الموضوع: حسبى الله ونعم الوكيل فى الى دخل الموتسيكلات والتكاتك الصينى مصر

المشاركة الأصلية كتبت بواسطة successcre8or

انا لسة قريب حصل لي موقف مشابه

انا جاي من ورا الجامعة و داخل المشاية فوق من عند مترو و فندق رمادا كدا ... حضرتك عارف ان اللي جاي من ورا الجامعة لازم يدخل يمين في الحتة دي

قبل ادخل يمين الاقي واحد ابن تيت كان عمال يقلب نور و مشغللي فرح في الزفت بتاعه دا ماشي زا النحلة بالظبط بدون اي نظام (مفيش اي مخ ولا ذرة تفكير!!)
و انا بدخل يمين لاقيته عندي قي الباب اللي ورا يمين!
نزلت.. يوقللي بقى الكلمتين اللي ملهومش لازمة .. حصل خير يا باشا..
اقوله و انت مفيش تفكير خالص؟؟
اية اللي جابك عندي هنا و الطريق كله داخل يمين ؟
يعني لو كان حصلك حاجة؟؟
يقوللي معلش بقى طالما حصل خير...سبته و مشيت

بصراحة لو واحد زيه كان حصله حاجة مكنتش هعبره ..لأنهم مغفلين اوي و فاكرين نفسهم راكبين موتسكلات على سطح بيتهم باين ..
حاجة تحرق الدم و الله

حسبي و الله و نعم الوكيل

قدر الله و ماشاء فعل ..

معلش يا محمد باشا ربنا ستر
وزى ما اخونا رد عليك الكلام مع الاشكال دى مش مطمن خالص
لانه ممكن يشتمك ممكن يعمل اى تصرف يدايق الواحد ومش هنعرف نعملهم حاجه
منا بقول انها بايظه من كله للاسف
ولو اتصرفت واتشاكلت ممكن تدخل نفسك فى مشكله انت فى غنى عنها
مفيش غير حسبنا الله ونعم الوكيل

حمدا لله على سلامتك. المشكله أننا نعيش في بلد لا يحكمها قوة القانون إنما يحكمها قانون القوى. فالعيب ليس في المنتج الصيني أو حتى في رخص ثمن وسيلة الإنتقال.
أي مواطن فينا معرض أنه في أي لحظه مستقبله بالكامل يتغير و يترمي في السجن. تخيل لو حد ماشي بالعربيه في شارع جانبي من ابو حاره واحده من بتوع مصر الجديده.
مش مسرع لأنه الشارع ميسمحش يعني قول ماشي 30كم/س و عيل طلع يجري بين العربيات فجأه و خبطته بالعربيه. في ثوان هيتلم عليك البشر و اللطم و العياط و اللي يقولك الولد كان أشطر إخواته و كان هيطلع دكتور....و تروح القسم و حتى أمام القاضي هيتحكم عليك. حصلت في واحد صاحبي و كان على طريق سفر ممنوع أصلا وجود مشاه. لو هذا السيناريو حصل في الغرب فمن حقك أن ترفع قضيه على والدي الطفل و هتاخد تعويض.

العيب أنه لا يوجد قانون لحماية قائدي السيارات من حماقات الغير سواء كان مرتكب الخطأ راكب صيني أو حتى من المشاه. و إن وجد فالعاطفه تطبق قبل العقل و المنطق. يعني لو كان هذا السيناريو حصل مع شاب و معاه خطيبته أو صاحبته أو مراته كان على طول إتعمل فيلم الشباب المستهتر المرفه اللي مش شايف قدامه و قضى على مستقبل مواطن مسكين بيجري ورا أكل عيشه بموتسيكل صيني غلبان. و في ثوان يجتمع أمم من الأفاقين و تسمع من يقول "أيوه ده كان بيبوسها و مش باصص قدامه" و تلاقي ألف واحد يشهد ضدك كذبا و زورا..
عوضك على الله.
و "معلش".