الموضوع: ملخص الايميلات اليومين دول

الايميل دة ظريف جدا جالى النهاردة قلت انقلهلكم

انا مش معترض علية ولا موافق علية بس عجبنى

========================

دة إيميل ملخص لكل الإيميلات

إلي ممكن تجيلك اليومين دول


ويدل على عصر الهبل والمهيصة الي إحنا عايشينه ...


أولا: المقاطعة:


قاطع المنتجات الأمريكية لأنها تدعم اسرائيل.


قاطع المنتجات البريطانية لأنها تدعم أمريكا.


قاطع المنتجات الدينامركية عشان الكاريكاتير.


قاطع المنتجات الهولندية عشان الفلم.


قاطع المنتجات الألمانية لأنها جنب الدول السابق ذكرها.


و النهاية كل الناس بيبعتو الايميلات دي لبعض من كومبيوترات كل البرامج الي فيها أمريكية وغربية !!


و هم قاعدين في ستاربكس


بعد ما اتعشوا في كنتاكي


و معاهم "تيك أوي" من ماكدونلدز.



ثانيا: الصحة:


لا تشرب بيبسي لأنه


يحتوي على مواد تنظيف و عصارة خنزير.


لا تشرب ريد بول لأنه يسبب عقم..


لا تستعمل مزيل العرق و لاالشامبو و لا الصابون


لأنه يسبب سرطان


لا تأكل لحم البقر لأنه يسبب جنون البقر.


لا تأكل دجاج بسبب انفلونزا الطيور


لا تأكل سمك بسبب المد الأحمر


لا تأكل خضار و لا فواكه


لأنها كلها هرمونات وبتتحقن عشان تكبر بسرعة


لا تشرب ماء معدنية


لأنه معالج بالكلور


ولو شربت


ماتملاش الازازة تانى مية عشان فيها فايرس


لا تأكل معلبات


لأنها تحتوي على مواد حافظة


لا تشرب عصير طبيعي


لأنه يأتي على شكل عصارة مركزة


لا تشرب عصير غير طبيعي لأنه كله ألوان


طيب يعني آكل واشرب هواء ؟!!! .....


لأ طبعا


لأنه الهواء ملوث


بعوادم السيارات و المصانع .. يعني كده هنموت


ندخل على العادات:


لا تشرب ماء بعد الأكل عشان بتعمل كرش


لا تنام و لا تمشي و لا تقعد بعد الأكل.


(طب اعمل ايه اتشقلب مثلا)


لا تدخن و لا تشرب شاي و لا قهوة بعد الأكل


(كل واسكت خالص اسمع مراتك بتقول ايه)


أحسن حاجة .... انك تاكل و ترمي نفسك من أعلى سطح!!!!!!


ماتخليش الماء في الثلاجة داخل علب بلاستك


لأنه مسرطنة


وبرده ماتخليهاش في زجاج


للأنه ممكن ينكسر .. وبدون ما تعرف يمكن تشربها و تموت


و لا تخلية برة الثلاجة لأنه ممكن يتلوث.


و لا تشرب من الحنفية لأنها مش نظيفة


لا تتكلم في الموبايل بدون سماعة


عشان الموجات بتقتل خلايا المخ


و لا تتكلم عن طريق السماعة


عشان الكهربا الساكنة


و لا تتكلم عن طريق البلوتوث


عشان الموجات برضو بتقتل خلايا المخ


.(يالهوى .. كسر تليفونك ولو حد عازك .. يناديك)


(يعني كل العالم الي عايشين دلوقتي .. من غير مخ أو مخهم ضرب)


ماتخليش الهوا يدور في السيارة لما تشغل التكييف


لأنه يتلوث من التنفس.


و لا تخلي الهوا يجي من بره لأنه ملوث.


لا تعبي بنزين الصبح


عشان الكثافة عالية


و لا تعبي في الليل


عشان الكثافة واطية


و اشرب خل عشان يحرق الدهون


.... ماتشربش خل عشان بيسبب قرحة في المعدة


و اطلع في الشمس عشان فيتامين "د"


.... ماتطلعش في الشمس عشان طبقة الأوزون باظت .


ثالثا: الدين:


ابعث هذا الايميل لجميع من عندك


وتكسب 2586445329735 حسنة ....


(الحسبة صح ماتخافش)


(لأنه الي باعث الايميل حاسبها بالملي مكشوف عنه الحجاب)




و يجيلك ايميل مكتوب في أولة


اقسم انك ستبعث الايميل لكل الي تعرفهم


و بعدين يفكرك انك أقسمت.


(لا اله الا الله)


و ايميل فيه الجملة الحلوة اللطيفة


(اذا لم تبعث الايميل فانت لا تستحق أجره)


كأن هو اللى بيوزع الحسنات


و ايميل يستشهد بأحاديث كاذبة


ويقولك : اذا ما بعثتها فأنت مقصر


و ايميل يقولك "دعاء مرة واحدة في العمر"


(يعني ادعي.. و بعد كدة افجر واعمل اللي انت ىعايزه ؟؟؟؟)




و ايميل يقولك "دعاء من دعاه حققت له 100 أمنية"


و بعدين فتوى الرضاعة


و فتوى تحريم "البوكيمون"


و فتوى تحريم "البلايستيشن"


بس محددوش .. بلايستيشن1 ولا 2 ولا 3


و أحلا فتوى فيهم ............. فتوى قتل "ميكي ماوس"


و الفتوى الجاري طرحها "المفتش كرومبو لازم يتقتل"


الخلاصة بقة عشان ننجز ونجيب من الأخر


أحسن حل ....


انه الواحد لا ياكل


و لا يشرب و لا يتنفس


ولا يتكلم في التلفون


و لا يطلع من البيت




على فكرة:


اذا بعت الايميل دة لكل الي عندك


هاتلاقي وظيفة اذا كنت عاطل وهاتلاقي عروسة اذا كنت عازب وراح وتبقى غني لو انت فقير


اما اذا مابعتوش بقة للكل


هتترفد من شغلك


وتطلق مراتك


وتفتقر الي الابد
؟؟؟؟؟؟؟؟؟؟؟؟؟؟؟؟؟؟؟؟؟؟؟؟