مـن كـرسى الاُتوبيـس>> لــ كـرسى الحــكـم
السلام عليكم ورحمة الله وبركاته
----
لمه كنت بركب الأُتوبيس كنت بحس بكل مشاكله وعلى طول بفكر فيه من مواعيده المتأخره لكراسيه المتكسره لناسه المكشره ، ولمه ربنا كرمنى شوية وبقيت من ركاب الميكروباص نسيت بالتدريج مشاكل الاُتوبيس وبدأت أركز مع مشاكل الميكروباص من زيادة اُجرته لزنقة قعدته وقلة أدب سواقه طول سكته ، ولمه ربنا كرم شويه كمان وبقيت من المشاورين للتاكسى كنت نسيت خالص مشاكل الأُتوبيس وفى حالة نسيان لمشاكل الميكروباص ومركز مع مشاكل التاكسى من المُشاوره للسواق اللى مابيوقفشى ورغيه فى مشاكله اللى مابتخلصشى وعداده اللى مابيشتغلشى ، ومع كرم ربنا الزياده وبقيت من أصحاب الملاكى بقى الاُتوبيس بالنسبه لى ذكرى والميكروباص بمشاكله بيخف والتاكسى لسه فى بالى شوية وركزت مع مشاكل السواقه من الشوارع المكسره والمطبات المتنطورة واللى بيخبطنى من قدام ومن ورا ..هنا وقفت مع نفسى شوية وعرفت ليه اللى بيوصل للكرسى بينسى كل مشاكله قبل الوصول وبيركز بس فى مشكلته مع الكرسى وازاى يحافظ عليه وببعد كل اللى عينه عليه ويخسف الارض باللى بيشتم فيه وشايف كل الناس حاقده عليه