الموضوع: العربية اتسرقت يا رجالة نايل موتورز

يوم الاربعاء الماضي 28/10/2009 صحيت من النوم الساعة 5.20 صباحا لاني كنت مسافر الي الاسكندرية وفجأة رن تليفوني الساعة 5.30 اول ما فتحته

الو: الاستاذ وسام

-ايوة

-حضرتك عندك عربية كيا ريو لونها دهبي؟

-ايوة

-راكن في الحتة الفلانية (تحت البيت تماما)؟

- رقمها كذا كذا؟

-ايوة .......... حضرتك مين

-احنا مباحث قسم السيدة زينب

-عربية حضرتك قزازها مكسور واتسرقت من الداخل واحنا قبضنا علي الحرامي ومعاه المسروقات بتاعة سيادتك ياريت تنزلنا علشان تعاين حاجتك وتطمن عليها

احب اعرفكم اني مشترك في جراج باركن فيه كل يوم ويوم الحادثة ركنت تحت البيت علشان انا كنت مسافر الصبح فمش عاوز اتاخر

كمان مؤخرا فكرت لقيت نفسي بادفع كتير وساعات العربية بتتجرح من السياس فحبيت اوفر من ناحية ومن ناحية تانية قولت اهو العربية تبقي تحت رجلي بسرعة لما احتاجها خاصة ان مؤخرا عرفت ان ادارة الجراج ناوية تزود الاشتراك وهيبقي 175 شهريا من اول السنة الجديدة فاشتريت غطا للعربية وقولت لما اعود نفسي علي الركنة في الشارع زي باقي البشر واهو ادي فرصة لنفسي ادور علي جراج تاني (لو لقيت) يكون ارخص

نرجع لموضوعنا المهم: نزلت بسرعة لقيت عربية الدورية (الاتاري) راكنة والامناء حوالين العربية والدنيا هايصة علي الاخر ولقيت الزجاج الامامي اللي جنبي مكسور ومغرق العربية كلها والعربية من الداخل محتوياتها مبعثرة والشنطة مفتوحة علي البحري.

طبعا يا رجالة مش قادر اوصفلكم مدي الرعب و التوهان اللي كنت فيه وراجعت علي محتويات العربية لقيت الاستبن والكوريك والطفاية والبطارية في مكانهم ولما سألت افراد الدورية قالوا ان الحرامي سواق تاكسي اسبيرانزا ابيض جديد (تخيلوا) ركن التاكسي بجانب عربيتى صف تاني ونزل كسر الزجاج الامامي يمين اللي كان بجانب سور المترو ودخل فتح العربية وعاش جواها وفتح الشنطة من الداخل وهو بيقلب الشنطة كانت عربية الدورية معدية قام سايب عربيتي ونط في التاكسى وطلع بسرعة راحوا كسروا عليه لما حاول يجري راح جايب مارشدير قاموا نزلوا مسكوه وضربوه تمام وقبضوا عليه.

طبعا انا كنت مستغرب من الموقف والاحداث اللي زي الافلام الاجنبي دي وسألت الضابط انت عرفت رقم تليفوني ازاي والحادثة لسة حاصلة دلوقتي حالا؟؟

-قالي احنا دورنا في الشماسة لقينا الورقة دي فيها رقم العربية و الشاسيه والنوع و رقم تليفون واسم قلنا دي اكيد بيانات صاحب العربية و اتصلنا بيك. (الورقة دي هي استمارة امر شغل للكشف علي السيارة في التوكيل وكان تاريخها من شهور فاتت اخر مرة رحت فيها التوكيل) شفتوا الحظ السعيد !!!

طبعا رحت القسم و شفت الواد مرمي علي الارض معصوب العين وايده مربوطه ورا ضهره وكل شوية واحد يجي يمسي عليه بشلوت تحفة مع قفا وصاية وكلمتين سب علني وعملوا محضر بالواقعة من 3 صفحات وامروا بالتحفظ علي العربية و المسروقات لحين العرض علي النيابة

ضابط المباحث قاللي: احمد ربنا يا استاذ وسام ان عربيتك اتسرقت اليومين دول بالذات

-قولتله الحمد لله لكن ازاي يعني

-قاللي اصل المباحث في الجمهورية كلها شادة حيلها اليومين دول علشان عربية السيد رئيس مباحث العاصمة مسروقة من اسبوعين ولسة مالقينهاش !!! يا لهوي عربية السيد رئيس مباحث العاصمة مسروقة!!!

