الموضوع: التيدا ارتفاع وكماليات

السلام عليكم
العربيه عاليه بس مش قوي للدرجه الفظيعه اه لو محمل جامد والمطب زباله وطريقة قيادتك عنيفه هتحك في المطبات بس الكلام ده انه يجتمع فيك صعب جدا دي حاجه الباب بتاعها بيخبط في الرصيف لما تركن جمبه وبكون عالي سنه علي عكس الصني ودي جربتها مع واحد زميلي معاه صني فعلا عارف التيدا دي ايه تركب فيها تحس انك عالي فعلا عن الطريق بس ده احساس وهمي لعلو الكرسي والتنجيد الرائع فيه لكن الانخفاض ده في العربيه بيديها ثبات مش عادي علي الطريق السحب اكتر من رائع حتي مع السرعات العاليه في المجمل التيدا عربيه مش هتندم انك اشتريتها واحوال التحميل الجامد ده مش هيبقي علي طول وابقي خد بالك في المطبات اما البلاس من عدمه ده بعد متشوف العربيتين علي الطبيعه وتقارن بينهم وتشوف اهتماماتك ايه مهو اللي عند حد مهم عند التاني ممكن يبقي مش مهم وربنا يوفقك انا معايا الاوتوماتك اللي مش بلس ولو رجع الحال بيا كنت اشتريت التيدا برضه او الميجان علشان رخصت

والله ياشباب التيدا هي علا عربيه كويسه
علي فكره انا مصري مقيم بالرياض ولسه مستلم تيدا هاتشباك 2008 من ثلاثه اشهر
واللهم صلي علي النبي العربيه مش محتاجه حاجه وفعلا كماليات شئ خرافي وكفايه انها ياباني 100%

اخى الحبيب اسمح بالتواصل معك فى هذا الموضوع رغم اننى لست من ملاك التيدا ولكنى اسأل الله عز وجل ان يرزقنى اياها .. انا معايا ماتريكس 2007 والحقيقة ان الماتريكس حببتنى فى حاجات كثير جدا مش موجودة فى اى عربية تانية زى وسع الصالون وارتفاع الكراسى مما يجعلك تشعر انك قاعد فى بيتك وكمان ارتفاع السيارة عن الارض فانا املكها من 3 سنين افتكر انى كحت بيها فى مطبين بس من اللى قلبك يحبهم واحد ابن حلال عاملهم واحد فى الشرقية وواحد فى مدينة البعوث غير كده العربية فعلا عالية وصالونها واسع جدا ومريح ولما حاولت ابحث عن سيارة قريبة من هذه المواصفات لم يكن امامى الى بدائل قليلة جدا التويوتا الافانزا مثلا ودى عربية فاشلة فاشلة والتريوس وهى عالية قوى عن الارض لكن ماليزى وضيقة من الصالون وفقيرة فى التابلوه والجراند منها ممتازة بس 156000 واخيرا الكارينز وحسيت ان العربية مجمعة من البلاستيك وسوف ادفع اوفر برايس كمان على سعرها الرسمى لتغير الشكل فقط مع الفقر الشديد فى الكماليات ,, والحقيقة رحت شفت التيدا عجبتنى جدا صالون واسع جدا وفخم وبه جودة عالية فى الخامات المستخدمة وفيها كل ما يحلم به الواحد ايه بى اس وايه بى دى واير باج وكاسيت سى دى مجهز لاضافة بلوتوث لكن المهم بالنسبة لى وسع السيارة من الداخل الحقيقة لا مثيل لها فى فئتها ولا افئات الاعلى والشنطة حجمها ممتاز وارتفاع العربية عن الارض 16.7 سم وكماليات محترمة والباقى منها اللى غير موجود غير مؤثر الا فى الرفاهية فقط اما لوازم الامان المطلوبة متوفرة ... غير اننى سالت الكثير من اصحاب صالات العرض والكثير من مالكيها كلهم فعلا اشادو بيها ولم يجدوا معاها اى مشاكل لدرجة ان احدهم العربية عاملة معاه 88 الف ومش عايز يعمل الصيانة يتاعتها علشان ما يفكوش فيها حاجة طبعا كلام فاضى بس انا بنقلك الصورة ... انا فعلا ناوى على شرائها ولكنى منتظر وصول 2010 ان شاء الله ورغم ذلك باحاول ادور على واحدة 2007 مثلا للبدل مع الماتريكس لحين شراء الزيرو برضه .. واخيرا واسف جدا على الاطالة استخر الله وانا واثق من خلال السؤال والاستشارة بانك لن تندم على اختيارها ... يارجل دى يابانى 100 فى 100 وفيها كل حاجة وسعرها دلوقتى 109000 بعد الخصم يعنى بتمن الالنترا الاتوماتيك كورى وبدون اير باج وايه بى اس وايه بى دى غير فرق الخامات المستخدمة غير وسع العربية وغير وغير ... ايه تانى .. ربنا يوفق الى كل ما يحب ويرضى