصراحة عربية ماشاء الله عليها كويسة جدا بالنسبة لسعرها اللى المفروض يكون اكتر من ماهو عليه بكتير لأنها احسن من عربيات اغلى منها بكتير
انا مش متابع السوق فا مش عارف هي سعرها كام دلوقتي
عن تجربة مثلا انا شايف إنها احسن من الفليشيا من حيث الراحة والنعومة والثبات.
قطع الغيار متوفرة مفيش حاجة سألت عليها وملقتهاش سواء جديد أو إستيراد في التوقيقية والحرفيين ومصر الجديدة
الأسعار بالنسبة لعمر قطع الغيار معقولة جدا وتقدر تتابع المواضيع الخاصة بالموضوع ده وتشوف
لو هتشتري إنشاء الله أهم حاجة تبص عليها سواء في الفيستا أو غيرها طبعا الشاسية وترفعها في بنزينة محترمة ودواخل العربية بعد كدة حالة الموتور والعفشة ويفضل بتاع زوايا كويس بردة تخليه يكشف عليها علشان يتأكد من إن أبعاد العربية مزبوطة
بالنسبة ليا يمكن العيب الوحيد ان الموتور 1100 بس فا مش وهمية في الجري والتجميع على سرعات عالية بس قصاد كدة بصراحة في البنزين بتعدي معايا 240 او 260 كيلو في الصفيحة جوة البلد و بتعدي 300 في السفر.

**mynameh** · 01-11-2009 12:47 PM

الف شكر علي الرد الجميل
وباين انها كعربية مفيهاش عيوب مهمة الف شكر

لكن اهم حاجة بالنسبالي اسعارها مابين كام و كام ؟

**reamoz** · 01-11-2009 01:11 PM

العفو ياباشا
وإنشاء الله تلاقي حد هنا يفيدك في موضوع السعر
بس خلي بالك علشان 1100 كارباتير موديل وال 1300 كاربراتير موديل بعدة وال 1250 إنجكشن موديل اجدد وطبعا كل موديل بيفرق عن التاني في السعر

**mynameh** · 01-11-2009 01:16 PM

الف شكر علي التوضيح
بصراحة انا هشوف ارخصهم و خصوصا انها باين عليها عربية حلوة من كلامك عليها

**reamoz** · 01-11-2009 01:28 PM

المشاركة الأصلية كتبت بواسطة mynameh

الف شكر علي التوضيح
بصراحة انا هشوف ارخصهم و خصوصا انها باين عليها عربية حلوة من كلامك عليها

أهم من كلامي وكلام أي حد (الإستخارة) وإنشاء الله ربنا يوفقك للحاجة الكويسة

**mynameh** · 01-11-2009 02:05 PM

ان شاء الله فعلا
بس المهم اعرف سعرها عشان بس اعرف خارج حدودي ولا لا
و الف شكر مرة تانية

**aYaBooY** · 01-11-2009 06:45 PM

طيب الفيستا عربية ممتازة اعتمادية جدا جدا
عيوبها الصوت عالي شوية و ده علشان الكاتينة جنزير مش كاوتش
الـ 1100 كاربراتير و اسمها فيستا كلاسيك و الميكانيكا بتاعتها سهلة شوية و سعرها على ما اعتقد ولا اجزم في الحد بين الـ 22 و 25 حسب الحالة و ما إليها و موديلاتها من 95 لـ 97
في منها 1400 سي سي لا انصحك بيها علشان ديه نزل منها قليل قوي العام بتاعها 1100
الـ 1300 و ديه انجكشن موديلاتها من 97 لـ 2001 الاكثر انتشار مو 99 و 2000 برده عيب الصوت موجود قطع غيار غالية بس عمرها طويل نازل منها فبريكة تكييف و باور و سنتر و زجاج امامي كهرباء
الميكانيكا بتاعتها معقدة شوية ولازم ميكانيكي فورد بس الي يمد ايدة عليها
السعر اعتقد من 28 لـ 35 حسب التجهيزات الموجودة في السيارة
الـ 1250 و ديه موديلات 2000لـ 2001 قليلة شوية
مشكلة الصوت مش موجودة علشان الكاتينة كاوتش او سير مش جنزير قطع غيارها اغلى بكتير علشان ليها حاجات مشتركة مع الفوكاس حتى ان موتور الفوكاس ممكن يتركب عليها بس ديه معرفش اي حاجة عن سعرها
بالنسبة للكشف علي السيارة
لو هاتجيب الـ 1100 ممكن اي بنزينة مش مشكلة لكن لو هاتجيب الـ 1300 او الـ 1250 انصحك بالتوكيل لدقة الفحص و ربنا يوفقك في عربية كويسة
و خلي بالك لو الفورد اتهانت مينفعش ترجع تاني يعني الفورد مينفعش تركبها او تشتريها متهانة ابدا

**mynameh** · 01-11-2009 09:22 PM

الف شكر علي الرد الوافي و الشافي و ربنا يسهل
و كدة ان شاء الله هدور علي ال 1100
و لو في معرض مستعمل بيعرضها يريت اي حد يقول
و انا هشوف اللي عارضينها في الوسيط و ما شابة
و ربنا يسهل ان شاء الله