الحمد لله اني اتسرقت في الوقت المناسب يا جماعة حيث ان رجال الشرطة ساهرين جاهدين من اجل العثور علي عربية السيد رئيس مباحث العاصمة !! وعلي فكرة المعلومة دي اتاكدتلي من وكيل النيابة بنفسه لما حقق معايا

طبعا فضلت في القسم لحد الساعة 9 صباحا بعدها قالولي يقدر تروح دلوقتي وتيجي علي النيابة في شارع الجلاء بعد ساعة او ساعة ونص (رحت البيت غيرت هدومي ونزلت علي النيابة كنت هناك الساعة 10.30 صباحا)

طبعا فضلت منتظر وكيل النيابة لما خلص القضايا اللي قدامة علي ما جه دوري انا والواد الحرامي كانت الساعة بقت 2.30 بعد الضهر وفي الوقت ده كله شفت الامرين من زوجة الحرامي الحامل في الشهر السابع وامه وشغل المسكنة والولولة والعياط (ونبي يا بيه سامحه يا بيه دا ماعملشي حاجة احنا تحت امرك نعوضك عن اللي سرقه دي متلفقاله من امناء الشرطة اللي اتخانق معاهم من يومين دي العربية التاكسي دي هو سواق عليها من اسبوع بس ....؟؟؟!)

الموقف هناك حاجة اخر مسخرة وقذارة وقلة ادب والفاظ قذرة ودخان سجاير مهبب وبراغيت و جرب كمان والله.

دخلنا النيابة وس وج ليا وللواد اللي انكر صلته بالواقعة تماما وقال انه كان ماشي بالتاكسى ولقا عربيتي شنطتها مفتوحة فمن باب الفضول وقف يقلب في الشنطة علشان يشوف فيها ايه في الوقت اللي جت فيه عربية الدورية ومسكته

طبعا وكيل النيابة ماصدقوش خالص بالذات لان الواد سوابق اصلا ومدوخ القسم وراه بقاله 8 شهور في سرقات مشابهة في نفس المنطقة.

اما بالنسبة لي فالمسروقات اللتي تم تحريزها هي كالاتي

-عدد 2 شواحن موبايل

-عدد 2 سماعة بلوتوث

-كشاف اضاءة محمول

-وش الكاسيت (الوش فقط)

-فلبر زيت جديد بكرتونته

........ كل اللي فات تم الافراج عنه وتسليمه لي من سراي النيابة بعد انتهاء التحقيق........

.... ايضا تم سرقة عدد 1كرتونة مياه معدينة ودي اتفتحت في القسم وتم اقتسامها بين افراد القوة (الف هنا وشفا) وكمان بكرة سلوتب و Cutter وكل دول موجودين في القسم وما اخدتهمش لانهم بيستعملوهم في الشغل المكتبي بعد استأذاني طبعا

.... كمان تم سرقة فرشة تنضيف السيارة و حصيرة للصلاة و باسكت صغير للزبالة (ودول اخدتهم مباشرة من القسم بدون التحريز او الذكر في محضر الشرطة) الحمد لله

.... كمان تم سرقة شنطة عدة صغيرة و علبة المناديل ودول انا ما شفتهمش في القسم ولا اتحرزوا من اساسه (يبدوا انهم كانوا في عربيه الحرامي وما اخدوش بالهم منهم انا نفسي ما خدتش بالي غير تاني يوم بالليل)

انا غيرت الزجاج في التوكيل (ابو رواش) و هاحاسب التأمين عليه هو اتكلف 423.5 جنيه بالضرائب والسلاطات وخلافه

الدرس المستفاد من هذا الموضوع بالنسبة لي هو

نار الجراج ولا جنة الشارع حتي ولو كان تحت بيتي

اولا حمدا لله على سلامة الامورة (العربية)
ثانيا ازاى متركبش انزار دة لازم ولا بود
ثالثا العربية ممكن تتسرق فى اى مكان انا تحت بيتى اتسرقت كذا عربية بحلها كلها وفى امن وحراسة وصلاح سالم وامام جنود شرطة بتوع البنوك الحرامى دلوقتى استيل غير بتاع زمان
انت بتفكرنى بواحد صحبى عربيتة اتسرقت هى سوبارو انبريزا كانت لسة نزلة سعتها واعدنا نلف على الدوريات نقلهم سوبارو هاتك يا دحك مش عرفين انهى المركة وحاجة تكسف المهم العربية رجعت بعديها بيومين الحرامى حظة الاسود كان راكن تحت بيت الواد وهو ساكن فى ستى استار حظة وجبنا العربية والحرامى هرب تعالة فى الجرنان وقام رئيس مباحث قسم مش عارف اة حاجة تفطص من الدحك