مصر والجزائر .. بتوع الهمبكة وطق الحنك في مواجهة المحترفين
لسة سامع في البيت بيتك إن الاتحاد الجزائري لكرة القدم طلب من الفيفا إنها تطلب من مصر الاتزام بالروح الرياضية وعدم الشغب وطلب -في سابقة الأولى من نوعها- تعيين مراقبين أمنيين لضبط الشغب داخل وخارج الملعب لضمان أمن اللاعبين وال Fair Play .
احنا بتوع الهمبكة والهجايص وطق الحنك مننا لنفسنا
احنا بتوع الزفة الكدابة .. نشتم ونقل أدبنا ونطول لساننا ونعتبر إن ده النصر المبين
الجزائريين تعاملوا مع الموقف في قمة الاحتراف Very Professional وأكلونا الحلاوة وسابونا غرقانين في بحر الطحينة اللي رسمناه لنفسنا وبعتوا جواب صغير للفيفا أخدوا حقهم وزيادة وهانبقى -المصريين- محاصرين وسط بلدنا وإلا واقعة زيمبابوي هاتتكرر !!
قمة الاحتراف لا قالوا عروبة ولا وردة ولا أعضاء الاتحاد بتاعهم مسكوا الدفوف في الفضائيات يتباكوا ويناشدوا الشعب .. هو جواب أو فاكس فيه أبسط من كدة؟!!!!!! أنا هاطق :_Alshmokh08[1]:
بتوع الهمبكة بقى كل يوم والتاني واحد يطلع اللي يقول "بلاش شتيمة" والتاني يطلع يقول "بس دول سممونا واحنا أخوية مننا مارضيناش نقول" واللي يقول "حدفوا علينا صواريخ ومروءة مننا مارضيناش نشتكي" ... إلبس يا معلم .. هايلبسونا طرح وسط الاستاد بتاعنا وكل واحد يحترم نفسه ويقعد مربع إيديه عشان شوية الهواة المنتفعين الأرزقية اللي بيديروا شئون الاتحاد ماعرفوش يدافعوا عن حقوق المنتخب!!!
دي أول مشاركة لي في أي موضوع متعلق بمباراة مصر والجزائر لأني المرة دي هاطق بجد .. لأن مش معقول يكون الشعب كله متعشم وهانعمل ونقطع ونولع، واتحاد الكورة عندنا حيطة مايلة مش قادر يوفر أي غطاء لمنتخبه الوطني .. عار قومي
ومن كل قلبي وبكل صراحة ألف مبروك للجزائر والجزائريين لأن كرة القدم لعبة الرجال والمحترفين .. كرة القدم لعبة للكبار فقط