-
إشترى لوجان و لا لأ ؟؟
بادئ ذى بدء احب اشيد بكفاءة الموقع ده اللى انا عضو فيه من امبارح بس لكن بجد اكتشفت انه موقع لا يقل اهمية عن باقى مواقع السيارات فى مصر , لذا تحية كبيرة منى للقائمين على شئون ادارة هذا الموقع و اعضائه الكرام .
مش هطول عليكم , انا من 3 اسابيع كان معايا عربية شاهين و عملت بيها حادثة بعيد عنكم المهم العربية اتدمرت و قررت اننى اشترى عربية جديدة بس بصراحة انا فى حيرة رهيبة لانى مش عارف اجيب ايه كل حاجة ليها عيوب و مزايا , انا فى الاول كنت مشدود جدا للرينو لوجان ( الكاملة خالص ) و لقيت فى بعض الشكاوى من السادة الاعضاء و انا كنت بفاضل بينها و ما بين الهيونداى جتز و الشيفروليه لانوس .
لذلك انا بطلب من كل من تسمح له الفرصه انه يقدملى نصيحة و يرشدنى للاحسن بينهم من حيث استهلاك البنزين و قطع الغيار ...... الخ
ارجو يكون الموضوع سريع و يأتى بنتيجة طيبة فى الاختيار و شكرا
-
بص أنا عندى كل مشاكل اللوجان اللى الاعضاء قالو عليها وكنت عارفها قبل ماأشترى واشتريت ولو رجع بى الزمان هشترى لوجان تانى
-
هي ايه بقي مشاكل اللوجان؟
-
شكرا ahfares على الرد السريع .
tabeb مشاكل اللوجان اللى سمعنا عنها حتى الان صوتها عالى بعض الشئ ناس قالو مش بتجرى بعد 140 كم و ناس قالو الفتيس بيترجرج زى العربيات القديمة فى السلانسيه . بس هى فى المجمل عربيه جميلة و ده اللى محيرنى , عموما شكرا على الرد
-
بص يا باشا ان حقولك حاجة مهمة
انا كان معايا شاهين و طبعا انت عارف عيوف الشاهين و الحمد لله بعتها
اولا : كفاية انك راكب عربية عليها علامة رينو و بعدين رينو مش هبلة علشان تعمل عربية وحشة و علشان تبقى عارف اى عربية فيها عيوب بس فى عيوب بتتقبل و عيوب تترفض و العيوب كلها بسيطة مش جامدة اوى
ثانيا : لو قارنت الشاهين بالرينو حتلاقى فرق شاسع
-
ألف شكر Alex Life يا ابن بلدى يا جامد:S_thum1[1]::S_thum1[1]:
معاك حق طبعا عيوب الشاهين لا تضاهيها عيوب اى عربية تانية و شكرا على مشاركتك
-
انا حقولك على حاجة انا حاجز اللوجان من حوالى 3شهور وقريت عن كل مشاكلها ودى كلمة قاسية لانها مش مشاكل دى ملاحظات زى
1- صوت الماتور عالى شوية من خارج السيارة بيقابله عزل جيد جدا داخل الصالون
2- هزة بسيطة فى الفتيس لا تؤثر على اداء السيارة وهى بسيطة اوى ممكن ماتشوفهاش اصلا او ماتخدش بالك منها الا لو حد قالك عليها
3- السى دى بلاير اوديو بس طبعا انا بتلكك
4- فى عضة بسيطة فى المارشدير وهى مجرد انها محتاجة تعود بانك بتجيب الفتيس ناحية الخامس شوية وتجيب المارشدير بسهولة عادى جدا
(موضوع تعود مش اكتر)
طبعا دى ملاحظات بسيطة لا تؤثر على قرار شراء العربية مقارنتا بمميزات العربية اللى كلنا عارفينها وهى عربية جميلة و تستحق كل جنيه ادفع فيها
وربنا يرشدك للاختيار الامثل ونورت قسم رينو
-
يا عزيزي
لو عاوز عربية يجيب بيها أكتر من 180 تشوفلك عربية غير اللوجان علشان هيه غلبانه بعد 180 مابيتجبش
لو عاوز عربية تطوي المرايات للداخل بالكهرباء تشوفلك غيرها علشان هيه مرايات كهرباء بس
لو عاوز عربية الكمبيوتر فيها يظبطلك درجة التكيف بتاعتك و مستوى الصوت فى الكاسيت و إضائة العدادات و ارتفاع و وضعية كرسي السائق تشوفلك غيرها علشان العربية فيها تكيف اكثر من رائع بس لازم تشغلة بنفسك و مضطر أيضاً لضبط درجة التكيف كمان . و الكاسيت بتاعها صوتة راقي جداً بس مفيهاش CD Changer معلش هتبقى مضطر تشينج الCD بنفسك. و الكرسي مريح جداً بس هتبقى مضطر ترفعة أو تنزلة بنفسك......
