السلام عليكم
ياريت كل واحد يحكيلنا عن لماذا إختار سيارته الحالية ؟
ما هى السيارة اللى ناوى يشتريها بعد كده ؟؟؟؟
السلام عليكم
ياريت كل واحد يحكيلنا عن لماذا إختار سيارته الحالية ؟
ما هى السيارة اللى ناوى يشتريها بعد كده ؟؟؟؟
انا معايا الانترا 2006 و العربيه دى كانت شاده نظرى قوى بشكلها من زمان و كنت حاسس انها فخمه و فوانسها بتتمحك فى ال بى ام هههههه و طبعا على قد فلوسك مد رجليك و ماكنش معايا فلوس علشان اغير اللى كانت معايا ...... المهم اول ما جالى فلوس و اقدر اغير عربيتى قارنت بين 3 عربيات الانترا 2006 , الانترا 2007 و لانسر 1300 ........
و لكن فى رأيى انى عايز 2006 و بعد عده مقارنات كثيره و عده اسئله اكتر و مشوره ناس لها خبره فى العربيات من اصدقائى رسيت على الانترا 2006 و لعده اسباب منها :
-اوسع بالنسبه لى من الانترا 2007 و لانسر ( انا مليان و طويل و عريض - يعنى كل حاجه و بزياده الحمد لله هههههه)
-شكلها عاجبنى جدا جدا و مازال الحمد لله و من احلى العربيات تصميما فى رأيي و بالمبلغ اللى هاشترى بيه .
-عربيه واسعه و عائليه و تمشى شبابى و تمشى عائلى ( كل واحد و نظرته )
-كان فيها كماليات اكتر من الانترا 2007 المانيوال , زى (نور القرأه اللى فى الصالون - جراب النضاره - المسند اللى فى النص - التابلوه فى رأيي شكله احلى - كرسى السائق له عده اوضاع اكتر ) طبعا هى كماليات لاتذكر بالنسبه للى بيشترى سياره بس برده كان عاجبنى شكلها اكتر من 2007 و بالذات انى مش بشترى علشان اغير كمان سنه او اتنين فموضوع تغيير الشكل فى الموديلات مش هايفرق معايا قوى .
- اللون الأسود حلو قوى عليها و كنت خايف ملاقيش اسود و ما كنتش هاشترى العربيه دى بجد ساعتها لأنى ماكنتش هاشترى غير اسود.
و طبعا كله هايسألنى اشمعنى اسود ؟؟ هاقوله علشان و انا نازل اشترى العربيه و ادور عليها كنت شفت محل كاوتش بيبيع جنوط فعجبنى جنط يليق مع الأسود قوى فأشتريته من قبل ما اجيب العربيه ههههههههه و قلتله ادى الفلوس اهى و انا رايح اشترى العربيه بقى, المهم حتى الراجل استغرب و حسيت انه بيقول ايه العبيط اللى بيشترى جنوط قبل ما يجيب العربيه ده ... المهم اتصاحبنا انا و صاحب المحل و ركبت الجنوط و اشتريت منه شقه كمان ههههههههههههههههههههه( شفتم جنوط العربيه كانت سبب فى ايه ؟؟ هههه) سبحان الله بجد .
طولت عليكم.
A7'OOKOM
Sherif
موضوع حلو جدا يا شاركى...
بالنسبه ليا انا اخترت هيواندى النترا 2007 لعدة اسباب وهى
1- الأمكانيات الماديه المتاحه فى الفتره الحاليه
2- سمعتها (الهيوانداى) فى سوق السيارات معقوله جدا
3- توافر قطع الغيار وسعرها المعقول نسبيا
4- سهولة الصيانه وانتشار مراكز االصيانه
5- سعر اعادة البيع معقول
6- كنت عايز عربيه موتورها 1600 لأنى زهقت من ال 1200 وال 1300
اما العربيه اللى ناوى اجيبها المرحله اللى جايه انشاء الله واللى مش حتقل عن 3 سنوات
هى جيب شيروكى - ليبرتى - مستعمل موديل 2006 على الأقل
أنا اشتريت الهوندا سيتى فى أواخر مايو 2006 يعنى من حوالى سنة ... وقتها كان السوق وضع مختلف شوية عن دلوقتى ... و كان شرطى الأساسى انى أجيب حاجة يابانى وعائلية ... كنت عايز كورولا فول أوبشن مانيوال لكن مكانش سعرها مناسب بالنسبة لى و كان وقتها الياريس نازلة جديد و كنت شايف انها سيارة ممتازة لكن مشكلتها انها وقتها مكانتش بتنزل فول أوبشن و فكرت أجيبها لكن تراجعت بعد ذلك ... و كانت اللانسر فى الوقت دة أسعارها أغلى بكتير من دلوقت ... و كانت النيسان صنى بدأ تجميعها فى مصر و بصراحة لما اتفرجت عليها شكلها معجبنيش (مجرد مسألة أذواق) و كمان سمعة التجميع المصرى ليست جيدة فآثرت الابتعاد عنها ...
