نيو أكسنت ولا اسبيرانزا m11

**ahmeddarhos** · 04-11-2009 07:39 PM

مساء الخير على احلى منتدى على النت...
بصراحة يا جماعه انا محتار جدا بين النيو أكسنت و m11 وعارف ان فى ناس كتير هترد رد بديهى جدا وهو انى ازاى أقارن بين الكورى والصينى.. وممكن يكون عندهم حق بس انا نفسى أسمع اراء محايدة من ناس جربوا العربيتين أو واحدة فيهم لأنى محتار جدا والعربيتين عاجبيننى قوى..
وأخيرا ألف شكر وجزاكم الله كل خير

**medo_2060** · 04-11-2009 10:04 PM

شوف هو ال m11 لسه مخدتش وقتها ولسه ما اثبتتش انها عربيه تستاهل تجيبها بدون تفكير بس كل الى جابها مبسوط منها اوى وبيشكر فيها وبيقولوا انهم عدلوا كل عيوب الاسبرانزا القديمه وان العربيه دى حاجه تانيه
بعكس النيو اكسنت ثبتت نفسها فى السوق وعربيه محترمه جدا وقطع غيارها منتشره بس برضه هى اغلى من الm11 بمبلغ مش هين
فى النهايه شوف الى يناسب احتاجاتك وربنا يوفقك(وتوقع مليون واحد هيدخل ويشتم فى الصينى ببساطه ويقولك بتقارن ايه ايه ياراجل ههههههههههه دلوقتى تشوف)

**Hosam_Optrawy** · 05-11-2009 12:12 AM

مفيهاش حاجه لما تقارن اى عربيه باى عربيه مادام كويسه وقريبه منها فى السعر ونفس الفئه

والمقارنه اللى انت عاملها مقبوله جدا

فى الوضع الحالى الأكسنت معروفه أكتر وأضمن

ال m11 لسه فى بدايتها بس فى ناس كتير بتشكر فيها وانا متوقعلها نجاح

لو عايز تبقى فى المضمون خليك فى الأكسنت

**ahmeddarhos** · 08-11-2009 01:33 AM

ايه يا جماعه هم أعضاء المنتدى فى أجازة ولا ايه..؟؟؟؟ ولا العربيتين وحشين..

**Eng.Geo** · 08-11-2009 06:24 PM

انا في الحقيقة مجربتش الm11 بس كل للي جابها ماشتكاش منها اما الاكسنت فمتجربة كويس وعربية اثبتت كفائتها وقطع غيارها منتشرة بس الكلام ده كله لا يرجح كفة الاكسنت علي الm11 بس هو الفرق ان ده متجربه و ده لأ بس في الحقيقة انا عاجباني الm11 كشكل ومن كلام الناس عجبتني اكتر ولا يهمني انها صيني او لا المهم هي كويسة ولا لأ لانك مش هتشتري الصين انت هتشتري عربية من عندهم فقط بس في حاجة مش كويسة في الm11 وهي توكيلها للاسف ابو الفتوح بتاع دايو و bmw غير بتا اسبيرانزا لو عايز تتاكد روح وشوف وبرده غبور مش كويس .
في النهاية انت لازم تجرب الاتنين وتشوف انهي انسبلك وبلاش تسمع للناس اللي بتقولك بلاش الصيني لانه لو بنبص النظرة ده للعربيات يبقي كنا قلنا وقت ما نزلت سيات الابيزا: بلاش ده شوف كانت عامله عربيه عامله ازاي اللي هي 133 وبعد كده الابيزا اثبتت كفائتها و قيس علي كده كتييير.
لازم تشوف انهي انسبلك مش اللي الناس شايفاها عليك احلي.
ارجو اكون وضحتلك الفكرة.

**dolly13** · 08-11-2009 06:28 PM

والله الاتنين احلى من بعض
واحدة مضمونة جدا
والتانية الناس بتشكر فيها ناهيك عن كم الرفاهية اللى فيها
عموما ربنا يوفقك وتختار حاجة كويسة

**ahmeddarhos** · 09-11-2009 04:40 PM

بصراحة يا جماعة انا متشكر جدا على اهتمامكم وارائكم القيمة... عموما أنا اتوكلت على الله و صليت استخارة و بدأت فى اجراءات شراء m11 من معرض أبوغالى.. عن طريق مدير مبيعات اسبيرانزا فى فرع روكسى اللى هو محمد حمد.. هو ساكن قصادى فى نفس العمارة و اتكلمت معاه كتيييير جدا و بصراحة كل كلامه عن العربية انها تحفه .. و انهم تلافوا كل عيوب التقفيل اللى كانت موجودة قبل كده .. و ان العربية دى حاجة تانية..
عموما منتظر دعواتكم بالتوفيق