يا راجل حرام عليك هيه العربيات الي أنت نتقارنها بيها (جيتز و لانوس) فيها نص الحاجات دى !!!! و عموماً العربيات وجهات نظر
ياريت تبقى تقولنا الموضوع هيرسي على أية و اسباب أختيارك
-
يا باشا العيوب دي مش عيوب دي ملاحظات بس
بالنسبة لقصة الهزة بتاعة السلانسيه دي مش ملحوظة خالص مش هقلك زي ال28 تلاقي العصاية زي البندول رايح جاي لأ خالص و اركب اي لوجان و شوف الهزة دي الاول
الصوت الغالي بيقل بعد التليين انا عربيتي دلوقتي عاملة 700 كيلو في الاول صوتها كان عالي شوية لكن بعد ال500 كيلو الاولى قل بشكل ملحوظ و الناس اللي عدت ال3000 كيلو بيقولوا صوتها بقى عادي جدا
عزل الصوت في العربية دي ممتاااااااااااااااااااااا ااز
العربية دي بتنزل برة من 2004 و متباع منها ملايين العربيات و في واحد هنا في المنتدى كان سافر المغرب في شغل بيقلك انها هناك تاكسي و معنى انها تشتغل تاكسي و تبقى منتشرة يبقى فعلا عربية حمالة زيها زي الشاهين و اللانوس
استهلاك البنزين في صالح اللوجان تماما فانا في فترة التليين و استهلاكها جوة البلد مع التكييف اللتر بيعمل 11 كيلو و على الطوالي سرعة من 90 الى 120 7.5 ليتر ؟ 100 كيلو
اما بالنسبة لقصة انها مبتعديش ال140 انا مجربتش بس فيه ناس هنا بردو في المنتدى جابو بيها تقريبا 190 او 201 حاجة كدة كان موضوع هنا في رينو عن اقصى سرعة جبتها بالرينو بتاعتك و عن تجربة انا العربية كنت ماشي بيها على الدائري و محستش ان العربية جابت ال120 بسهولة و بدون معاناة مع الموتور بالرغم من تشغيل التكييف و ثابتة بشكل مش طبيعي بالرغم من علوها
من الاخر العربية دي هتديلك كل اللي انت عاوزو و بسعر ممتااااااااز و لو رجع بية الزمن هشتريها تاني
و انا على فكرة كنت محتار زيك كدة مابينها و مابين البيكانتو و اللانوس و الافيو نزلت لحد مبقوا لانوس و لوجان و عمال اعمل استخارة و كل مانزل احجز اللانوس حاجة تحصل و بعد مانزل و الفلوس معايا و مكلم ناس علشان استلم بسرعة يحصل حاجة و اقول هنزل بكرة و اللوجان حجزتها في 5 دقايق اما الجيتز فانا معرفش عنها حاجة لكن اللي شايفه انها عربية صغيرة على موتور كبير معرفش ايه نظامها و ممكن تسال لكن انا مبحبش غبور باشا لانو من الاخر ميعتبرش وكيل ده اخره ورشه و فيها كام بلية بيصلحوا
و اي استفسار بالنسبة للوجان انا تحت امر حضرتك
-
الف شكر Ringo على الرد و اتمنى فعلا ان تكون المشاكل بسيطة و انا اللى زادنى شرف الانضمام لمنتدى زى نايل موتورز .
Mr 3M انا والله مش بتعالى على العربية و انا مش محتاج كل الرفاهية دى لان لو حضرتك تاخد بالك انا كنت راكب شاهين يعنى انا اى عربية فيها باور و تكييف بالنسبة لى نقلة كبيرة و بالنسبة للسرعة 180 كم دى عظيمة كده جدا بس اللى قريته من احد الاعضاء انه مش عارف يبجيب بيها اكتر من 140 كم و عموما شكرا جدا على مشاركتك .
Content Relevant URLs by
vBSEO 3.6.0 PL2