الموضوع: هو هشام نسيم المغامرالمصرى هو نفسه اللى متجوز اسرائيليه ؟؟؟؟؟

السادة الأفاضل
أقول ما أقوله وأنا مسلم وزوجتي مسلمة وإبني إسمه محمد
في الوقت ذاته لو كنت حبيت واحدة مسيحية أو يهودية كنت هاتجوزها برضه وليها الحرية تبقي علي دينها أو تتركه لتعتنق الإسلام وأولادي سيكونوا منها مسلمين موحدين !
إذا بقوا الأولاد في إسرائيل لو الأم يهودية وفقاً للقوانين والشريعة و اليهودية فهم يهود (ونص اليهود ما يعرفوش حاجة عن اليهودية وبيكرهوا عاداتها ولا يتمسكون بها) ويتم تجنديهم في الجيش ويكتسبوا حق المواطنة .
أكرر قبل أن أبدأ ما أقوله ليس دفاعاً عن فعل هشام
أي حد مننا يحط نفسه مكان الراجل ده ويفترض إنه إتجوز يهودية ( وفي فرق كبير بين يهودية وإسرائيلية وصهيونية )
- يهودية تعتنق دين سيدنا موسي عليه السلام ومش شرط تكون عاوزه تبيد العرب والمواويل دي
- إسرائيلية قد تكون مسلمة أو مسيحية أو يهودية ولديها الجنسية الإسرائيلية نتيجة هجرة أو إقامة أو زواج علي أرض إسرائيل
- صهيونية : يهودية متعصبة لليهود تكره العرب والمسيحيين والمسلمين وتتمني إبادتهم جميعاً
في حاله السيد هشام نتيجه لوجود الكمبات في هذه المنطقة إلي أبوه البطل كان أخد أرضه فيها ووجود السياحة الإسرائيلية بكثرة هناك زي ما أغلب شباب المنتدي عارف نشأت العلاقة وبعدين الجواز ولا كنا نحب إن الأستاذ هشام يقضيها في الحرام وساعتها نقول هو واد شقي وبس ومش بعيد يتم إستغلاله جنسياً ويتم تجنيده بعد كده لحساب اللمخابرات الإسرائيلية عن طريق إجبار مراته ؟ حد يجاوب ساعتها كان هايبقي إيه الوضع
سؤال تاني ليه يا حضرات إنتوا ما بتنادوش بقفل مصانع شبرا والإسماعيلية والمنصورة القائمة علي إتفاقية التجارة الحرة الكويز وإلي شغال فيها ألالافات المصريين عمال ومهندسين وفنيين ولا أستثني كمان بتوع القمامة إلي بيلموا بقايا هذه المصانع .
ليه كمان يا حضرات ما قفلتوش حتفيه الغاز إلي الخكومة فتحاها لإسرائيل علي البحري (طبعاً قبل كده ، دلوقتي الأسعار إتعدلت بشكل أحسن للي متابع )
سؤال كمان ليه ما بتعترضوش علي تصدير بعض المنتجات المجمدة من الخضروات لإسرائيل وكذلك بعض أنواع الجلود ولا لما يتكون في مصلحة بننسي ولما المصلحة بتروح بنفكر للناس ؟.
حاجة كمان ليه ما حدش واقف علي المعبر بيعد عربيات الأسمنت بتاع سينا إلي رايحة إسرائيل وبيتبني بيها مستوطنات وجدار عازل
ليه كمان ما حدش بيشغل الشباب إلي نصهم عاوز يشتغل في إسرائيل فواعلي ويعمل في سنة إلي ممكن يعمله هنا في خمس سنين (الكلام ده بدون مبالغه) .
طبعاً لو هشام بك ينكر فضل مراته عليه في إنها كبرت شغله وخلته يبقي علي نطاق أوسع من إسرائيل وتركيا بلاد تانيه يبقي جاحد ! ، وكمان عاوز أقول إن العيال في إسرائيل معظمهم مش ملتزمين دينياً إلا بعدج أن يتموا الـ 16 سنة وبعدها بيتشكل عندهم الوعي يعتنقوا أي ديانة وأي مذهب :)
أخيراً نداء إلي معتنقي نظرية المؤامرة
أرجو أن نتوقف عن التفكير في أن إسرائيل متربصه بكل مصري في أي حته ، لإن الناس هناك مش فاضيه وعن تجربه شخصية الناس هناك في حاجة إسمها علم ورياضة وشغل وبس ، طبعاً أوقات الفراغ بييستمتعوا بيها علي الآخر أو بمعني أصح إلي آخر نقطه
أي مصري بقي بيديهم الفرصة هو إلي بيبقي وزعد اللامؤخذه وأسف في التعبير (يبقي أهبل) يبقي بقي نعرف إيه إلي لينا وإيه إلي علينا نعرف نرد عليهم إزاي لما يقولوا غلبناكم في حرب أكتوبر ويبدأوا يتكلموا عن الثغرة إلي أرهان علي إن معظم منتقدي الموضوع ما يعرفوش عنها حق المعرفه
أو آواخر الحرب ليه وقفنا إطلاق النار ؟
والتانيين إلي بيقولوا إن الهرم بتاعنا وآخرين إلي بيمجدوا في نوال السعداوي وبيدرسوا كتبها في إسرائيل والتالتين إلي بيعيبوا في الإسلام ونظريات تعدد الزوجات وبيعتبروها زني وحيوانية وحاجات تانية كتير .
للحديث بقية علشان أنا صوابعي وجعتني راجع تاني
تحياتي للجميع
ملحوظه أنا لا أنتقد أي حد من المنتدي لإني يعلم الله إلي أي مدي أحترم أعضائه الكرام ، ولكني لا أحب وصف الخيانة بدون تروي ودون معرفه الحقيقة ، وكذلك لا أحب تبني الإعلام للقضايا من هذا النوع لأنهم لديهم القدرة علي قلب الخطأ صواب والصواب خطأ وخاصة في مثل هذه القضايا .