فكره جديده لتلميع تابلوه العربية
السلام عليكم
انا مره روحت للكهربائى و قالى حلمعلك التابلوه بزيت الموتور و شويه جاز
بالفعل النتيجه كانت مبهرة و استمرت اللمعه اكتر من شهر و لكن الرائحه كانت كريهة
انا فكرت فى نوع زيت تانى يكون رائحته ارحم شويه و لاقيت ان زيت البرافين هو الحل
شفاف و عديم الرائحه
تأثيره يدوم حوالى 3 ايام تقريبا و ده يعتبر معدل ملمع التابلوه الجاهز زى الجوكر و غيره
فاضل العطر
انا روحت لمحا بتاع عطور تركيب و اخترت العطر المناسب و قمت بخلطه بنسبه مناسبه من المذيب ( كحول ميثيلى) و ده برضه من عند الراجل بتاع العطور و طبعا الكحول الميثيلى المستورد ملهوش رائحة
قمت بخلط القليل من العطر على زجاجة زيت الرافين كامله علشان العطر ميكونش مركز اوى و قمت بالرج جيدا و رشيته على التابلوه و مسحته باسفنجه زى اى ملمع تابلوه عادى و النتيجه كانت ممتازه
ملحوظه : الزيوت العطريه بتترك بقع و لذلك قمت بوضع المذيب الكحول الميثيلى
و يجب الرج جيدا قبل الاستعمال لتقوم بخلط الزيت بالعطر لانهم بعد شويه حينفصلوا تانى و ده برده زى تعليمات استعمال اى ملمع تابلوه
ميزه الطريقه دى طبعا السعر ثانيا العطر انا اختار العطر اللى انا عاوزه حتى لو كان ون مان شو
ارجو ان الفكره تعجبكم