إزاى أسوق سواقة ملوكى...

**zanativich** · 08-11-2009 08:49 PM

انا بقى و الحمد لله ده اسلوب سواقتى اساسا
و بما انى عارف ان قانون السواقه المصرى حاليا
الى خايف يوسع
فانا دائما خايف وبوسع
ولما بتضيق فى وشى شمال خالص و عدويه و التكييف
وبراحتى انا عاوز اروح لبيتى مش لمكان تانى

**SAMEH_FOUAD** · 08-11-2009 09:30 PM

الناس مابقتش مستحملة بعض الكل عايز يعدى مابقاش فية احترام خالص ,يعنى افتكر مرة قررت ان امشى بالراحة يعنى تبقى اقصى سرعة لية على اى طريق سريع ماتعديش 100 لكن فجأة تلاقى واحد بيعديك واللى بياخد من قدامك غرزة عقابا ليك على انك ماشى تبع القانون ,واللى تلاقية جاى من ورا سريع وعايز يعديك ولما تعدية يجيى جنبك ويبصلك من فوق لتحت كانك ارتكبت جريمة شنيعة انك ماشى زى ماالقانون بيقول وياريت كدة طبعا ممكن يتفوة بكلمات انت ماتقدرش تحددها بس هية اكيد تييييييت,كل دة يخلى الواحد يتنرفز ويفقد اعصابة بسرعة لانك مش هاتستحمل واحد مافيش فرق بينة وبينك ان يبصلك بصة زى دية ولو عاندت معاة ممكن توصل لتقليل من شانك مع انسان بالاخلاق دية
وكذا موقف حصلى انى اكون ماشى ومقرر ان امشى بالراحة والمعقول وطبعا عشان كل الحارات بتبقى مليانة واللى جاى من ورا وراة الديوان ينرفز فى اللى قدامة وخلاص عايز يعدى باى طريقة ,اروح دايس بنزين ابص الاقية مش ورايا خالص ,اجى بقى ارجع لطبيعتى تانى مافيش خلاص ابقى متهور اكتر من الاول ,وبعدين الواحد لما بيصدق يلاقى طريق مفتوح العربية بحس انها بتحس بية قبل منى وتقولى جرينى حرام عليك اللى انت عاملة فية ,ومابقدرش ارفضلها طلب الصراحة ,مع تشجيع من البشر اللى حواليك دة الشعب المصرى باختصار عمرة ماهيعرف يعنى اية التزام ابدا فى اى حاجة مش فى القيادة بس

**M.Osman** · 08-11-2009 09:59 PM

انا أسف يا جماعة و خاصة صاحب الموضوع

صعب الكلام دا يتحقق

انا فاكر حاولت التزم بسرعة 90 على الدائري و معرفتش بصراحة
الناس بقت بصراحة غريبة جداً ...اللي جاي بسرعة عايز يعدي من اي حتة مش بس من الشمال ..يعني لما ابقى ماسك تاني حارة من اليمين و ملتزم بسرعة 90 - 100 و كله عمال يقلب ... اروح فين ؟؟ البس في الميكروباصات اللي بتقف كل شوية عاليمين ؟؟

تيجي تري شوية و تجيب اكتر من 100 و تمسك شمالك.. كله عايز ينط من فوقك

بصراحة انا هحط للعربية بعد كدا red bull 99 .. عشان يطلعلها جوااانح!

**mahmoud_magdy** · 09-11-2009 11:42 PM

عاوز تسوق سواقه ملوكي

البس نضارتك الشمس واقفل ازار عربيتك (سيب سنه مفتوحه عشان الهوا او افتح التكيف) وامسك حاره ومتسبهاش (حاره متوسطه)
وكل اللي عاوز يعدي اديلو انتظار بشرط انك تكون على سرعه مناسبه او السرعه اللي مسموح بيها
وانت بالشكل ده هتسوق سواقه ملوكي
يعني الواحد لازم يبقى بارد واعصابه هاديه خالص
وخليهم يتجننو براحتهم بقى

**kasten** · 10-11-2009 02:54 AM

متنفعش السواقه دى فبلدك

**هيثم** · 10-11-2009 05:00 AM

ايا كانت ظروف الطريق من حواليا مبعديش 80

**dr_timo** · 10-11-2009 06:51 AM

بجد انا كدة بالظبط انا عدو الغرز انا بمشي في طريقي محبش لا اغررز ولا يمين ولا شمال ومبحبش السرعة الجنونية وديما طمئنينتي في سيبان مسافة بيني وبين اللي قدامي وميهمنيش بقي بئيت الطريق يبقو مشلولي مني ولا لا انا بسوق صح وقانوني ومش بس ملوكي كلام لا ملوكي فعلا لان لما حد يتمسك رادار لسرعته ويتسحب رخصته ويدفع غرامة مش هيبقي شكله ملوكي خالص

**A_H_M_A_D** · 10-11-2009 09:15 AM

في رأيي أهم حاجه إن الواحد يلتزم بالحارة المرورية اللي هو فيها
و يحاول مايسبهاش إلا لو وقفت خالص و كانت الحارة المجاورة تسمح بتغيير الإتجاه , و إستخدام الإشارات لتغيير الحارة دي نقطة مهمة

ثانيا السرعة تبقى في حدود المعقول و المسموح وسيبك من الناس المستعجلة قوي و وراهم الديوان

ثالثا عدم المبالاة للناس اللي بتزمر بدون أي سبب و على الفاضية قبل المليانه و عايزينك تطير من قدامهم بغض النظر عن حالة الطريق قدامك عامل إيه

رابعا التحكم في الأعصاب و عدم الإنقياد ورا الناس المتهوره اللي غاوية تكسر على اللي حواليها و تعمل غرز, لو قدرت توقفهم بحرفنة وقفهم مقدرتش سيبهم يغورو

خامسا محاولة قراءة الطريق من على بعد وإيجاد أحسن المسارات اللي سالكة بعيدا عن المشاكل و العربيات الواقفة و الميكروباصات وإلخ

يعني دي بعض النقط اللي أنا بطبقها و شايف إنها إلى حد بعيد بتريحني وأنا سايق و بتجبر العربيات اللي حواليه على إحترامي

**M.Osman** · 10-11-2009 04:02 PM

المشاركة الأصلية كتبت بواسطة dr_timo

بجد انا كدة بالظبط انا عدو الغرز انا بمشي في طريقي محبش لا اغررز ولا يمين ولا شمال ومبحبش السرعة الجنونية وديما طمئنينتي في سيبان مسافة بيني وبين اللي قدامي وميهمنيش بقي بئيت الطريق يبقو مشلولي مني ولا لا انا بسوق صح وقانوني ومش بس ملوكي كلام لا ملوكي فعلا لان لما حد يتمسك رادار لسرعته ويتسحب رخصته ويدفع غرامة مش هيبقي شكله ملوكي خالص

حضرتك بتسيب مسافات؟
طب هل المسافات دي بتفضل فاضية؟

اكيد لأ.. مش كدا؟
(نفس الللي بيحصل معايا...اكون سايف مسافة والاقي عربية ولا اتنين دخلوا فيها و لا عزاء للمحترمين)