ازاى اعرف ان الرشاشات شغالة تمام

**samirayad** · 16-11-2009 07:33 AM

روح فضى شوية الزيت الزياده
ونزل ربع لتر فى وعاء نظيف (علشان تشوف نظام المقاس تانى يمكن تحتاج منهم حاجه للتزويد )
لو زيت كتير نزل من الطبه
بتهوية الطبه من تحت
ونظف البوجيهات وجرب
يمكن ربنا ييسر وتخلص من الوضع المقلق ده

**zocor742** · 17-11-2009 08:21 PM

انا اسف ياهندسة اتأخرت فى الرد
بس النت مش كان شغال عندى ولسة واصل حالا
تمام ياباشا هعمل كدة ان شاء الله انا مكنتش قريت رد حضرتك عشان اتصرف كنت مستنى النت يجى عشان انفذ اللى هتقولهولى
ان شاء الله ربنا هيسر الوضع
بس اللى مطمنى حالا انى كشفتعلى العربية على الاسكانر وقومت بقياس كبس المكنة و كشفت على الدخنة عند اكتر من واحد عشان اشوف الكلام متناقض ولا واحد وكلهم اكدوا ان حالة المكنة ماشاء الله ومحدش لاقى سبب لحدوث الدخنة غير انها بخار مياة ورواسب جكمان وكنت اروح اوصف الوضع واسيب العربية ساعة ولا اتنين عشان تبرد وتبقى العملية قدام عنيهم
وبردوا اللى طمنى اكتر ان نسبة الدخنة بقت اقل بكتير عن ماكانت ايام لسة مغير زيت
بس اللى قلقنى ان واحد قالى اخلص من الزيت دة عشان ميضرب اى جوان فى المكنة بس كنت محتاج رأى حضرتك الاول قبل ان اتصرف

**samirayad** · 17-11-2009 08:49 PM

وبردوا اللى طمنى اكتر ان نسبة الدخنة بقت اقل بكتير عن ماكانت ايام لسة مغير زيت

طيب أخبار مقاس الزيت أيه دلوقتى
مش بيقل برضه وبيتجه نحو علامة ال max

بس اللى قلقنى ان واحد قالى اخلص من الزيت دة عشان ميضرب اى جوان فى المكنة بس كنت محتاج رأى حضرتك الاول قبل ان اتصرف

فعلا زيادة منسوب الزيت عن الحد المعقول بتزود الضغط جوه الكرتير
وممكن تأثر على سيلات عمود الكرنك
بس طمنى الأول على مقاس الزيت
بيقل ولا لا

**zocor742** · 17-11-2009 09:14 PM

هو قل شوية عن الاول يجى ربع الزيادة اللى كانت موجودة فى الاول
وشايف تعريق خفيف مكنش بيحص عندى بس مش عند الجوانات على الجسم المعدن

**samirayad** · 17-11-2009 10:02 PM

هو قل شوية عن الاول يجى ربع الزيادة اللى كانت موجودة فى الاول

ظبط المقاس

وشايف تعريق خفيف مكنش بيحص عندى بس مش عند الجوانات على الجسم المعدن

احتمال بخر من جراب مقاس الزيت بسبب زيادة الضغط

**zocor742** · 18-11-2009 01:41 AM

المشاركة الأصلية كتبت بواسطة samirayad

ظبط المقاس

ان شاء الله بكرة ان كان فى العمر بقية

**zocor742** · 19-11-2009 12:01 AM

الحمد لله النهاردة انتهيت من مشكلة زيادة الزيت
نزلت حوالى ربع كيلو زيت وقفلت الطبة ونزلت العربية من الكوريك
وقست الزيت لقيتة تحت الماكس بشعرة قولت كدة تمام وعقبال الصبح الزيت لما يتصفا فى الكارتيرة ابقى اقيسة بالظبط
العربية ماكنتش باردة اوى يعنى روحت مشوار قصير قبل الماتش وبعد الماتش نزلت عملت الشغلة مع جارى بنفسى فى الجراج عندة

دورت العربية ومستنى اشوف اى فروق واضحة عن الاول
المكنة صوتها هدي شوية قولت اسيب العربية تسخن براحتها واشوفها هتعمل نفس السيناريو ولا لأ(اول ما مؤشر الحرارة يثبت يبتدى تطلع دخانة شوية وتختفى متظهرش تانى غير لما تبرد الحوار يتعاد)ومتابع الحرارة مش ملاحظ دخنة نهائى حتى فضلت ازود بنزين عشان اتأكد لو لسة فى اى دخنة
مفيش حاجة ظهرت والجكمان طلع شوية رزاز مياة بطلت العربية وسيبتها ساعة ونص كدة ورجعت دورتها تانى وتابعت العادم والدخنة خلااااص اختفت
والله فرحت اوى وقولت الحمد لله ان الموضوع كلة كان من الزيت الزيادة وطبعا بشكر الباش مهندس سمير عياد لوقفتة جنبى واكيد كبيرنا سيادة المستشار محمد ممدوح اللى مسبنيش من اول الموضوع وساعدنى فى حاجات كتير وشكرا لكل ما ساهم فى الموضوع

الحمد لله على كدة وربنا يثبت الاوضاع على كدة وابقى اتابع تأخير الدوارة اشوفهااختفت ولا مش موجودة وابلغكم بالجديد
شكر جزيلا يا اخوانى على وقفتكم جنبى

**cazanovausa** · 20-11-2009 12:57 PM

[aldl][sor1]http://www.nilemotors.net/Nile/signaturepics/sigpic5950_8.gif[/sor1][/aldl]
والله انا بحكم خبرتى فى الرشاشات فان الغياب فى الدوارة دى عيب رشاشات ولو غيرتهم هتلاقى العربيه زى الفل انا كان مع واحد صحبى نفس المشكله وهو معاة نوبيرا 1 برده وبعد تغيير الرشاشات بقت العربيه زى الفل

**zocor742** · 20-11-2009 10:01 PM

شكرا كازانوفا على الرد
هو الصراحة موضوع تأخير الدوارة اتظبط بشكل ملحوظ عن الاول وبقت قليل اوى لما تندل معايا (طبعا الحمد لله)
فعايز اطلع من الرشاشات بتوع العربية الاصلى برشاشات هيونداى اوبى ام بس زى ماتقول بحاول اسئل واستفسر على انسب رشاشات اركبها وتجيب نتيجة احسن من الاصلى بتوع العربية
بس ياريت لو تعرفلى صاحب حضرتك ركب رشاشات اية للعربية هندة اكون شاكر لخدمتك
وطبعا الف شكر لمرور حضرتك للموضوع ونورت ياباشا

**MoMohsen** · 22-11-2009 12:48 AM

هو الصراحة موضوع تأخير الدوارة اتظبط بشكل ملحوظ عن الاول وبقت قليل اوى لما تندل معايا (طبعا الحمد لله)
فعايز اطلع من الرشاشات بتوع العربية الاصلى برشاشات هيونداى اوبى ام بس زى ماتقول بحاول اسئل واستفسر على انسب رشاشات اركبها وتجيب نتيجة احسن من الاصلى بتوع العربية
بس ياريت لو تعرفلى صاحب حضرتك ركب رشاشات اية للعربية هندة اكون شاكر لخدمتك
وطبعا الف شكر لمرور حضرتك للموضوع ونورت ياباشا

على فكرة انا العربيه عندى بتتأخر فى الدوارة بالذات لما اسيبها فترة قصيرة من ربع ساعه الى ساعتين و شاكك فى الرشاشات .لو هتنزل تجيب رشاشات قولى و ننزل مع بعض.