الحمد لله على كل شيء .. الريسر اتخبطت في موتوها يا رجالة

الحمد لله و انا ماشي في شارع ترعة المنصورية من شوية .. بفادي عربية لقيت بلاعة في وشي .. قامت نازلة تحت العربية خابطة في الموتور من تحت و كسرت القواعد والموتور نزل في الارض .. المهم جبت ونش و وديتها للميكانيكي قالي مبدأيا الفتيس اتكسر و ال4 قواعد بتوع الموتور اتكسروا .. و لسة لما نرفع الموتور هنعرف حجم الاضرار كمان ..
المهم دلوقتي عاوز اعرف حاجة الريسر دي بلاقيها فين استيراد و الفتيس ده بيتباع عند مين و يعمله في حدود كام ؟ عشان انا معرفش في اي حاجة في ميكانية العربية دي و عاوز الم الموضوع
العربية دايو ريسر موديل 92 مانيول و حاجتها هي هي حاجة الاوبل كاديت .. فياريت لو تكرمتم لو حد عنده خبرة في الدايو القديم يفيدني للصح و شكرا

انزل الحرفيين وهتلاقى حاجتها باذن الله

0106148520 المتوكل - الحرفيين
0162229191 ابو هاشم -فيصل

اقتباس:

---

اسال عند يوسف فى محل الروضة

المحل على نفس الصف بتاع محل الطيار فى الشارع اللى فى وش الجامع

0126259725

---

حاجة اللانوس تركب عليها؟؟؟

اعتقد الفتيس هو هو و الموتور هو هو فيما يخص القواعد... يعنى لو رسيت على مكنة بفتيسها اعتقد حيبقى الاسهل و الارخص تجيب بتوع لانوس لانهم اكثر انتشارا من حاجات الريسر

MMamdouh

اقتباس:

---

المشاركة الأصلية كتبت بواسطة mmamdouh

حاجة اللانوس تركب عليها؟؟؟

اعتقد الفتيس هو هو و الموتور هو هو فيما يخص القواعد... يعنى لو رسيت على مكنة بفتيسها اعتقد حيبقى الاسهل و الارخص تجيب بتوع لانوس لانهم اكثر انتشارا من حاجات الريسر

mmamdouh

---

+11
معرفش اذا كان نفس قواعد اللانوس ولا لأ
بس حاجة العربية دى مؤرفة جدا ونادرة وعن تجربة فى الموديل دة تحديدا يمكن حاجات 94 اهون شوية
هى كعربية ممتازة بس لما بتقف انت وحظك

لو هتغير موتور وفتيس متجيبش بتوع الريسر شوف اى حاجة تانية تركب عليها عندك حاجة الاوبل القديم وحاجة الدايو - هو كلة gm - ممكن تلاقى حاجة على نفس القواعد

فى واحد قدام البنزين اللى قبل كوبرى السيده زينب ده ولا السيده عيشه بتاع فتيسات وكويس اوى

متشكر يا رجالة بجد مش عارف اقولكوا ايه
انا انهاردة من الساعة 8 الصبح و انا مع الميكانيكي .. حل الماتور من العربية و حل الفتيس قالي ان اماكن المسامير كلها تكسرت و كرتيرة الزيت اتخبطت و يستحسن نجيب واحدة جديدة عشام لو استعدلناها ممكن تنقط زيت و عقربة الفتيس اتكسرت .. و طبعا ال 3 قواعد بتوع الماتور .. المهم قلتله لملي الدنيا انا مش هغير فتيس كامل عشان اماكن المسامير فرحنا وديناه يتلحم و يتخرط و كلف 140 جنيه .. و جبت قواعد موتور لانوس ب 120 جنيه و كرتيرة زيت فتيس ب 40 جنيه وعقربة الفتيس لقيتها تايواني ب 85 جنيه و جوانات و كوعة مياه و كاوتش كوبلن ب 25 جنيه .. طبعا الحاجات دي كلها تايواني بس قولت بدل ما ادوخ عليهم استيراد و الاقيهم اغلى ..
الحمد لله الموتور اتقفل و لسة هجيب زيوت للماتور والفتيس و مصنعية الميكانيكي لوحده 250 جنيه (مش عارف ليه مستكترهم ولا ايه رأيكوا ؟ ) و المهم العربية ان شاء الله هستلمها بكرة الصبح .. والحمد لله اوي كدة