و فى الوقت دة لقيت الفطيم عامل تخفيضات على الهوندا سيتى و كان سعرها الجديد مناسب لى ... كان وقتها 98 ألف (المانيوال) ... روحت اتفرجت عليها و فوجئت انها السيارة الوحيدة فى السوق وقتها اللى فيها مجموعة الكماليات دى: 2 ايرباج، فرامل ABS، دركسيون EPS، دواسة البنزين throttle by wire، ايموبيلايزر، ريموت كونترول، الكنبة الخلفية جزئين منفصلين و بتفتح على الشنطة و ممكن كمان رفع قاعدتها لأعلى لوضع الأشياء الطويلة (و دى اوبشن مشفتهاش فى أى عربية تانية حتى الآن)، الكنبة الخلفية مريحة جداً و سهل الجلوس و القيام منها لارتفاعها العالى، أوسع شنطة فى كل السيارات اللى اتفرجت عليها - 500 لتر - و عمقها كبير جداً عشان تنك البنزين مش تحت الشنطة، موتور 1500 سى سى (بينما كان كل العربيات اليابانى الأخرى اللى سعرها قريب منها 1300)، زائد طبعاً باقى الكماليات العادية (تكييف، مرايات كهربا، زجاج كهربا، سى دى، سنتر ... الخ) ... و كمان عرفت وقتها ان السيارة دى هى النسخة السيدان من سيارة بتنزل فى أمريكا باسم هوندا فيت و فى أوروبا باسم هوندا جاز و العربية دى واخدة تقييمات رائعة فى جميع (نعم ... جميع) مواقع و مجلات تقييم السيارات اللى دخلت عليها (carsurvey, edmunds, topgear, whatcar, yahoo autos ... etc, etc) ...
كان التخوف الوحيد بالنسبة لى ان العربية تجميع تايلندى ... و لكن سألت بعض من اشتروا السيارة و الموديلات الأقدم منها فأكدوا لى ان تقفيلها ممتاز و دة اللى أنا حسيته كمان لما اتفرجت عليها و بعدين دورت على النت لقيت ان مصنع هوندا تايلند مصنع بقاله أكتر من 20 سنة شغال و بيصدر سيارات هوندا للسوق الأوروبية و بالتالى مفيش قلق من مستوى التجميع ... فتوكلت على الله و اشتريتها و كان فيها ميزة انها تسليم فورى على عكس تويوتا و نيسان صنى كان عليهم waiting list و الحمدلله العربية بقالها معايا سنة و أكتر من 21 ألف كيلو و لم تحدث بها أى مشاكل و الحمدلله ...
طيب لو كنت النهاردة اللى بأشترى هل كان الموضوع اختلف؟ أعتقد نعم لأن السوق دلوقت مختلف عن وقتها ... لانسر أسعاها نزلت جامد عن الأول بينما السيتى أسعاها نزلت لكن بنسبة أقل بل لما نزل موديل 2007 منها رفعوا سعره جامد بحيث مبقتش منافسة زى الأول ... أعتقد كنت غالباً حأجيب لانسر 1600
العربية اللى بأفكر فيها قدام ان شاء الله؟ بصراحة مش عارف ... السوق بقى فيه اختيارات كتير محيرة دلوقتى و كلها ممتازة ... يمكن تويوتا افنسس ... يمكن اوكتافيا A5 ... يكمن تيريوس فول أوبشن .... بصراحة مش عارف .. لكن بما ان الكلام دة ان شاء الله مش حيبقى قبل 2010 أو 2011 يبقى خلينا ننتظر أكيد حيحصل تغيرات كتير وقتها ...
انا اشتريت هوندا سيتي علشان احمد جاب هوندا سيتي :lol:
قصدي كل المميزات اللي احمد قالها في رسالته
و كمان زياده الستيرترونيك
سبحان الله كل شيئ مكتوب
اكتر حاجه مفرحاني اني راضي عن اختياري و مش بحس اني ممكن اجيب حاجه احسن بنفس السعر
السياره القادمه حتكون الماني ان شاء الله
اعتقد ما فيش احسن من الالماني بعد الياباني
مش كده ولا ايه
السلام عليكم
حتكلم على إختيارى للرينو ميجان 2005 االى كل يوم بيزيد إقتناعى بيها .
