صيانة الأفيو 5000 كيلو - محتاج بعض النصائح
السلام عليكم ورحمه الله وبركاته.
إن شاء الله سوف أذهب لصيانة سيارتي الأفيو الأسبوع القادم لأول مرة، صيانة الـ 5000 كيلو. أريد من الأعضاء ملاك الأفيو ينصحوني إيه بالظبط اللي حيحصل في هذه الصيانة؟ وياترى إيه التكلفة المتوقعة؟ ومفروض آخد بالي من إيه بالظبط؟ يعني من الآخر عايز خلاصة خبرتكو علشان أكون مستعد.
وعايز أعرف فيه حد جرب منكم مركز ياسين للصيانة بالقرب من المطار؟ أنا كان عندي مشكلة الـ RPM وروحت بيها لمركز ياسين بس بعد التصليح العربية فقدت النعومة في السحب وأصبحت خشنة. وكان صوت الموتور عالي شوية، بعدين مشكلة الـ RPM رجعت تاني والموتور صوته أصبح أسوأ لدرجة إن لمبة الموتور في التابلوه بقت تنور لفترة قصيرة وبعدين تطفي. هل أروح بيها لياسين تاني ولا أشوف مركز تاني؟ وتنصحوا بأنهي مركز؟
هل يا ترى همه عندهم في ياسين الـ TPS Plug ولا لسة ما وصلهمش ولازم أروح مركز الهرم اللي نصحني بيه العضو Egyptian Mafia؟؟
أحد الأعضاء هنا كان بيشكر أوي في مركز ياسين، بس مش فاكر اسمه. ممكن يرد عليا ويقوللي عن خبرته مع مركز ياسين؟
كذلك عندي مشكلة في الفرامل، إنها ساعات قليلة بتصفر عند الضغط على الفرامل وخصوصاً لما أكون ضغطت عليها جامد، زي مثلاً نزلة الكوبري أو مدخل الجراج أسفل العمارة. بس بعد كده بتختفي. هل أقول لهم عليها؟ هلى تيل الفرامل في الضمان؟ وأطلب تغييره؟ ولا حيخلوني أدفع سعره؟ ولو حأغير إيه النوع المناسب وتكلفته كام وهل هو موجود في ياسين؟
للعلم أنا معايا أفيو كوري 2009 فول أوبشن.
شكراً جزيلاً لنصايحكم الغالية.
عمرو
