أول مشكلة
اوقات لما اجى أدور العربية مش بسمع أى صوت غير تكه صغيره جدا والمشكله ان الموضوع ده بيحصل على فترات متباعدة وغيرت قبل كدة الاوتوماتيك بتاع المارش وغيرت البطارية وبرضو لسه المشكلة موجوده (العربية دلوقتى عند الكهربائى وهايركب كتاوت تقوية للمارش)
ثانى مشكلة
عندى اضاءة الكشافات قوية وانا ماشى ببطء لكن أول لما سرعتى بتزيد عن 60 كيلو فعلا بحس ان الاضاءة ضعيفة مع العلم انى مركب كتاوت تقوية للنور بالاضافة للمبات هالوجين فيليبس المانى وبطارتى جديدة 70 امبير ةتم شراؤها من شهر ونصف فقط (العربية دلوقتى عند الكهربائى والباشا بيقول ان الشحن سليم لكن البطارية مش مشحونه وعايز يحطها على الشحن عنده)
ثالث مشكلة
ركبت لمبات هالوجين لنور الشبورة لكن مش شغاله كويس علشان ملهاش كتاوت تقوية فهل يمكن استخدام كتاوت التقوية الخاصة بالنور الكبير ولا لازم كتاوت منفصله (العربية دلوقتى عند الكهربائى والباشا مش عارف ولسه هايسأل اذا كان ينفع ولا لازم كتاوت منفصله)
رابع مشكلة
عندى طقة بتحصل مع الغيارات ومع المطبات الخفيفة وبدأت تزيد بشكل مقرف وفى ناس بتقول انها جلب مقصات وفى ناس بتقول لأ ديه من الباب لكن بصراحة انا مش عارف ايه سببها بالظبط - حتى مكان الطقة مش قادر احدده أوقات اقول انها تحت الدريكسيون مباشره وأوقات اقول انها فى الباب وأوقات اقول انها فى منتصف السيارة بالظبط
خامس مشكة (من الممكن تكون مرتبطة بالرابعه)
لما بسيب عربيتى فتره طويلة واجى اكسر الدركسيون يمين على الاخر أو شمال على الاخر بسمع صوت طقة عالية جدا وانا واقف - محمد عبده الميكانيكى كان قال لى ان الموضوع ده بسبب انى مركب دوشمة فى الناحية اليمين خاصة بالاسبيرو لكن الغريب ان اوقات الصوت بيظهر فى الناحية الشمال فياترى ايه السبب؟
سادس مشكلة
لما كنت عند محمد عبده اخر مره من حوالى 3 شهور عملت حاجات كتيييييييييييييييير كالمعتاد من ضمنها تغيير بلى العجل كله - العجلة اللى ورا يمين بعد التغيير بيومين حسيت زى ما يكون فيه سلك ناشف بيخبط فى العجل والصاج لمدة 20 ثانية وبعد كدة الصوت راح - بعد كده بقى فيه صوت بيظهر فقط لما باخد مطب زى عيون القطة أو انى ادوس على زلطة من الناحية اليمين ورا فقط - زى ما يكون المساعد بيخبط فى الصاج أو فيه زلطه بتخبط فى الصاج وروحت لكذا عافشجى والكل بيقولوا ان العفشة سلية ومفيش حاجة ورا - فى اى اقتراحات
سابعا
عندى مشكلة انى لما بركب معاية اكتر من شخص واحد العربية بتتحول لسلحفاء بجد مش هزار - لدرجة ان واحد قريبة معاه مازدا موديل 80 كان بيعدينى بمراااااااااااااااحل فياترى ده عيب موبينة ولا طقم دبرياج ولا ايه بالظبط
ثامنا
عندى العربية كنت بزود ميه كل شهرين تقريبا دلوقتى القربة بقت بتفضى كل اسبوع ومش قادر احدد المشكلة منين
تاسعا وان شاء الله اخيرا
حد يشوف لنا اى حل فى حرق البنزين - انا حاولت فى حاجات كتيييييييييييييرة وبرضو فشلت
هانعتبر ان عربياتنا مظبوطه ونحاول اننا نخلى العربيات توفر بنزين أكتر..... طيب ازاااااااااااااااااى؟
انا واحد من الناس هاقول كل اللى عملته فى عربيتى وهاقول النتيجة كانت ايه
1- تغيير رشاشات اللانوس الاصلية برشاشات BMW التوفير -> 0% - -5%
2-تغيير فلتر الهواء وفلتر البنزين ومراجعة تقسيمة سير الكاتينة -> 3% ولفتره مؤقته
3-زيادة ضغط الاطارات الى 35 -> 1% على اقصى تقدير
4- تقليل وزن السيارة وذلك عن تفريغ شنطة السيارة بالكامل -> 0%
5- قيادة هادئة جدا جدا جدا بشكل ممييييييييييت -> 5% - 10%
6- القيادة بطريقة الانزلاق -> 1%
7-تقليل استخدام التكييف -> 5% بشكل عام
8-على الطرق السريعة استخدام سرعات ثابتة بدون تكييف 90 كيلو -> 30% - 45%
ديه كانت الطرق التقليدية اللى اعتقد كلنا ممكن نكون جربنها لكن فى النهاية برضو الاستهلاك جوه البلد زيادة
نيجى للطرق الغير تقليديه
1- تنظيف المينفوالد -> 0%
2-ايدال ليرنينج -> 5% ثابته
3-وضع تيفلون على غطاء البنزين لإحكام غلق التنك لم اقم بتجربتها بعد
4- تركيب قطع مغناطيس على خرطوم البنزين الداخل الى الرشاشات بكل الطرق -> 0%
5- تركيب شكل بلاستيك بعد فلتر الهواء وذلك لتغيير شكل خروج الهواءtornado system ->0%
6- تركيب بوجيهات 3 شمعة بعد مقارنتها ببوجيهات 1 شمعة عملت لمسافة 400 كيلو فقط -> 0%