أولا لما حبيت أشتريها كانت بـ 136.000 جم و كنت بفضل بينها و بين الكرولا فول أوبشن أوتوماتيك و الأوكتافيا A5 المانيوال لكن المنافسة حسمت لصالح الميجان.
سيارة فيها كل اللى أنا عايزه من أوبشن و أمان و ثبات و جودة (كلام موقع What Car إن هى أعلى جودة فى فئتها مع الجولف) و كل دا بسعر مناسب فتوكلت على الله و إشتريتها .
بصراحة الأوبشنز اللى فى السيارة تحفة يعنى فيها مثلا:
1- تكييف و باور ستيرنج حكاية و سنتر و زجاج كهرباء.
2- سينسور مطر و سينسور نور .
3- 6 إيرباج .
4-كمبيوترأعطال.
5- فتيس ستيبترونك (معنديش مشاكل فيه)
6-ستائر خلفية و جانبية.
7-فرامل ABS قوية جدا و EBD
9- طبعا الكارت
دا غير التوكيل ياجماعة محترم جدا و الناس بصراحة زوق قوى لكن قطع غيارها غاليه جدا :(
بصراحة السيارة تحفة و كل يوم فعلا بيزيد إقتناعى بيها و بتأكد من إن ربنا وفقنى فى الإختيار الحمد لله
السيارة المتوقع أجيبها بصراحة لسه مش عارف لإنى لسه مازهتقش من الميجان :)
بس ممكن تكون إن شاء الله الأودى A4 موديل السنة اللى حاشترى فيها
أو رينو ميجان برضه موديل السنة اللى ناوى أشترى فيها :)
أنا اشتريت ياريس اتوماتيك أغسطس 2006 بعد بحث ودراسه وتوفيق من الله
اسباب التفكير في شرائها بعد تحديد أحتياجاتي وكانت:
1- الأمكانيات الماديه المتاحه : حد أقصي 90 ألف
2- أوتوماتيك
3- تقفيل مش مصري لأن كل المصري اللي شوفته كان سيء جدا
4- يفضل تكون سيدان
5- الكماليات متفرقش معايا قوي
6- الأستلام بالكتير قوي بعد أسبوعين
7-انتشار مراكز االصيانه + سمعه الماركه" يا سلام لو تبقي ياباني"
8- يفضل موتور 1300 لتوفير البنزين بشرط أنه ميأثرش علي قوه العربيه - بس ده أخر سبب يهمني
السيارات المتاحه وقتها وممكن تطبق عليهم الشروط كانت :
نيو أكسنت
كيا ريو
جين 2
سيريون
ياريس
طبعا أختارت الياريس والحمد لله ربنا وفقني في الأختيار ده.
السلام عليكم
بالنسبة لإختيار للياريس دى لسه جيبها من شهر و نصف .
لما فكرت أجيب لمراتى عربية لقيت لازم يكون فيها الحاجات دى:
1-شكل جديد و لسه حيقعد شوية.
2-سيارة أتوماتيك.
3-ناعمة فى سواقتها و ماركة محترمة و توكيل محترم.
4-فى حدود 100.000 جم.
5-فول أوبشنز (تكييف +باور +سنتر+زجاج+ABS+EBD)
6-مساحة الشنطة كويسة.
7-مساحة السيارة كويسة.
8-تقفيل السيارة حلو.
مالقيتش قدامى غير الياريس و الإلنترا و الأوبترا .
إستبعت الأوبترا لعدم إقتناعى بيها قوى .
و بعد كده إستبعت الإلنترا لإنى بصراحة مقتنع طالما قدامى أجيب يابانى جديد بتمن كورى جديد يبقى يابانى حتى لو 1300(رأى الشخصى) و فى نفس الوقت كنت مقتنع جدا بالياريس بعد ما سألت كذا واحد جايبة و سوقتها منهم
بصراحة السيارة دلوقتى عاملة 1800 كم و مراتى معجبة بيها جدا و أنا بسوقها كتير و معجب بيها جدا
بصراحة حتى الأن سيارة ممتازة و سحبها ممتاز و التكييف مابيأثرش فى السحب خالص .
