الموضوع: اصلاح دواسه البنزين

هاي يا جماعه معلش انا اتعودت اتعبكم بمشاكلي مع العربيه
لاكن المره ديه انا هاقلوكم علي حاجه حصلت معايا وعملتها عشان لو حد عنده نفس المشكله مايضحكش عليه زي مكان هايضحك عليا
انا كان عندي دواسه البنزين او زي ما بيقولوا عليه البدال بيتحرك يمين وشمال يعني كان ممكن يوصل لدرجه اني لما اجي ادوس فرامل ادوس معاها بنزين عشان الدوستين لزقوا في بعض
المهم رحت للميكانيكي عشان يصلحها فكها وقالي عاوزه تتغير كلها هاتها من حد استيراد المهم العربيه كانت مفكوكه فبقوله في حد قريب هنا بعت معايا الصبي عند واحد بعدين لما سئله عليها قله موجوده بكام قاله بلاش 225 خليه 200 بس بصلته كده وبصيت للدواسه حسيته بيعمل فيا الكميرا الخفيه قلتله شكرا وخيلت الميكانيكي يركب الدواسه القديمه
وبعدين روحت قلت افكها واشوف اه اللي فيها
فكتها وكان فكها ساهل جدا
هما مسمارين انا معلم عليهم بالاحمر 12 بس هايحتاجو مفتاح بيبه زي ما بيسموه او البيب هتفكهم وبعدين فوق عند العلامه الزرقه هتلاقي مسمار بسسته كده بتاع الاكسيراتير شده بره وبعدين لفوق هيطلع معاك من الشق الصغير اللي باين في الرسمه بالون الازرق هتلاقي الدواسه طلعت
بعدين لقيت المشكله في كاوتشتين صغيرن في الجمب متعلمين باللون اللبني هما اللي ماسكين محور الدواسه ومماسوكين بكلبسين كده في الاخر متعلمين باللون الاصفر هتفك كل كلبس من دول لبره هتوسع الجمبين بتوع المحور ده بزرديه شويه لبره وبعدين زق المحور في الناحيه اللي عكس اللي فيها السوسته اللي بترد الدواسه وطلع المحور من ناحيه السوسته في الاول بعدين هطلع العمود بتاع المحور لبره وتزق ناحيه السوسته عشان تطلع الناحيه التانيه هتلاقي العمود طلع معاك اللي فيه الدواسه من القاعده بتاعتها
وبعدين هتلاقي في جلديتن في الجناب دول فيهم شق في النص واضحين في الصوره طلع الجلدتين دول بره مكانهم المشكله فيهم هتلاقيهم بيتحركوا جامد في مكانهم عشان كده الدواسه بتلعب كلها
انا خلعت الجلدتين دول ورحت دورت علي حاجه زيهم لقت حاجه كده بيسموها الطعميه المشقوقه عند واحد بس بتاع قطع غيار عربيات تاني مش دايوا مفيش عند بتوع الدايوا تقريبا حاجه بتاعت 128 بس خد بالك هاتهم اكبر شويه من القدام عشان طبعا القدام اتكلوا
وبعدين ممكن تلاقي الفتحه اللي في النص ضيقه شويه ممكن توسعها ببنطه شنيور بس خد بالك براحه وسنه سنه عشان هي برده لازم تدخل حاشره شويه ما تبقاش سايبه خالص
وبعدين هتركب الدواستين دول عكس ما فكيت طبعا
هادخل الجلد وبعدين العمود بالعكس طريقه الفك وبعدين هاترجع تقفل تاني الجناب اللي كنا وسعناها وبعدين هتقفل الكلبسين في الاخر بس خد بالك وانت بضيق الجناب تاني سنه سنه عشان لازم تكون علي الاخر حشر مع مع الكلبسين عشان برده ماتلعبش معاك الدواسه وبعدين اتئكد ان الدواسه تمام ومش بتلعب والسوسته قويه وبترد في مكانها تمام وبعدين ارجع ركب الدواسه بالمسمارين في مكانها وبعدن سلك الاكسيراتير تاني زاي ما فكناه دخل السلك من الشق وبعدين دوس عليه لجوه لغايه ما تحس في تكه كده
يبيقي كده تمام
لو لقيت الدواسه فيها بوش فوق تحت اربط المسمار اللي متعلم بالاخضر ده سنه سنه لغايه ما البوش يروح من الدواسه بس خد بالك ماتربطهوش جامد عشان لو ربطه جامد يبقي كانك دايس علي الدواسه والسلانسيه ها يعلي وده مش صح
وبكده يبقي الموضوع تم
صوره الجلد الصفرا ديه القديمه والسوداء ديه الجديده مع العلم الجديده اجمد من القديمه وخلت الدواسه تمام وعلي فكره تمن الجلده 1 جنيه يعين الموضوع كلف 2 جينه بدل 200 جينه وشويه شغل
شكرا ليكم ويارب اكون بفيد حد زي ما انتوا علطول بتفيدوني