الحمد لله انها جت على قد كدة اشكر ربنا

الحمد لله جت بسيطة خلى بالك من الطرق اللى زى كدة
عندنا طريق فى الاسكندرية على ترعة المحمودية بس ربنا مايوريك منظر البلاليع والحفر والنقر والاسفل الهابط
يعنى لو مش ماشى وحاطط عينك تحت منك معرض تلبس اى حاجة من دول وغير كدة ان الطريق مش كلة منور
ربنا يلطف بينا والله احنا تعبنا من اللى بيحصل فينا دة

الحمد لله بس المشكلة انهم كانوا بيسفلتوا الطريق فالبلاليع كانت عالية بس الحمد لله محدش بيتعلم ببلاش ..
انا الحمد لله استلمت العربية امبارح بس حاسس ان الفتيس بقى انعم من الاول و الدبرياج لما بدوس عليه الrpm بيعلى و لما اشيل رجلي يقوم يوطى .. هي مكانتش بتعمل كدة الاول مش عارف هل في حاجة مش طبيعية حاصلة ولا ايه ؟
وماسورة الشكمان لما اتخبطت في البلاعة بقت صوتها رهيب عاوز اشوف بتاع شكمانات في الهرم يشوفهولي

اقتباس:

---

المشاركة الأصلية كتبت بواسطة محمد أنور

الحمد لله بس المشكلة انهم كانوا بيسفلتوا الطريق فالبلاليع كانت عالية بس الحمد لله محدش بيتعلم ببلاش ..
انا الحمد لله استلمت العربية امبارح بس حاسس ان الفتيس بقى انعم من الاول و الدبرياج لما بدوس عليه الrpm بيعلى و لما اشيل رجلي يقوم يوطى .. هي مكانتش بتعمل كدة الاول مش عارف هل في حاجة مش طبيعية حاصلة ولا ايه ؟
وماسورة الشكمان لما اتخبطت في البلاعة بقت صوتها رهيب عاوز اشوف بتاع شكمانات في الهرم يشوفهولي

---

بالنسبة للدبرياج فده مش عادي .. خلي الميكانيكي يظبط لك الدبرياج (دا باقي شغله وتديلوش فلوس تاني ) والشكمان لو الخبطة بسيطة يبقى لحامها هايكلفك 10 جنيه وللا 15 بالكتير ولو التلف كبير يبقى هاتفصل ماسورة بدل المخبوطة ودي ممكن تكلف 60 ج أو حسب التلفيات .

انهارده قلت اطلع بيها عالدائري اجرب اسحب بيها سحبة حلوة كدة ف بعد ما عدت ال120 لقيت لمبة ال check engine نورت :whtauwant: معرفش في ايه مش فاهم
و حسيت ان العفشة مش مظبوطة نزلت اشوف المساعدين الامامين لقيت واحد بياخد و يدي و التاني حجر .. معرفش هو كدة في مساعد باظ ولا في ايه .. و ايه اللي بوظه اصلا طلاما الخبطة جت في الموتور ؟!!؟؟
انا معرفش ايه القرف اللي حصل في العربية ده :120146b
تنصحوني اعمل ايه عشان انا اتضايقت اوي من اللي حصل ده ؟

حط العربية على سكانر

راجع على العفشة

MMamdouh

فين ممكن احط العربية على سكانر ؟
انهاردة رحت للعفشجي قالي ان المساعد جاب زبت و عاوز يتغير ب120 بالمصنعية .. هل ده كويس ولا غالي ؟

محمد السيد فى شارع الدقى... عنوانة و تليفونة فى موضوع فى قسم اهم الموضوعات

مش عارف بصراحةالمصنعية ايه ظروفها لانى معرفش فردة المساعد بكام... عموما لو روحت لمحمد السيد خللية يوديك عند ابو الحسن... اسال هناك على المساعد بكام و خللى محمد هاشم يبصلك على العفشة للتاكيد على طبيعة المشكلة و شوف نظام المصنعية ايه

MMamdouh

شكرا يا استاذ محمد ممدوح على ردك و اهتمامك
و ان شاء الله هروحله يوم الاتنين بعد بكرة و يا رب الاقي عنده حل و نشيك عالعربية كلها
جزاك الله خير

بالنسبة للشكمان فيه واحد في ش المطبعة الهرم اسمه (مهنى) و هو صنيعي كويس و تليفونه 0108344996