سلام عليكم يا جماعة انا عارف انى الموضوع قديم بس انا حبيت افتح الموضوع تانى علشان اشارك برائى اللى يحتمل الصواب او الخطأ
انا بقالى فترة عاوز اشترى سيارة فى مصر علما بانى عايش وبشتغل فى دبى وبطبيعة الحال مش هقولكوا على العربيات فى الامارات بصراحة حاجة تشرح القلب اعلى مستوى سيارات وعلى فكرة انا معايا هنا تويتا كورولا 2008 ومازدا 6 2005 وممكن كنت انزل الكرولا لانى المالك الاول ليها بس بصراحة مردتش وفضلت انى اشترى الراااااااااااااااااااائع ة اوكتافيا a5 وده لعده اسباب :-
1- العربية ما شاء الله سمعتها حلوة جدا فى مصر وسعر اعادة البيع حلو جداااا
2- تحس وانت راكب العربية انك راكبة حاجة فخمة جدا وده يرجع للخامات المصنع بيها التابلوة على عكس التيوتا كرولا 2008
3- العربية عالية عن الارض وفى نفس الوقت ثاااااااااااااابتة جداااااااااا وده يرجع لانظمة التعليق فيها الممتازة
4- فيها تكنولجيا وامكانيات تحفة زى كمبيوتر الاعطال-حساب الكيلو متر المتبقى على حسب كمية البنزين - تحديد اقصى سرعة ممكن تمشى بيها -التحكم من التارة فى الكاسيت والسى دى والصوت -زرار لمعرفة ضغط الاطارات - وحاجات تانى انا مش فاكرها
5-صاج العربية قووووووووى جداااااا وبيستحمل كتير ده حتى الفوانيس الامامية ضد الكسر وبتستحمل زى الصاج
6-الشنطة بتاعتها واسعة بطريقة غريبة جداااا 560 لتر يعنى تشيل فيها زى ما انت عاوز
7-ده غير الرفاهيه اللى فى العربية من تلاجة وكراسى جلد وفتحة سقف وجى بى اس وكاركيت وتلفزيون ووصلة يو اس بى و اى بود وايه يو اكس والحاجات الخرجية زى الجنوط وحساسات المطر والزينون ونظام التحكم فى الاضاءة وحاجات كتيرر
8-ثبات العربية على السرعات العالية ومتحسش اصلا انك بتجرى بيها خااااالص لانى موتورها بيولد اقصى عزم يعتبر عند 4100 لفه
9-قطع غيار العربية رخيصة مش غالية زى ما فى ناس بتقول وفى منها تايوانى وتركى والمانى واصلى وبتتباع فى كل مكان
10- مراكز الخدمة بتاعتها حلوة جدا وفيها ناس محترمة بصراحة بتحاول تساعدك
وده كل اللى انا فاكرة من اللى خالنى اشترى الاوكتافيا a5 وعلى فكرة انا جبتها مستعملة موديل 2007 بس ماشية 41 الف بس يعتبر كسر زيرو
أختارت 128 عشان أتعلم بيها السواقة و عشان أنا خوافة جدا جدا كانت هيه الإختيار الأمثل :::
1 - عضمها جامد وكل العربيات على الطريق بتعمل لها حساب :funny34d: و خصوصا الشباب اللى بيسوق بسرعة بالعربيات الحديثة :afro: ...
الخوف بس من الميكروباصات و العربيات النقل :sifone: والموتوسيكلات :scooter: و ربنا يسترها و يكفينا شرهم
2 - تمنها رخيص قطع غيارها رخيصة و استهلاكها ومصاريفها و صيانتها رخيصة برضو ... يعنى أتعلم وأنا مطمنه من ناحية المصاريف :16:
3 - شكلها معقول و تنفع شبابى أو عائلية و صالونها أوسع من الفيورا و الماروتى و شنطتها معقولة و أخف من اللادا فى القيادة :Ka_che1[1]:
لقيت نفسى مش هأقدر أسوق :oops1: ... أبيعها و برضك مش هأخسر كتير :surrender:
أما بقى لو لقيت نفسى تمام فى السواقة وأتخلصت من الخوف:ph34r: إن شاء الله بفكر أشترى عربية زيرو :auto:
وساعتها بقى أقارن بين البيكانتو أو الساجا أو البونتو ... من الآخر حاجة فى حدود الـ 65 - 70 كدا و ربنا يكرم إن شاء الله يا رب :praying:
موضوع العربيات معايا انا ماشى بالنصيب تماما
تبقى بتدور على نوع و تشترى حاجة تانية خالص