الموضوع: 65 مترا ليه

علشان تكره اليوم اللى تخلف فيه طفلين وياسلام لو ولد وبنت يا جمالوا
تبقى غرفة رجالى والاخرى حريمى

المشاركة الأصلية كتبت بواسطة نور القمر

وفي 45 متر ده نظام استوديو اكيد

على رايك قال وعايزين الناس تتجوز

السبب بسيط جدا

السبب بسيط جدا، شقة ال 65 متر دى هدفها تحديد النسل
وجهة نظر الحكومة ان اللى رايح يسكن فى شقة فى المدن الجديدة يبقى اكيد فقير وكحيت ،يبقى ليه يخلف زوربة عيال فقراء زية يقرف بيهم الحكومة، كفايه عليه عيل واحد يلعب بيه على قد فلوسه، انما تبنيله شقة 120 متر يملاها ب 6 عيال فقراء ومساكين زيه ويقد بعد كدة يمسك فى رقبة الحكومة علشان تطعمهم؟ كما ان باقى وجهة نظر الحكومة ان محدش ضرب الشاب على ايه علشان ياخد الشقة دى
الى جانب ان ممكن تسمع برضه من ممثل الحكومة-اللى قال الكلمتين اللى فاتوا- جملة من نوعية: انتم عايزين مننا ايه؟ شقق ووفرنالكم.قرض تعاونى يسدد على مليون سنة وجبنالكم .جواز واتجوزتم. مساحة تكفى عيل واحد وادينالكم. هو انت كمان عايز تخلف وتزرب وتملاها عيال على قفانا؟ نفسك فى العيال يا اخى اشتغل بأه شوية وهاتلك شقة واسعة وخلف فيها، اقله نبقا ضمنا انك بقيت تملك وضع مادى واجتماعى يسمح انك تأكل وتعلم العيال اللى انت هترزبها،

دى طبعا وجهة نظر الحكومة وليست وجهة نظرى، لكن بصراحة شديدة انا -بالرغم انى مش قادر اقول ان الحكومة صح100%-برضه مش قادر اقول انها غلط 100% - لأن الحكومة من اكتر من 30 سنة وهى بتتحايل على الناس تفكر قبل ما تخلف-محدش طلب منهم ما يخلفوش لكن كان الطلب انهم يفكروا قبل ما يخلفوا- لكن مافيش فايدة، الناس بتتعامل مع الخلفة بمبدأ عك وربك يفك، بل وسارع الكثيرون الى زج الدين فى الموضوع حتى يقطعوا الطريق على الكثيرين فى مسألة ضبط النسل، وبالتالى وجدت الحكومة نفسها فى مأزق، اما ان تفعل كما فعلت بعض الدول وتضع عقوبات ماليه وربما احيانا عقوبات مقيدة للحرية على من ينجب اكثر من طفلين، وهو امر كانت ستقوم بسببه مليون قيامة لأنه مسألة غير دستورية، او ان تجرالحكومة لعبة تتظيم النسل الى ملعبها بعد ان قامت يعض القوى بسحب اللعبة الى ملعب لا تجيد الحكومة اللعب او التأثير فيه ، فاذا كان البعض قد اوعز للشعب بترك حبل الخلفة على غاربه واقنعوهم ان هذة هى وجهة نظر الدين فأن الحكومة قامت بتضييق الخناق ماليا على كل من يفكر فى انجاب اكثر من طفلين، اصبحت المدارس الحكومية زى قلتها واصبح وضع الطفل فى اية مدرسة آدمية يتكلف على اضعف الايمان 5 آلاف جنيه سنويا، توغلت الدروس الخصوصية واستفحلت، الجامعات الحكومية المجانية لا تقبل سوى مجاميع مرتفعة جدا ناهيك عن مستوىالتعليم الآخذ فى التدنى فيها حتى لا يصبح هناك تعليم جامعى سوى فى الجامعات الخاصة، رفعت كل انواع الدعم على الغذاء، رفع الدعم عن الداوء والعلاج، توفير شقق بأسعار مناسبة لا تصلح سوى لانجاب طفل واحد فقط اما اذا تهور ساكنها وفكر فى انجاب الطفل الثانى فسيشعر انه يقيم فى خيمة إيواء، رفع الدعم عن المواصلات، رفعت الدولة يدها عن توظيف الخريجين

وهكذا اصبحت مسألة انجاب اكثر من طفلين هى مسألة ترف مبالغ فيه لا يقدر عليه سوى الطبقة فوق المتوسطة بشق الأنفس او الطبقة العليا،

فقط اطلب ممن يهتم بمشاركتى ويهتم بالرد عليها انه ميعتبرنيش واحد من بتوع الحكومة، انا لا بشتغل فى الحكومة ولا عاجبنى 75% من اللى هى بتعمله، لكن انا كنت بتكلم من وجهة نظرهم هم، وبالتالى لو وجهة نظر الحكومة مش مناسبه له يخلى رده موجه للحكومة مش ليا

المشاركة الأصلية كتبت بواسطة holiel

الاخ سبعاوى الاستثمار الافضل فى الحياة الابناء اذا تعلموا مكارم الاخلاق وليس تعليم المدارس والجامعات

منا قلت من الاول دى وجهة نظر الحكومة مش وجهة نظرى، انا ماليش دعوة اللى عايز يرد يرد على الحكومة مش عليا